Umunyamuziki akaba n\u2019umudepite, Robert Kyagulanyi uzwi nka Bobi Wine na Perezida Yoweri Museveni wa Uganda bahanganiye kuba abo muri ghetto bitewe n\u2019ifoto yasohotse mu minsi ishize.<\/p>\n
Ghetto ni inzu ifatwa nk\u2019iciriritse, abenshi nk\u2019urubyiruko babamo bakodesha. Izi nzu zibamo abanyabushobozi buke bashakisha ubuzima. Mu Rwanda, iri jambo rivugwa cyane mu banyeshuri biga muri kaminuza baba mu bukode n\u2019abapangayi bajya mu migi gushaka akazi. Iri jambo ryageze no mu miryango aho usanga umusore afite inzu ntoya iwabo mu rugo abamo wenyine; na yo bayita ghetto. Bobi Wine na Museveni bavuga kuri izi z\u2019ab\u2019ubushobozi buke.<\/p>\n
Imbarutso y\u2019impaka ndende na byinshi biri kuvugwa kuri aba bombi yaturutse ku ifoto yafashwe ku wa gatandatu tariki ya 26 Ukwakira, ubwo Museveni yari yasuye urubyiruko mu duce twa Katwe na Kibuye mu mugi wa Kampala. Iyi foto yanditsweho amagambo avuga ko Museveni ari \u2018Umuntu wa ghetto\u2019. <\/p>\n
Bobi Wine yari asanzwe yiyita \u2018Perezida wa Ghetto\u2019 bitewe n\u2019ibikorwa akora byibanda ku nyungu z\u2019urubyiruko ahanini rutishoboye. Anahamya ko abayoboke b\u2019ishyaka rye (People Power) ari urubyiruko.<\/p>\n
Uyu mudepite avuga ko gutangiza amashyirahamwe yo kubitsa no kugurizanya (SACCO) mu rubyiruko kwa Museveni ari ukurujijisha kuko ngo ahubwo yarukenesheje.<\/p>\n
Ku rubuga rwa Twitter, Bobi Wine yifashishije iki gishushanyo cy\u2019Umuntu wa Ghetto (Museveni) yagize ati: \u201c Umunyagitugu ntiyigeze yita ku rubyiruko. Rwarambiwe kubaho rutigize maze rurizamura, ruravuga ruyobowe na Perezida wa Ghetto. Yihebye, agira ubwoba none yahindutse uwa ghetto. Nta kimwaro agira!\u201d<\/p>\n
Bobi Wine na Museveni ni abagabo bahanganye cyane muri Uganda, haba mu bikorwa no mu magambo. Bitana abanzi b\u2019iterambere ry\u2019igihugu, biterwa ahanini no kutavuga rumwe mu miyoborere. Aba bombi bazahatana mu matora y\u2019Umukuru w\u2019Igihugu azaba mu 2021.<\/p>\n