{"id":34527,"date":"2021-03-21T07:24:04","date_gmt":"2021-03-21T07:24:04","guid":{"rendered":"https:\/\/new.bwiza.com\/2021\/03\/21\/musanze-umuryango-w-abantu-10-wakuwe-mu-mutungo-ku-ngufu-nyuma-y-igihe-kirekire\/"},"modified":"2021-03-21T07:24:04","modified_gmt":"2021-03-21T07:24:04","slug":"musanze-umuryango-w-abantu-10-wakuwe-mu-mutungo-ku-ngufu-nyuma-y-igihe-kirekire","status":"publish","type":"post","link":"https:\/\/bwiza.com\/?p=34527","title":{"rendered":"Musanze: Umuryango w\u2019abantu 10 wakuwe mu mutungo ku ngufu, nyuma y\u2019igihe kirekire utakambira Leta"},"content":{"rendered":"

Umuryango wa Kajyambere Silas ugizwe n\u2019abantu 10 wari utuye mu Mudugudu wa Susa, Akagari ka Ruhengeri, Umurenge wa Muhoza mu Karere ka Musanze, tariki ya 16 Werurwe 2021 wakuwe mu kibanza kirimo inzu ebyiri ku ngufu nyuma y\u2019igihe kirekire utakambira Leta nyuma y\u2019akarengane wagiriwe.<\/strong><\/p>\n

Intandaro y\u2019ibi bibazo ni agace k\u2019ikibanza nimero UPI: 04\/03\/08\/04\/3628 Kajyambere wavutse mu 1958 yagurishije umuturanyi we witwa Manene Ladislas tariki ya 29 Gicurasi 2013 kuri 1,100,000 rwf, na we tariki ya 15 Gicurasi 2015 akakigurisha Umuholandi witwa Hendrik Noordam Jan wari uhagarariwe n\u2019uwari umugore we Igitangaza Anne Marie atarakora \u2018mutation\u2019, igihe \u2018mutation\u2019 yakorewe kuri Hendrik akandikwaho iki kibanza cyose hadakozwe icyitwa \u2018sub-division\u2019.<\/p>\n

\"kajyambe.jpg\"<\/p>\n

Inkuru bifitanye isano https:\/\/bwiza.com\/?Rwabuze-gica-hagati-y-Abanyarwanda-babiri-n-Umuholandi-bapfa-ubutaka<\/p>\n

Sub-division ni igabwa [ry\u2019ubutaka], kikaba igikorwa kibaho kugira ngo abantu barenze umwe bagabane ubutaka, buri mwe agafata agace kamwe kakamwandikweho. Ni cyo cyagombaga gukorwa, ikibanza UPI: 04\/03\/08\/04\/3628 kikagabwamo kabiri, uruhande rumwe rugaherera kuri Hendrik, urundi umuryango wa Kajyambere wimuwemo rukawuhereraho.<\/p>\n

Manene waguze na Kajyambere na Igitangaza barabihamya<\/strong><\/p>\n

Ibi BWIZA yabihamirijwe na Manene (waguze ubutaka na Kajyambere) mu kiganiro cyo ku wa 16 Kanama 2020, Igitangaza waguze ubu butaka na Manene atarakora \u2018mutation\u2019, mu izina rya Hendrik ndetse n\u2019abaturanyi b\u2019umuryango wa Kajyambere Silas.<\/p>\n

Manene yasobanuriye iki gitangazamakuru ko ubundi yaguze ibibanza nimero: UPI: 04\/03\/08\/3634, UPI: 04\/03\/08\/3635, UPI: 04\/03\/08\/3627 n\u2019aka gace k\u2019icya Kajyambere nimero UPI: 04\/03\/08\/3628; byose hamwe bifite ubuso bwa metero 30 kuri 30, atanga amafaranga y\u2019u Rwanda 6,000,000 Rwf, gusa ngo haje kuba ikibazo ubwo Hendrik yanze kwemera ko hari agace Kajyambere agomba kugumana.<\/p>\n

