FPR

Kwamamaza

Kwamamaza

Dr Habineza avuga ko adatewe impungenge cyane n’abo bagiye guhangana mu matora y’Abadepite

0

Umuyobozi mukuru w’Ishyaka Riharanira Demokarasi no kurengera ibidukikije mu Rwanda (DGPR), Dr Frank Habineza, avuga ko adatewe ubwoba n’abo bazaba bahanganye mu matora y’Abadepite, ahubwo ko abaturage aribo bafite amahitamo.

Ibi Dr Habineza yabitangaje ku wa Mbere tariki ya 6 Kanama 2018, mu kiganiro yagiranye na Bwiza.com, ubwo Komisiyo y’Igihugu Ishinzwe amatora (NEC) yari imaze gushyira hanze urutonde ntakuka rw’abakandida Depite bemerewe kuzatangira kwiyamamaza mu cyumweru gitaha.

NEC itangaza ko ishyaka Green Party ryari ryatanze abakandida 34 bazaba barihagarariye, ariko abasohotse ku rutonde ntakuka ni 32, babiri bakaba barakuwemo kubera ko batujuje ibisabwa.

Dr Habineza ashimangira ko n’ubwo hari abakandida benshi bazaba bahuriye mu kibuga kimwe, nta mpungenge bagira cyane.

Ati “Gahunda ni yayindi, ni ukwegera abaturage mu cyumweru gitaha tukabasaba amajwi, gahunda politiki (manifesto) irahari, natwe turi kurangiza imyiteguro yo gutangira kwiyamamaza”.

Abajijwe niba nta bwoba bafitiye abandi bakandida bo mu yindi mitwe ya Politiki, irimo n’iyifatanije n’umuryango wa FPR/Inkotanyi ari nawo uri ku butegetsi, yasubije  avuga ko umuturage ari we rufunguzo rw’uzinjira mu Nteko Nshingamategeko.

Ati “ impungenge ntizabura ariko twese tuzahurira mu giturage dusaba amajwi, ubwo abaturage nibo bafite ifirimbi yanyuma”.

Dr Habineza nk’umuyobozi w’iri shyaka rya Green Party, ashimangira ko intego yabo ari uko mu bakandida babo habonekamo 20 babahagararira mu Nteko, babura bakabona nibura imyanya 10.

Abakandida 539 nibo bari bashyikirije NEC kandidatire zabo zo guhatanira imyanya y’Ubudepite,  521 bakaba aribo basohotse ku rutonde ntakuka rw’abemerewe kuziyamamaza abandi ngo bakaba batujuje ibisabwa.

Kwiyamamaza bizatangira ku wa 13 Kanama kugeza ku wa 1 Nzeri 2018, amatora abe ku wa 2 no ku wa 3 Nzeri 2018.

Tanga igitekerezo cyawe

Your email address will not be published.