Amakuru aturuka muri Repubulika Iharanira Demokarasi ya Congo aravuga ko Général-Major Christian Ndaywel wahoze akuriye ubutasi bwa gisirikare muri iki gihugu yagerageje kwiyahurira aho afungiye.
Umunyamakuru Steve Wembi yatangaje ko yahawe amakuru y'uko Ndaywel yagerageje kwiyahurira mu nzu y'ibanga (Safe House) y'urwego rushinzwe ubutasi bwa gisirikare (DEMIAP), kuko "yicuza kuba yarijejwe ibidashoboka nyuma yo kubera inkoramutima umuryango wa Perezida [Tshisekedi]."
Mu Ukuboza 2024 Perezida Félix Antoine Tshisekedi yari yahinduriye imirimo Ndaywel amuvana ku kuba umukuru w'ubutasi bwa gisirikare amugira Umugaba w'Ingabo zirwanira ku butaka.
Muri Kanama uyu mwaka uyu mugabo n'abandi basirikare bakuru barimo Gen. Christian Tshiwewe Songesa wahoze ari Umugaba Mukuru w'Ingabo za RDC batawe muri yombi bakekwaho umugambi wo gushaka guhirika ku butegetsi Perezida Tshisekedi.