{"id":34170,"date":"2021-03-08T17:41:29","date_gmt":"2021-03-08T17:41:29","guid":{"rendered":"https:\/\/new.bwiza.com\/2021\/03\/08\/imiryango-37-yandikiye-commonwealth-isaba-iperereza-ryigenga-ku-rupfu-rwa\/"},"modified":"2021-03-08T17:41:29","modified_gmt":"2021-03-08T17:41:29","slug":"imiryango-37-yandikiye-commonwealth-isaba-iperereza-ryigenga-ku-rupfu-rwa","status":"publish","type":"post","link":"https:\/\/bwiza.com\/?p=34170","title":{"rendered":"Imiryango 37 yandikiye Commonwealth isaba iperereza ryigenga ku rupfu rwa Kizito Mihigo"},"content":{"rendered":"

Imiryango 37 iharanira inyungu z\u2019abaturage (sosiyete sivile) yo mu bihugu bitandukanye ku Isi, kuri uyu wa 8 Werurwe 2021 yandikiye abakuru b\u2019ibihugu by\u2019umuryango mpuzamahanga w\u2019ibihugu bikoresha ururimi rw\u2019Icyongereza (Commonwealth) isaba ko hakorwa iperereza ryigenga, ritabogamye kandi rifatika ku rupfu rw\u2019umuhanzi Kizito Mihigo.<\/strong><\/p>\n

Iyi miryango irimo Human Rights Watch, Amnesty International na Robert F. Kennedy Human Rights n\u2019indi ikorera mu Bufaransa, Australia, Kenya, Ethiopia, Sierra Leone, Guinea, Sudani y\u2019Epfo. Afurika y\u2019Epfo, ku mugabane wa Amerika ndetse na Aziya.<\/p>\n

Yagize iti: \u201cUbwo za Leta zizihiza umunsi wa Commonwealth ndetse ziteguye inama y\u2019Abakuru b\u2019Ibihugu i Kigali muri Kamena, tubandikiye tubasaba gushyigikira ubu busabe kuri bagenzi banyu muri Leta y\u2019u Rwanda.\u201d<\/p>\n

Polisi y\u2019u Rwanda yatangaje ko Kizito Mihigo yapfiriye muri kasho ya Remera iherereye mu Karere ka Gasabo mu rukerera rwa tariki ya 17 Gashyantare 2020, yiyahuye, Urwego rw\u2019Igihugu rw\u2019Ubugenzacyaha (RIB) rwemeza ko yiyahuje amashuka, ndetse bishimangirwa n\u2019Ubushinjacyaha bw\u2019Igihugu nyuma y\u2019iperereza bwakoze. <\/p>\n

Iyi miryango ivuga ko kandi ingingo ya 4 y\u2019isezerano rya 3 rya Komisiyo ya Afurika y\u2019Uburenganzira bwa muntu ryatorewe i Banjul muri Gambia ku wa 18\/11\/2015, isaba ko mu gihe umuntu apfiriye muri kasho ya Leta, hakorwa iperereza ryigenga, rifatika kandi ritabogamye.<\/p>\n

Ivuga ko ibihugu bigize Commonwealth byagiranye amasezerano mu 2013 ashimangira indangagaciro n\u2019amahame shingiro birimo: kubahiriza uburenganzira bw\u2019ikiremwamuntu, ubwisanzure mu gutanga ibitekerezo, kugendera ku mategeko n\u2019uruhare rw\u2019imiryango iharanira inyungu z\u2019abaturage.<\/p>\n

Kuri iyi miryango, gukorera inama ya Commonwealth mu Rwanda hatabanje kuganirwa ku bibazo by\u2019uburenganzira bw\u2019ikiremwamuntu [imiryango] ivuga ku Rwanda, \u201cby\u2019umwihariko urupfu rwa Kizito Mihigo\u201d ngo byatera gushidikanya kuri aya masezerano.<\/p>\n

Kizito Mihigo yapfuye nyuma y\u2019iminsi ine atawe muri yombi mu Karere ka Nyaruguru, aho \u201cyashakaga kwambuka mu buryo bunyuranyije n\u2019amategeko, ajya mu Burundi\u201d, \u201cakekwaho kujya kwifatanya n\u2019imitwe y\u2019iterabwoba irwanya Leta\u201d nk\u2019uko RIB yabitangaje.<\/p>\n

Yari amaze umwaka n\u2019igice afunguwe by\u2019agateganyo ku mbabazi za Perezida. Kuva mu 2015 yari mu gihano cy\u2019igifungo cy\u2019imyaka 10 yari yarakatiwe nyuma yo guhamwa n\u2019ibyaha bine birimo: kurema umutwe w\u2019abagizi ba nabi n\u2019ubugambanyi bwo kugirira nabi ubutegetsi buriho. Nyuma yo kurekurwa, ntiyari yemerewe kujya hanze y\u2019igihugu, nk\u2019uko amategeko abiteganya.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n