U Rwanda rwaba ruri gutekereza kwitandukanya n\u2019Umuryango wa ICGLR rwibaza ku ruhare rwawo n\u2019icyo wakoze mu gukumira ihungabana ry\u2019umutekano mu karere mu myaka 12 umaze ubayeho.<\/p>\n
U Rwanda rurashinja Inama Mpuzamahanga ku Biyaga Bigari, ICGLR, kuba ntacyo ikora ku kibazo cy\u2019abantu bagize uruhare muri jenoside yakorewe Abatutsi bahunze ubutabera n\u2019imitwe yitwaje ibirwanisho ikorera mu karere, hirengagijwe amasezerano y\u2019umutekano asaba ibihugu byose bigize ICGLR kugira icyo bikora.<\/p>\n
ICGLR igizwe n\u2019ibihugu 12 birimo u Rwanda, u Burundi, Congo-Brazzaville, Congo-Kinshasa, Centrafrica, Kenya, Sudan, Sudan y\u2019Epfo, Tanzania, Uganda, Zambia, na Angola.<\/p>\n
Mu butumwa yanyujije kuri twitter, Umunyamabanga wa leta muri Minisiteri y\u2019ububanyi n\u2019amahanga, Olivier Nduhungirehe, yavuze ko u Rwanda ruteganya kuva burundu muri ICGLR ikazabanza igasobanura icyo yakoze mu myaka 12 imaze.<\/p>\n
Ikinyamakuru The East African dukesha iyi nkuru kiravuga ko abakurikiranira hafi ibibera mu karere bavuga ko ibibazo by\u2019imibanire itifashe neza hagati y\u2019u Rwanda n\u2019u Brundi yaba ari yo mpamvu y\u2019ibyatangajwe na Ambasaderi Nduhungirehe.<\/p>\n
ICGLR ikaba ifite icyicaro muri iki gihugu cy\u2019u Burundi kitarebana neza n\u2019u Rwanda kuva mu 2015 nyuma y\u2019amatora yo mu Burundi ataravuzweho rumwe.<\/p>\n
Guverinoma y\u2019u Rwanda kandi ivuga ko muri Repubulika iharanira Demokarasi ya Congo no mu Burundi hari ibirindiro by\u2019inyeshyamba za FDLR zifuza guhungabanya umutekano w\u2019igihugu.<\/p>\n
Ku rundi ruhande ariko, abayobozi muri ICGLR bo bavuga ko uyu muryango hari byinshi wakoze birimo kuba u Rwanda n\u2019u Burundi nubwo birebana ay\u2019ingwe, ambasade z\u2019ibihugu byombi zigifunguye, ndetse ngo n\u2019inyuma y\u2019amarido hari ingamba zo gukumira ihungabana ry\u2019umutekano nubwo zidatangarizwa itangazamakuru nk\u2019uko bitangazwa na Wilson Kajwengye, umuyobozi ushinzwe amahoro n\u2019umutekano muri ICGLR.<\/p>\n
Yongeyeho ko hari urwego rwayo rwahawe amabwiriza yo gushaka uburyo bwa dipolomasi bwo kugarura umwuka mwiza hagati y\u2019abaturanyi nk\u2019uko byasabwe muri Nyakanga mu nama ya ICGLR y\u2019abaminitiri bo mu karere.<\/p>\n
Mu cyumweru gishize ngo ICGLR n\u2019amatsinda ya Loni bakaba baragize uruhare mu gushishikariza no kubarura abari abarwanyi ba FDLR mu burasirazuba bwa Congo bashaka gushyira intwaro hasi bagataha bagasubira mu muryango.<\/p>\n