{"id":34356,"date":"2021-03-15T07:01:09","date_gmt":"2021-03-15T07:01:09","guid":{"rendered":"https:\/\/new.bwiza.com\/2021\/03\/15\/rusesabagina-wikuye-mu-rubanza-sankara-kuri-perezida-wa-zambia-na-gitifu\/"},"modified":"2021-03-15T07:01:09","modified_gmt":"2021-03-15T07:01:09","slug":"rusesabagina-wikuye-mu-rubanza-sankara-kuri-perezida-wa-zambia-na-gitifu","status":"publish","type":"post","link":"https:\/\/bwiza.com\/?p=34356","title":{"rendered":"Rusesabagina wikuye mu rubanza, Sankara kuri Perezida wa Zambia na Gitifu ushinjwa amacakubiri; mu nkuru nyamukuru zaranze icyumweru yishize"},"content":{"rendered":"

Icyumweru gishize cyatangiye tariki ya 8 Werurwe 2021 cyaranzwe n\u2019amakuru atandukanye, arimo ay\u2019urubanza rwa Paul Rusesabagina, Sankara n\u2019abandi 19 rwari rukomeje, ayiswe ibihuha yavugaga kuri Perezida Magufuli, aya Gitifu uvugwaho kubiba amacakubiri mu bakozi ayoboye n\u2019ay\u2019ubuzima yerekeye icyorezo cya Covid-19.<\/strong><\/p>\n

Amakuru yakiranze ni akurikira:<\/p>\n

Rusesabagina yikuye mu rubanza rwe<\/strong><\/p>\n

Paul Rusesabagina ukurikiranweho ibyaha 9 by\u2019iterabwoba tariki ya 12 Werurwe 2021 yatangarije urukiko rukuru, urugereko rwihariye ruburanisha ibyaha by\u2019iterabwoba n\u2019ibyambukiranya imbibi ko yikuye mu rubanza kuko nta butabera yiteze.<\/p>\n

Ni urubanza rwari rutangiye kuburanishwa mu mizi nyuma y\u2019inzitizi n\u2019imbogamizi yari amaze igihe atanga, zigatuma rusubikwa.<\/p>\n

Amategeko avuga ko iyo umuburanyi yikuye mu rubanza, asigara aburanirwa n\u2019abamwunganira mu mategeko; mu gihe na bo batamuburanira, urukiko rukishyiriraho umunyamategeko umuburanira, urubanza rugakomeza kugeza rurangiye.<\/p>\n

Sankara yongeye gushimangira ko Perezida Lungu yafashije FLN<\/strong><\/p>\n

Nsabimana Callixte wamenyekanye nka Major Sankara tariki ya 12 Werurwe 2021 yongeye gushimangira ko Perezida wa Repubulika ya Zambia, Edgar Lungu, yateye inkunga umutwe witwaje wa FLN, anawusezeranya ubufasha mu guhirika ubutegetsi bw\u2019u Rwanda. Ngo bari baramwise \u2018Umubyeyi wa Batisimu\u2019 (Parrain wa Batisimu).<\/p>\n

Ni amagambo yasubiriyemo mu rubanza rwe n\u2019abandi 20 bareganwa ibyaha by\u2019iterabwoba rwabaye kuri uwo munsi, nyuma y\u2019itangazo Leta ya Zambia yasohoye muri Nyakanga 2020 ivuga ko \u201cibyo yavuze atari ukuri\u201d ko yabeshyeye Perezida Lungu.<\/p>\n

Muri Nyakanga 2020, Sankara yatangarije urukiko ko Perezida Lungu yahaye Rusesabagina nk\u2019umuyobozi w\u2019ihuriro MRCD-Ubumwe FLN ishamikiyeho, amadolari ya Amerika 150,000. Yagize ati: \u201cNone se Rusesabagina yahagarara hano agahakana ko ataziranye na Perezida Edgar Lungu?\u201d<\/p>\n

Gitifu arashinjwa kubiba amacakubiri mu bakozi<\/strong><\/p>\n

Abakozi 13 bo mu Murenge wa Cyato mu Karere ka Nyamasheke, tariki ya 8 Werurwe 2021 bandikiye Umunyamabanga Nshingwabikorwa w\u2019Akarere bamumenyesha amakosa 6 y\u2019Umunyamabanga Nshingwabikorwa w\u2019umurenge wabo, Ndanga Janvier, ngo “akora agamije kubacamo ibice no kubategekesha igitugu”.<\/p>\n

Muri aya makosa bavuzemo: guteranya abakozi, kubayoboza igitugu, kubatuka, guhunga inshingano ze nk\u2019umuyobozi, kudaha abakozi ibyo bemerewe no kubateranya n\u2019abaturage; yose bagenda basobanura uko yayakoze.<\/p>\n

BWIZA yashatse kumenya icyo Gitifu Ndanga avuga kuri iki kirego, ntiyasubiza, ibaza Gitifu w\u2019Akarere wandikiwe iyi baruwa ntiyasubiza, Visi Meya ushinzwe ubukungu na we bivugwa ko azi iki kibazo ndetse na Meya w\u2019Akarere, ntibasubije.<\/p>\n

Perezida Kagame n\u2019umufasha batewe urukingo rwa Covid-19<\/strong><\/p>\n

Perezida wa Repubulika y\u2019u Rwanda, Paul Kagame n\u2019umufasha we Jeannette Kagame batewe urukingo rwa Covid-19 ku munsi wa gatandatu w\u2019ikingira, tariki ya 11 Werurwe 2021.<\/p>\n

Ni igikorwa cyabereye ku bitaro byitiriwe Umwami Faisal, muri gahunda y\u2019ikingira yatangiye hirya no hino mu gihugu tariki ya 5 Werurwe 2021.<\/p>\n

Perezida Kagame n\u2019umufasha we bakingiwe nyuma ya Minisitiri w\u2019Ubuzima w\u2019u Rwanda, Dr. Ngamije Daniel wakingiriwe ku bitaro bya Masaka ku munsi wa mbere w\u2019ikingira.<\/p>\n

Byavuzwe ko Magufuli arembye, Guverinoma ibyamaganira kure<\/strong><\/p>\n

Tariki ya 9 Werurwe 2021 abatavuga rumwe na Leta ya Tanzania barimo umunyapolitiki Tundu Lissu batangaje ko Perezida w\u2019iki gihugu, Dr. John Pombe Magufuli arwaye icyorezo cya Covid-19, ko yajyanwe kuvurirwa mu bitaro by\u2019i Nairobi muri Kenya.<\/p>\n

Aya makuru yakomeje kuvugwa n\u2019ibitangazamakuru bitandukanye birimo na mpuzamahanga, Tundu Lissu abwira Ibiro Ntaramakuru by\u2019Abongereza (Reuters) ko ibitaro bya Nairobi byananiwe kuvura Perezida Magufuli, yoherezwa mu Buhinde.<\/p>\n

Gusa aya makuru yanyomoje na Minisitiri w\u2019Intebe wa Tanzania, Kasimu Majaliwa, avuga ko Perezida Magufuli umaze iminsi irenga 10 atagaragara mu ruhame ari muzima, ubu afite akazi kenshi; ahugiye muri dosiye zituma atagaragara.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n