{"id":33587,"date":"2021-02-17T09:00:20","date_gmt":"2021-02-17T09:00:20","guid":{"rendered":"https:\/\/new.bwiza.com\/2021\/02\/17\/rusesabagina-avuga-ko-yashimuswe-kandi-ko-nabyo-ari-icyaha\/"},"modified":"2021-02-17T09:00:20","modified_gmt":"2021-02-17T09:00:20","slug":"rusesabagina-avuga-ko-yashimuswe-kandi-ko-nabyo-ari-icyaha","status":"publish","type":"post","link":"https:\/\/bwiza.com\/?p=33587","title":{"rendered":"Rusesabagina avuga ko yashimuswe kandi ko nabyo ari icyaha"},"content":{"rendered":"

Paul Rusesabagina na bagenzi be 21 bari mu cyumba cy’Urukiko rw’Ikirenga, aho bagiye kuburana urubanza mu mizi ahnini ku byaha by’iterabwoba.
\n<\/h2>\n

Ni urubanza ruri kuba mu gihe inteko ya EU isaba ko uyu mugabo yarekurwa. Inteko y’ u Rwanda yarabyamaganye, ivuga ko harimo n’agasuzuguro no kwivanga mu butabera bw’ u Rwanda.<\/p>\n

Abaregwa bose bakurikiranweho ibyaha binyuranye birimo n’ibijyanye n’iterabwoba. Byitezwe ko ari urubanza ruzaba rurerure kuko ruregwamo abantu benshi. Rusesabagina w’imyaka 66 niwe uvugwa cyane muri uru rubanza.<\/p>\n

Imigendekere y’urubanza
\n<\/strong><\/p>\n

Urubanza rutangiye, Rusesabagina yabajijwe niba umwirondoro wasomwe ari uwe, yahise abihakana. Yagize ati \u201cNdabisubiramo ku nshuro ya gatanu. Njyewe sindi Umunyarwanda. Ndi Umubiligi.\u2019\u2019 Abajijwe niba yemera ibyaha, yagize ati \u201cIbyaha byose ni byo.\u2019\u2019<\/p>\n

Abaregwa bari guhamagarwa imbere y\u2019inteko iburanisha, buri wese akabazwa niba umwirondoro wasomwe ari uwe ndetse niba yemera ibyaha. Nta wahakanye ko umwirondoro atari uwe mu baregwa kandi bose bunganiwe mu mategeko.<\/p>\n

Muri uru rubanza kandi hagaragayemo Mukandutiye Angeline wahamijwe ibyaha bya Jenoside yakoreye mu Karere ka Nyarugenge, akaba ari mu Banyarwanda birukanywe ku ngufu n\u2019Ingabo za RDC ubwo zirukanaga Abarwanyi b\u2019imitwe y\u2019iterabwoba irwanya u Rwanda iba mu mashyamba ya Congo.<\/p>\n

Urubanza rwakomeje, Rusesabagina yiregura avuga ko ” Ubushinjacyaha bw\u2019u Rwanda bwasabye ubw\u2019u Bubiligi kunyohereza ariko ntibabyemera.”<\/p>\n

Ati \u201cUbwo urubanza rwategurwaga nibwo nakorewe icyo nise \u2018gushimuta\u2019. Icyo gushimuta nacyo ni icyaha kandi ntabwo gisimbuzwa ikindi.\u2019\u2019 Umucamanza yavuze ko ikijyanye no gushimutwa na cyo kizaburanwaho.<\/p>\n

Umwunganira, Me Gatera Gashabana avuga ko urukiko nta bubasha rufite bwo kuburanisha umukiliya we, Rusesabagina.<\/p>\n

Kuburanishirizwa mu Bubiligi
\n<\/strong><\/p>\n

Nyuma yo kugaragaza ko Inkiko zo mu Rwanda zidafite uburenganzira bwo kumuburanisha, Rusesabagina yahaye umwanya umwunganizi we, Me Gatera Gashabana na we arabishimangira anagaragaza zimwe mu ngingo z\u2019amategeko bashingiraho.<\/p>\n

Me Gashabana yavuze ko nk\u2019uko byatangajwe n\u2019umukiliya we, bafite inzitizi isaba ko ikirego Ubushinjacyaha buregamo Rusesabagina Paul kitakwakira hashingiwe ku iburabubasha ry\u2019urukiko rugomba kumuburanisha arirwo Urugereko rwihariye rw\u2019Urukiko ruburanisha Ibyaha Mpuzamahanga n\u2019Ibyambukiranya Imipaka.<\/p>\n

Gatera yavuze ko Urukiko rukwiye kwakira inzitizi y\u2019iburabubasha hanyuma rugategeka ko Rusesabagina yoherezwa imbere y\u2019inkiko z\u2019u Bubiligi zibifitiye ububasha.<\/p>\n

Ati \u201cKubera ko twazamuye ikibazo cy\u2019inzitizi ariko hari utundi tubazo twari dufite two kubagezaho. Ndumva mwakubahiriza amategeko, mukemeza ko urukiko nta bubasha rufite bwo kuburanisha uru rubanza.\u2019\u2019<\/p>\n

Ubushinjacyaha nabwo bwagize icyo buvuga ku nzitizi zivugwa na Rusesabagina. Buvuga ko ibijyanye n\u2019ifatwa n\u2019ifungwa byaganiriweho mu maburanisha yabanje ndetse na Rusesabagina yarajuriye.<\/p>\n

Ku ngingo yo kuba atari Umunyarwanda, \u2018yatanze ikirego mu Rukiko rw\u2019Umuryango wa Afurika y\u2019Uburasirazuba (EACJ)\u2019 mu gihe kiregwamo n\u2019abaturage bo mu Karere.<\/p>\n

Ubusanzwe EACJ itangwamo ibirego n\u2019abaturage bo mu Karere, ibyo Ubushinjacyaha bugaragaza ko \u2018bishimangira ko na we yiyemerera ko ari Umunyarwanda.<\/p>\n

Rusesabagina yavuze ko ibi azasuzuma akareba niba yarareze nk’ Umunyarwanda.<\/p>\n

Umucamanza Antoine Muhima ukuriye Inteko Iburanisha asoje iburanisha ry\u2019uyu munsi avuga ko umwanzuro ku nzitizi zatanzwe na Rusesabagina uzatangazwa ku wa 26 Gashyantare 2021 saa Mbili n\u2019igice. Kuri uwo munsi hazanumvwa abandi bafite izindi nzitizi.<\/p>\n

Kurikira amakuru n\u2019ibiganiro kuri Bwiza TV, ukanze hano<\/strong><\/p>\n