{"id":259713,"date":"2026-02-03T12:45:38","date_gmt":"2026-02-03T10:45:38","guid":{"rendered":"https:\/\/bwiza.com\/?p=259713"},"modified":"2026-02-03T12:45:38","modified_gmt":"2026-02-03T10:45:38","slug":"genda-sinshaka-kukubona-perezida-museveni-yuka-inabi-ceo-wa-uganda-airlines","status":"publish","type":"post","link":"https:\/\/bwiza.com\/?p=259713","title":{"rendered":"Genda, sinshaka kukubona – Perezida Museveni yuka inabi CEO wa Uganda Airlines"},"content":{"rendered":"
\n
\n
\n
\n

Perezida Museveni yafashe icyemezo cyo kwirukana Jenifer Bamuturaki usanzwe ari Umuyobozi Mukuru (CEO) wa Uganda Airlines, nyuma y\u2019inama yabereye mu ngoro ya perezida muri Nzeri 2025 yasuzumye ikibazo cy\u2019imiyoborere idahwitse, ibyemezo byo kugura indege bivuguruzanya ndetse n\u2019igihombo cy\u2019amafaranga muri iki kigo cya leta.<\/strong><\/em><\/p>\n

Iki cyemezo, cyamaze kumenyeshwa abakozi ba Uganda Airlines, kije mu gihe Ubuyobozi bushinzwe Ubugenzacyaha muri Polisi ya Uganda (CID) hamwe n\u2019Ishami rya Leta rishinzwe Kurwanya Ruswa bakajije umurego mu iperereza ku ikoreshwa nabi ry\u2019umwanya we, kunyereza amafaranga no guhimba amakonte bivugwa mu bayobozi ba kompanyi y’indege.<\/p>\n

Muri email yakwirakwijwe mu bakozi kuri uyu wa Mbere ushize nyuma ya saa sita, Bamuturaki yamenyesheje abakozi ko inama y’ubutegetsi ya Uganda Airlines vuba igiye gushyira ku isoko umwanya w’umuyobozi mukuru (CEO), ikimenyetso cyerekana ko agiye kuvanwa muri uyu mwanya.<\/p>\n

Bamuturaki yagize ati: “Inama y’Ubutegetsi igiye gushyira ku isoko umwanya w’umuyobozi mukuru, kandi mwese murashishikarizwa gusaba niba mwujuje ibyangombwa bisabwa.”<\/p>\n

Nk\u2019uko amakuru aturuka muri guverinoma no muri iyi sosiyete y\u2019indege abitangaza, ngo icyemezo cyafatiwe mu nama yabereye mu muhezo mu ngoro y’umukuru w’igihugu muri Nzeri 2025, yahamagajwe na perezida kandi yitabirwa n\u2019Inama y’Ubutegetsi ya Uganda Airlines n\u2019ubuyobozi bukuru.<\/p>\n

Iyi nama yasuzumye urukurikirane rw’ibibazo bitakemutse, birimo ibyemezo byo gutanga amasoko yo kugura indege atavugwaho rumwe, kunyereza amafaranga, gukomeza kuburirwa n’ubugenzuzi, ndetse no kuba polisi yari ikomeje kugaragaza ubushake bwo gukurikirana imikoreshereze y’amafaranga muri iyi sosiyete y’indege.<\/p>\n

Muri iyo nama nk’uko bitangazwa na Chimpreports, Perezida Museveni yasabye Bamuturaki gusohoka mu nama.<\/p>\n

Bivugwa ko Museveni yamwutse inabi agira ati: “Genda, sinshaka kukubona.”<\/p>\n

Mbere y’uko Bamuturaki agenda, yongeyeho ati: \u201cGenda, genda.\u201d<\/p>\n

Amakuru aturuka mu bari muri iyi nama avuga ko Perezida atishimiye ibisobanuro byatanzwe n\u2019ubuyobozi ndetse anasobanura neza ko icyizere yari afitiye umuyobozi mukuru cyarangiye.<\/p>\n

Nubwo nta gikorwa Museveni yakoze ako kanya, abayobozi bavuga ko iyi nama yashyize iherezo kuri manda ya Bamuturaki, bigatuma hasuzumwa ndetse n\u2019uko hakorwa impinduka mu buyobozi bwa Uganda Airlines.<\/p>\n

Nyuma Museveni yanze kwemera ko Bamuturaki yongerwa igihe, ashishikariza inama y’ubutegetsi gushyira ku isoko umwanya w’Umuyobozi Mukuru wa Uganda Airlines.<\/p>\n<\/div>\n<\/article>\n<\/div>\n