{"id":33795,"date":"2021-02-25T08:20:56","date_gmt":"2021-02-25T08:20:56","guid":{"rendered":"https:\/\/new.bwiza.com\/2021\/02\/25\/rdc-umuyobozi-watangaje-ko-fdlr-yishe-ambasaderi-w-u-butaliyani-yirukanwe\/"},"modified":"2021-02-25T08:20:56","modified_gmt":"2021-02-25T08:20:56","slug":"rdc-umuyobozi-watangaje-ko-fdlr-yishe-ambasaderi-w-u-butaliyani-yirukanwe","status":"publish","type":"post","link":"https:\/\/bwiza.com\/?p=33795","title":{"rendered":"RDC: Umuyobozi watangaje ko FDLR yishe Ambasaderi w\u2019u Butaliyani, yirukanwe"},"content":{"rendered":"

Guverinoma ya Repubulika ya Demukarasi ya Congo (RDC) yirukanye umuyobozi w\u2019ibiro bya Minisitiri w\u2019Intebe wungirije\/Minisitiri ushinzwe umutekano w\u2019imbere mu gihugu, Bulakali Mululunganya Aristide azira gusinya no gusohora itangazo rishinja umutwe witwaje intwaro wa FDLR kwica Ambasaderi w\u2019u Butaliyani n\u2019abandi babiri.<\/strong><\/p>\n

Bigaragara mu itangazo rya Minisitiri wungirije ushinzwe umutekano w\u2019imbere, Innocent Bokele Walaka, yasinye ku wa Kabiri tariki ya 23 Gashyantare 2021 mu izina rya Minisitiri w\u2019Intebe wungirije akaba na Minisitri w\u2019Umutekano w\u2019Imbere.<\/p>\n

Visi Minisitiri Bokele yagize ati: \u201cUmuyobozi w\u2019Ibiro bya Minisitiri yirukanwe ku mirimo ye kuri uyu wa Kabiri tariki ya 23 Gashyantare 2021 kubera ko yasinye akanatangaza atabiherewe uburenganzira, nta buzirenenge, itangazo ryo ku wa Mbere tariki ya 22 Gashyantare 2021 yageneye itangazamakuru ryo mu gihugu na mpuzamahanga mu izina rya Minisitiri w\u2019Intebe wungirije\/Minisitiri ushinzwe umutekano w\u2019imbere ry’urupfu rwa Ambasaderi wa Repubulika y\u2019u Butaliyani mu Ntara ya Kivu y\u2019Amajyaruguru.\u201d<\/p>\n

Tariki ya 22 Gashyantare 2021 ni bwo Mululunganya yasohoye itangazo rigenewe itangazamakuru, atanga amakuru arambuye ku rupfu rwa Ambasaderi w\u2019u Butaliyani, Luca Attanasio, umurinzi we, Vittorio Iacovacci ndetse n\u2019umushoferi w\u2019ishami ry\u2019Umuryango w\u2019Abibumbye rishinzwe ibiribwa (PAM), Mustapha Milambo, barasiwe n\u2019abitwaje intwaro mu muhanda uva mu mujyi wa Goma ugana muri Teritwari ya Rutshuru, hafi ya Pariki ya Virunga.<\/p>\n

Muri iri tangazo, Mululunganya yagize ati: \u201cKu wa Mbere 22 Gashyantare 2021 ahagana saa tatu mu gitondo, imodoka ya PAM yagabweho igitero n\u2019abagize FDLR ku muhanda wa Rutshuru, Gurupoma ya Kibumba muri Teritwari ya Nyiragongo. [\u2026] Ambasaderi Luca Attanasio warashwe mu nda yatabawe n\u2019abarinzi ba ICCN, bamujyanye i Goma mu bitaro bya MONUSCO muri RD-Congo, aho yaje gupfira kubera ibikomere.\u201d<\/p>\n

Yakomeje asobanura ko inzego zishinzwe umutekano ndetse n\u2019ubuyobozi bwo mu Ntara ya Kivu y\u2019Amajyaruguru butabashije guha Ambasaderi Attanasio uburinzi bwihariye, cyane ko butamenye ko ari muri aka gace katizeweho umutekano.<\/p>\n

Ati: \u201cInzego zishinzwe umutekano n\u2019ubuyobozi bw\u2019Intara ntibashoboye gufata ingamba zihariye z\u2019umutekano kuri iyo modoka [barimo], cyangwa ngo zibafashe kubera ko batari bazi ko bari muri aka gace kabamo umutekano muke.\u201d<\/p>\n

Mululunganya yirukanwe hashingiwe ku ngingo ya 31 y\u2019iteka No20\/016 rya RDC ryo ku wa 27 Werurwe 2020 rigenga imikorere n\u2019imikoranire hagati ya Perezida wa Repubulika na Guverinoma ndetse n\u2019abayobozi b\u2019ibiro bya za Minisiteri, iteka No20\/014 ryo ku wa 2 Mata 2020 rigenga imikorere y\u2019abayobozi b\u2019ibiro bya Minisiteri mu ngingo ya 22 n\u2019iya 25 ndetse n\u2019iteka No017\/2002 ryo ku wa 3 Ukwakira 2002 rigenga imyitwarire myiza y\u2019umukozi wa Leta. <\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n