{"id":34370,"date":"2021-03-15T08:50:55","date_gmt":"2021-03-15T08:50:55","guid":{"rendered":"https:\/\/new.bwiza.com\/2021\/03\/15\/covid-19-museveni-yavuze-ko-we-n-umufasha-batarafata-urukingo-kuko-hari\/"},"modified":"2021-03-15T08:50:55","modified_gmt":"2021-03-15T08:50:55","slug":"covid-19-museveni-yavuze-ko-we-n-umufasha-batarafata-urukingo-kuko-hari","status":"publish","type":"post","link":"https:\/\/bwiza.com\/?p=34370","title":{"rendered":"Covid-19: Museveni yavuze ko we n\u2019umufasha batarafata urukingo, kuko hari abarukeneye kubarusha"},"content":{"rendered":"

Perezida wa Repubulika ya Uganda, Yoweri Kaguta Museveni, kuri uyu wa 14 Werurwe 2021 yavuze ko we n\u2019umufasha we Janet Museveni batarafata urukingo rwa Covid-19 kuko hari abarukeneye cyane kubarusha.<\/strong><\/p>\n

Ni bumwe mu butumwa yatangiye mu ijambo yaraye agejeje ku Bagande, asubiza by\u2019umwihariko bamwe bashinja umuryango we gufata uru rukingo mbere y\u2019abandi, mu ibanga rikomeye.<\/p>\n

Perezida Museveni yagize ati: \u201cNtabwo ndakingirwa, yewe na Janet Museveni ntarakingirwa kubera ko twifuje ko abantu bafite ibyago (byo kwandura no kuzahazwa na Covid-19) baruhabwa mbere.\u201d<\/p>\n

Tariki ya 23 Gashyantare 2021, igitangazamakuru Daily Monitor gishingiye ku makuru y\u2019ikindi cyitwa The Wall cyo muri Leta Zunze Ubumwe z\u2019Amarika, cyatangaje ko Perezida Museveni n\u2019umuryango we bahawe urukingo rwa Covid-19 rwitwa Sinopharm rwakorewe mu Bushinwa, mu ibanga ndetse kiranabanenga.<\/p>\n

Ni inkuru yababaje bamwe mu Bagande bibazaga uburyo Umukuru w\u2019Igihugu n\u2019umuryango we baba barikunze, birengagije abantu \u201cbababaye\u201d babarusha ibyago byo kwandura no kuzahazwa n\u2019iki cyorezo.<\/p>\n

Tariki ya 8 Werurwe 2021 ubwo yagezaga ku Bagande ubutumwa bwe kuri uwo munsi mpuzamahanga wahariwe uburenganzira bw\u2019abagore, Perezida Museveni yahakanye aya makuru, yongeraho ko agiye kujyana mu nkiko Daily Monitor.<\/p>\n

Perezida Museveni yagize ati: \u201cMu gihe cyavuba ngiye kubona amafaranga mu ishyaka ryanjye yo gukurikirana Daily Monitor kuko bavuze ko nihishe n\u2019umugore wanjye, tukikingiza Covid-19 mu ibanga. Namaze gushyikiriza urukiko ikirego. [\u2026] Ngo ndi umugabo wikunda, wihisha njye n\u2019umugore wanjye tukikingira nyamara abandi Bagande bari mu bibazo?\u201d<\/p>\n

Kuri uyu wa 14 Werurwe, Perezida Museveni yagarutse ku kibazo cye na Daily Monitor yamushinje kwikingira mu ibanga, avuga ko ashobora kuyibabarira ari uko ibanje gukora inkuru isaba imbabazi, ikayishyira ku rupapuro rwayo rw\u2019imbere (Front Page).<\/p>\n

Yagize ati: \u201cDaily Monitor bagomba gusabira imbabazi ku rupapuro rw\u2019imbere kubera ko bavuze ko nakingiwe mu ibanga, abantu banjye bakiri mu bibazo. Bavuze ko nikunda. Bagomba kunsabira imbabazi mu rwandiko runini ku rupapuro rwabo rw\u2019imbere.\u201d<\/p>\n

Binyuze muri gahunda ya Covax, Uganda yakiriye inkingo 864,000 za AstraZeneca tariki ya 5 Werurwe 2021. Minisiteri y\u2019Ubuzima yerekana ko kuva tariki ya 10 (umunsi wa mbere w\u2019ikingira) kugeza tariki ya 13, muri iki gihugu hamaze gukingirwa abantu 1,215.<\/p>\n

Umuyobozi Mukuru muri Uganda bizwi ko yakingiwe iki cyorezo, ni Minisitiri w\u2019Ubuzima, Dr. Jane Ruth Aceng watangirije iki gikorwa ku rwego rw\u2019igihugu mu bitaro bikuru bya Mulago, ku munsi wa mbere.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n