{"id":30440,"date":"2020-11-20T10:30:39","date_gmt":"2020-11-20T10:30:39","guid":{"rendered":"https:\/\/new.bwiza.com\/2020\/11\/20\/umugabo-avuga-ko-akubitwa-n-umugore-we-umwita-ikirumbo-yifatanyije-n-abana\/"},"modified":"2020-11-20T10:30:39","modified_gmt":"2020-11-20T10:30:39","slug":"umugabo-avuga-ko-akubitwa-n-umugore-we-umwita-ikirumbo-yifatanyije-n-abana","status":"publish","type":"post","link":"https:\/\/bwiza.com\/?p=30440","title":{"rendered":"Umugabo avuga ko akubitwa n\u2019umugore we umwita \u2018ikirumbo\u2019 yifatanyije n\u2019abana"},"content":{"rendered":"

Umugabo witwa Sindikubwabo Barnabe utuye mu Mudugudu wa Gaseke, Akagari ka Munanira II mu Murenge wa Kimisagara w\u2019Akarere ka Nyarugenge, arasaba kurenganurwa kuko ngo \u201cumugore n\u2019abana be bamaze igihe kini bamukubita.\u201d Ni mu gihe umugore we umwita \u2018ikirumbo\u2019 na we amushinja kubuza urugo umutekano.<\/strong><\/p>\n

Mu kiganiro yagiranye na Bwiza TV, Sindikubwabo yavuze ko we n\u2019umugore bashakanye mu 1988, babyaranye abana umunani. Ngo mbere y\u2019imyaka 15 ishize, we n\u2019umugore bari babanye neza gusa aho yaburiye akazi, nta jambo akigira mu rugo.<\/p>\n

Ati: \u201cKubera ko maze imyaka 15 nta kazi mfite, nta jambo mfite. Njye muri ruriya rugo, avuga y\u2019uko nta kintu ndicyo, ndi imbwa, ngo nta n\u2019ikintu ndicyo. Akavuga ko abana kuva barakuze, ngo nta jambo mfite. Akambwira ati bagukubite! Ngo burya ntabwo ari buno, ngo ubu twabonye uburenganzira [\u2026]\u201d<\/p>\n

Yatanze urugero rw\u2019uburyo yigeze kugera mu rugo, umugore akamubuza kwinjira mu nzu kugeza ubwo abashyitsi basohokeye. Ati: \u201cNaraje ntashye, nsanga hari abantu bari mu nzu, arambwira ngo wowe ntabwo wemerewe kwinjira aha ngaha, uze kwinjira aba ngaba basohotse.\u201d <\/p>\n

Ngo si ibyo gusa, kuko Sindikubwabo yavuze ko no mu minsi ishize yigeze kwirukanwa n\u2019umugore n\u2019abana be. [Amakuru avuga ko yari yaragiye kubana n\u2019undi mugabo uri hejuru y\u2019umusozi wa Kigali (Mont Kigali)]<\/p>\n

Umugore wa Sindikubwabo mu kiganiro yagiranye na Bwiza.com, yavuze ko uyu mugabo abeshya, ati: \u201cAhubwo ni we udukubita, yaratuzengereje.\u201d<\/p>\n

Ku kuba Sindikubwabo avuga ko umuryango we wamwirukanye mu rugo, uyu mugoreyavuze ko nabyo ari ibinyoma. Ati: \u201cIyo ashatse aragenda, cyangwa akahaguma. Ntiwamenya iby\u2019uwo musaza. Ni umusaza w\u2019ikirumbo uri aho ngaho, ntabwo tuzi ibye.\u201d Yavuze ko ahubwo uyu muryango wareze uyu mugabo mu buyobozi. <\/p>\n

Ushinzwe umutekano mu Mudugudu wa Gaseke uvuga ko yitwa F\u00e9licien, yavuze ko ikibazo cy\u2019uyu muryango kizwi. Ati: \u201cIkibazo usibye kukigeza mu buyobozi, no mu kagari cyagezemo. Ariko ahanini ikibazo cye ntabwo ari icya vuba, ni icya kera. Uwo mugabo hari ibyo umuryango we umushinja atubahiriza, cyane cyane bikaba bituruka ku businzi, haba ku nzoga anywa ntagire ikintu amarira urugo.\u201d<\/p>\n

Uyu muyobozi avuga ko \u201cumugore yashinje uyu mugabo kutagira icyo amarira urugo\u201d ko we \u201cyirya akimara\u201d, ubuyobozi n\u2019imiryango barahuye, bunga uyu muryango, umugabo yemera amakosa, yemera kujya agira icyo atahana gitunga umuryango (ration), hanyuma ibyo yemeye ntiyabikora.<\/p>\n

Kuba Sindikubwabo avuga ko umugore n\u2019abana bamukubita, uyu muyobozi yagize ati: \u201cIbyo ngibyo ni ugukabya, ibyo ngibyo ni ukubeshya.\u201d<\/p>\n

Kanda hano urebe ikiganiro cyose<\/strong>