Umucamanza Theodor Meron wakunze kurwaza umutwe u Rwanda by\u2019umwihariko abarokotse jenoside yakorewe Abatutsi mu 1994, kuri uyu wa Gatanu, itariki 18 Mutarama 2019 yavuye ku mugaragaro ku buyobozi bw\u2019urwego rwashyiriweho kurangiza imanza zitarangijwe n\u2019urukiko mpuzamahanga Mpanabyaha rwa Arusha n\u2019urwashyiriweho Yougoslavia (MICT), aho asize arekuye benshi bagize uruhare muri jenoside mu buryo buutavuzweho rumwe.<\/p>\n
Ikinyamakuru Jeune Afrique kiravuga ko ari ibyishimo I Kigali nyuma y\u2019aho uyu mucamanza w\u2019Umunyamerika w\u2019imyaka 88 aviriye kuri uyu mwanya wa Perezida wa MICT.<\/p>\n
Hari hashize imyaka myinshi abayobozi b\u2019u Rwanda binubiye ivugururwa rya manda y\u2019uyu mucamanza wakunze gufata ibyemezo byo gufungura abahamijwe uruhare muri jensoide yakorewe Abatutsi batarangije ibihano bahawe. Uwo yaherukaga gufungura yanakoze mu ibanga rikomeye ni Aloys Simba wahamijwe uruhare mu iyicwa ry\u2019abantu 40,000.<\/p>\n
Umucamanza Theodor Meron yashyizwe kuri uyu mwanya avuyeho muri Werurwe 2012, manda ye ivugururwa bwa mbere mu 2016 no mu 2018 nubwo yari akomeje kunengwa na Guverinoma y\u2019u Rwanda.<\/p>\n
Uyu mucamanza kandi yagize uruhare mu kugabanyiriza ibihano mu bujurire benshi bakoze jenoside barimo Theoneste Bagosora ufatwa nk\u2019ubwonko bwa Jenoside yakorewe Abatutsi.<\/p>\n
Yanagize uruhare mu kurekura benshi bahamijwe ibyaha n\u2019Urukiko Mpuzamahanga rwashyiriweho u Rwanda rwa Arusha (TPIR) badasoje igihano bakatiwe ibintu byakunze gutuma anengwa n\u2019abatari bacye batari u Rwanda gusa.<\/p>\n
Minisiteri y\u2019ubutabera mu Rwanda yari iherutse gutangaza ko mu minsi ye ya nyuma nka perezida w\u2019urukiko rwashyiriweho kurangiza imanza zitarangijwe n\u2019Urukiko Mpuzamahanga rwashyiriweho u Rwanda rwa Arusha, TPIR, umucamanza Theodor Meron ngo yamaze kunoza umurage we wo kubangamira ubutabera mpuzamahanga afungura Umunyarwanda Simba Aloys imyaka umunani mbere y\u2019uko arangiza igihano yahawe kubera uruhare rwe muri Jenoside yakorewe Abatutsi hirengagijwe abo yakoreye icyaha n\u2019abarokotse.<\/p>\n
Itangazo Bwiza.com yabashije kubona ryamagana iri fungurwa rya Simba Aloys minisiteri y\u2019ubutabera yashyize ahagaragara kuri uyu wa Kane, itariki 17 Mutarama, rivuga ko Umucamanza Meron azi neza uruhare Simba yagize mu bwicanyi bwakorewe abana b\u2019Abatutsi, abagore n\u2019abagabo 40,000 mu Ishuri ry\u2019ubumenyingiro rya Murambi, akaba azi ko kuri Paruwasi ya Kaduha Simba yahajyanye intwaro gakondo, imbunda na grenades akabiha abicanyi ndetse akabategeka gukuraho umwanda mbere yo kugira ahari ubuhungiro ibagiro.<\/p>\n