Yagize ati: “Naguze ikibanza kirimo abantu bane, kingana na metero 30 kuri 30 nk\u2019uko akarere kahapimye. Umuzungu araza, ati ngurisha ubu butaka, ndabumugurisha. Umuzungu ati ko none nashakaga kubaka, ati ni ukumpinduriza, nti njyewe rero ntabwo nari nagahinduje n\u2019abo naguze nabo, ahubwo reka tubasabe kuko bari baje mu bagabo b\u2019ubwo bugure. Twaje kubona tubona umuzungu atangiye kubaka.”<\/p>\n

Manene yavuze ko haje kuba ikibazo cy\u2019amakimbirane hagati ya Hendrik na Igitangaza ndetse baza gutandukana nk\u2019umugabo n\u2019umugore, baburana iyi mitungo bari baraguze; Umuholandi avuga ko ari ye, umugore na we avuga ko ari iye. Ati: \u201cNyuma y\u2019aho hajemo imanza z\u2019umugore w\u2019uwo muzungu (Igitangaza), bijya mu nkiko, bigeze aho Kajyambere ati ko muri mu manza z\u2019ubu butaka, ko ntari nabona icyangombwa cyanjye, mwampaye icyangombwa cy\u2019iki gisate cyanjye, umugore ati reka imanza zirangire, nzakiguha.”<\/p>\n

Urukiko Rukuru rwa Musanze rwagiye aho iki kibanza giherereye ruhacira urubanza. Manene Ladislas avuga ko icyo gihe yari mu batangabuhamya, yereka urukiko ubutaka yaguze. Urukiko rwanzuye ko Igitangaza waburanaga na Hendrik atsinzwe, ategekwa gusubiza ubu butaka uyu Muholandi babanye nk\u2019umugore n\u2019umugabo mu gihe cy\u2019imyaka itatu.<\/p>\n

\"Iki
Iki kibanza kirimo inzu ebyiri<\/figcaption><\/figure>\n

Manene avuga ko we, umuyobozi w\u2019Umudugudu n\u2019Umunyamabanga Nshingwabikorwa w\u2019Akagari ka Ruhengeri bageze kuri ubu butaka, banzura ko Hendrik Noordam agomba gufata metero 30\/30 yaguze miliyoni 6 z\u2019amafaranga y\u2019u Rwanda, igice gisigaye kuri cya kibanza nimero UPI: 04\/03\/08\/3628 akakirekera Kajyambere. Icyo gihe ngo bateguye umunsi Kajyambere na Hendrik bazagira ku biro byAkarere, buri wese akandikwaho igice cye.<\/p>\n

Manene ati: “Nyuma y\u2019aho rero ku murenge bongeye kumpamagara, bati umuzungu ari gusaba ubwo butaka bwose. Tujya ku murenge, ndabisobanura, bumvisha umuzungu ko agomba gusigarana metero 30\/30, ati reka da ubutaka bwose ni ubwanjye!”<\/p>\n

Igitangaza na we uvuga ko yarenganyijwe na Hendrik wari umugabo we, tariki ya 19 Kanama 2020 yabwiye iki gitangazamakuru ko Kajyambere arengana, avuga ko ikibanza cyaguzwe ari icyubatsemo akabari kitwa \u2018Susa Gardens\u2019, icyo uyu musaza atuyemo cyo kitigeze kigurwa. Ati; \u201cMu byukuri koko, umusaza arimo ararengana nk\u2019uko nanjye narenganye. Banyatse ibyanjye, banyirukanamo, none badukiriye n\u2019umusaza. Nta giceri cy\u2019atanu bamuhaye, ntibamuguriye, nanjye sinahaguze, ndemeza neza ko twamuguriye agace kamwe, kubatsemo iriya nzu (Susa Gardens) akandi gace yasigaye agatuyemo.”<\/p>\n

