{"id":262512,"date":"2026-03-18T19:56:33","date_gmt":"2026-03-18T17:56:33","guid":{"rendered":"https:\/\/bwiza.com\/?p=262512"},"modified":"2026-03-18T19:58:51","modified_gmt":"2026-03-18T17:58:51","slug":"ubunini-bwibibazo-ntiburuta-imana-maranatha-family-choir","status":"publish","type":"post","link":"https:\/\/bwiza.com\/?p=262512","title":{"rendered":"Ubunini bw\u2019ibibazo ntiburuta Imana: Maranatha Family Choir"},"content":{"rendered":"

Itsinda Maranatha Family Choir rikomeje urugendo rwo kugeza ubutumwa bwiza ku bakunzi b\u2019umuziki wa Gospel, ryashyize hanze amashusho y\u2019indirimbo nshya yise \u201cUbunini\u201d, igaruka ku mbaraga z\u2019ukwizera mu bihe by\u2019ingorane.<\/strong><\/p>\n

Iyi ndirimbo ifite ubutumwa bukora ku mitima ya benshi, cyane cyane abahura n\u2019ibibazo bikomeye ariko bakabihisha inyuma y\u2019ibyishimo bagaragaza hanze. \u201cUbunini\u201d yibutsa abantu ko nubwo hari ibihe bitoroshye umuntu anyuramo, Imana ihora iri kumwe na we, kandi ububasha bwayo buruta kure ingano y\u2019ibibazo byose ashobora guhura na byo.<\/p>\n

Mu busobanuro bw\u2019iyi ndirimbo, Perezida w\u2019iri tsinda, Selemani Munyazikwiye yavuze ko banditse iyi ndirimbo bashingiye ku gitekerezo cy\u2019uko kwizera guhindura uko umuntu abona ubuzima. Aho guhanga amaso ku buremere bw\u2019ibibazo, umuntu ahitamo kureba ku bukomeye bw\u2019Imana. Iyo umuntu ateze amatwi ijwi ry\u2019Umwungere Mwiza, aruhuka umutima, agasubizwamo imbaraga ndetse ubuzima bwe bukuzura ibyishimo.<\/p>\n

Indirimbo \u201cUbunini\u201d si nshya mu buryo bw\u2019ihimbwa, kuko yanditswe mu myaka ishize na Clement Ishimwe, wari uri no mu bahimbyi b\u2019iri tsinda icyo gihe. Nubwo bayigerageje mu buryo butandukanye mu bihe byatandukanye, bavuga ko batigeze banyurwa n\u2019uko yakorwaga, bituma hari n\u2019ibihe bahisemo kudashyira hanze ibyo babaga bakozeho. Kugeza ubu ni bwo bayihaye isura nshya bumva ijyanye n\u2019ubutumwa bwifuzwaga gutangwa.<\/p>\n

Mu gutunganya iyi ndirimbo, Bolingo Paccy ni we wakoze amajwi, anagira uruhare rukomeye mu kuyigeza ku rwego iriho ubu. Hari kandi Mickal Uwihirwe bayiririmbanye, bose bakaba bashimiwe uruhare bagize kugira ngo iyi ndirimbo ibe igihangano gifite ireme. Amashusho yayo yakozwe na Vista, bayishyiramo ubuhanga bujyanye n\u2019ubutumwa bwayo.<\/p>\n

Maranatha Family Choir igaragaza ko umwaka wa 2025 wababereye mwiza cyane, kuko wabahaye uburambe mu murimo, bagahura n\u2019abantu batandukanye babafashije gukomeza gutera imbere. Ni umwaka kandi baririmbyemo henshi, banasohora indirimbo zitandukanye. Nubwo hari ibyishimo byinshi bawubonyeho, ntibabura no kwibuka ibihe bikomeye birimo kubura umwe mu baririmbyi babo, ndetse n\u2019ibyishimo byo kwakira ubuzima bushya mu miryango yabo.<\/p>\n

Mu migambi ya 2026, iri tsinda rivuga ko rifite intego yo kurushaho gusakaza ibikorwa byaryo ku rwego rwo hejuru, kugira ngo ubutumwa bwiza bugere ku bantu benshi kurushaho, binyuze mu ndirimbo n\u2019ibindi bikorwa byo kuramya no guhimbaza Imana.<\/p>\n

Basabye abakunzi babo gukomeza kubashyigikira no gufatanya na bo muri uru rugendo, bagira uruhare mu gusangiza abandi ubutumwa bwiza. Bashimangira ko abafana babo ari abafatanyabikorwa b\u2019ingenzi, kuko ari bo batuma ibyo bakora bigera kure.<\/p>\n

Maranatha Family Choir ni itsinda ry\u2019abaramyi rifite intego yo kwamamaza ubwiza bw\u2019Imana aho rishoboye hose, kugira ngo abantu babashe kubaho mu munezero no mu mahoro aturuka ku kwizera. Bamaze kumenyekana mu ndirimbo zitandukanye zirimo \u201cNzajya nkusingiza Yesu\u201d, \u201cTuma umuntu aseka\u201d, \u201cNyigisha\u201d bakoranye na Butera Knowless, ndetse na \u201cNarahindutse\u201d bakoranye na Nel Ngabo n\u2019izindi nyinshi zakunzwe.<\/p>\n

AMASHUSHO<\/strong><\/p>\n