Bwiza yandikiye Hendrik ku mirongo ye y’itumanaho ishaka kumenya icyo avuga kuri iki kibazo, ariko ntiyigeze asubiza.<\/p>\n

Ubuhamya bwabo bwabaye imfabusa, abahesha b\u2019inkiko basimburana bateguza Kajyambere ngo ave mu kibanza<\/strong><\/p>\n

Umuhesha w\u2019inkiko Me Gaterura Justin abisabwe na Hendrik wari watsinze urubanza yaburanagamo na Igitangaza, urukiko rukemeza ko imitungo Manene yabagurishije ari iye; tariki ya 15 Werurwe 2019 abinyujije mu nyandiko, yamenyesheje Kajyambere ko agomba kuva muri iki kibanza mu gihe kitarenze iminsi 15, atabikora hakazifashishwa ingufu za Leta.<\/p>\n

Kajyambere n\u2019umuryango we batarava muri iki kibanza, Me Gaterura yaje kubivamo atararangiza urubanza (ni icyemezo cyari gutanga uburenganzira bwo kuvana mu mutungo abawurimo), nyuma yo kubona ko \u201cirangizarubanza ryaba ridakurikije amategeko\u201d kuko ngo ntabwo urukiko rwigeze rutegeka ko Kajyambere ava muri iyi mitungo.<\/p>\n

Hendrik yashatse undi muhesha w\u2019inkiko, ari we Me Mukasa Frodouald amusaba kurangiza uru rubanza kugira ngo iki kibanza cyose kimwegurirwe. Uyu munyamategeko tariki ya 27 Gahyantare 2020 yamenyesheje Kajyambere ko tariki ya 6 Werurwe 2020 agomba kuba yavuye muri iki kibanza, atabikora agakurwamo n\u2019ingufu za Leta.<\/p>\n

Kajyambere yanze kuvamo, Me Mukasa yongera kumumenyesha tariki ya 10 Kanama 2020 ko agomba kuvamo biterenze tariki ya 13 Kanama nabwo birananirana, uyu munyamategeko ajya aho uyu musaza yari atuye kurangiza urubanza ariko umuryango we n\u2019abaturanyi basa n\u2019abigaragambya, we n\u2019inzego zishinzwe umutekano zari zije kuvana umuryango mu mitungo bataha batabikoze.<\/p>\n

Me Mukasa na we yabivuyemo, Hendrik yitabaza undi muhesha w\u2019inkiko witwa Me Kwizera Darius wandikiye Kajyambere tariki ya 11 Werurwe 2021 amumenyesha ko agomba kuva muri uyu mutungo bitarenze tariki ya 15 Werurwe 2021, bitaba ibyo ugakurwamo n\u2019ingufu za Leta. Kera kabaye, byashyizwe mu bikorwa tariki ya 16 Werurwe 2021, inzugi n\u2019amadirishya bivanwa mu nzu babagamo, ibikoresho byabo byose bisohorwa hanze, bishyira mu gahanda kahegereye.<\/p>\n

Umuryango wa Manene ugizwe n\u2019abantu batanu wabaga mu nzu imwe, undi muryango ni uw\u2019umuhungu we witwa Habineza Aphrodis na wo ugizwe n\u2019abantu batanu wabaga mu yindi nzu; zombi ziri muri iki kibanza, kuva uwo munsi iri gucumbika mu baturanyi.<\/p>\n

Bakuwe muri iki kibanza kandi mu gihe bamaze kurega Hendrik, kugira ngo iki kibanza babagamo gikatwe kuri iki gifite nimero UPI: 04\/03\/08\/3628. Umwanzuro w’inama ntegurarubanza rwabo uzasomwa tariki ya 4 Gicurasi 2021.<\/p>\n

\"img-20210320-wa0019_1.jpg\"<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n