{"id":34534,"date":"2021-03-19T20:38:47","date_gmt":"2021-03-19T20:38:47","guid":{"rendered":"https:\/\/new.bwiza.com\/2021\/03\/19\/ubwumvikane-buke-hagati-y-abafatanyabikorwa-bwadindije-itangira-ry-inyubako-ya\/"},"modified":"2021-03-19T20:38:47","modified_gmt":"2021-03-19T20:38:47","slug":"ubwumvikane-buke-hagati-y-abafatanyabikorwa-bwadindije-itangira-ry-inyubako-ya","status":"publish","type":"post","link":"https:\/\/bwiza.com\/?p=34534","title":{"rendered":"Ubwumvikane buke hagati y\u2019abafatanyabikorwa bwadindije itangira ry\u2019inyubako ya Bazilika ya Kibeho"},"content":{"rendered":"

Ubwumvikane buke hagati ya Fondasiyo (Fondation) ‘Our Lady of Kibeho’ igizwe n\u2019Abakirisitu b\u2019Abanyamerika bifuzaga gutera inkunga umushinga wo kubaka kiliziya nini (Bazilika) yitiriwe Bikira Mariya Nyina wa Jambo i Kibeho na Diyoseze Gatolika ya Gikongoro, bwatumye umushinga wo kuyubaka wagombaga gutangira mu ntangiriro za 2020 udindira.<\/strong><\/p>\n

Madame Ilibagiza Immacul\u00e9e, umukirisitu w\u2019Umunyarwanda uba muri Leta Zunze Ubumwe za Amerika (USA), akaba anakuriye fondasiyo igomba gukusanya amafaranga mu Bakirisitu b\u2019Abanyamerika bakunda Bikira Mariya, avuga ko nyuma yo gusohora igishushanyo mbonera, magingo aya umushinga usa nk\u2019uwahagaze kubera ko abo baterankunga bifuza guhita bashyira mu bikorwa icyo gishushanyo, Diyoseze ikababuza. <\/p>\n

Diyoseze ya Gikongoro ihagarariwe na Musenyeri C\u00e9l\u00e9stin Hakizimana, yo ishaka ko iki gishushanyo kivugururwa, kikajyana n\u2019imyememere y\u2019Abakirisitu bo mu Rwanda, kigakorwa n\u2019Abanyarwanda kandi Abakirisitu b\u2019Abanyarwanda bakaba ari bo baza imbere mu kugishyira mu bikorwa.<\/p>\n

Ilibagiza yagize ati: \u201cNyuma yo gusohora igishushanyo mbonera cyakozwe n\u2019inzobere ihereye ku bitabo byanditswe ku mabonekerwa y\u2019i Kibeho, twifuje guhita dushaka inkunga, imirimo yo kubaka igatangira. Ubu batubujije gukomeza kuko banatwangiye gupima ubutaka ngo tumenye neza inyubako ihakwiye.\u201d <\/p>\n

Ilibagiza yongeraho ko Diyosezi itigeze ibasaba kuvugurura igishushanyo mbonera ngo ahubwo hari \u201cMemo\u201d (inyandiko) Diyoseze yabasabye kubanza gusinya. Ariko iyo \u201cMemo\u201d ngo ntiranozwa ngo ijye ahagarara nk\u2019uko Musenyeri Hakizimana abivuga.<\/p>\n

Musenyeri Hakizimana we avuga ko hakiri igihe ngo imirimo yo kubaka itangire kuko ngo n\u2019igishushanyo mbonera kitararangira. Yagize ati: \u201cNi umushinga wa Kiliziya nini yasabwe na Bikira Mariya. Ubu ababyize barimo gushushanya uko izaba imeze… Biracyari muri ‘design’. Kiriya mubona cyakozwe n\u2019Umunyamerika utazi ukuri k\u2019u Rwanda, utazi ukuntu Kiliziya ziba zimeze. Kiliziya ntizubakwa nk\u2019inzu zose. Twamwandikiye tumwereka Kiliziya ifasha Abanyarwanda uko iba imeze..(..).. Ubu ari gukosora..(..).. Devis izakorwa n\u2019Abanyarwanda… Haracyari igihe.\u201d <\/p>\n

\"img-20210319-wa0037.jpg\"<\/p>\n

Umuyobozi w\u2019akarere ka Nyaruguru wungirije ushinzwe Ubukungu n\u2019Iterambere, Janvier Gashema, avuga ko ubwo bwumvikane buke hagati y\u2019Abafatanyabikorwa atari abuzi. <\/p>\n

Visi Meya Gashema yongeyeho ko kuganira ari byo bivamo \u201cproduct\u201d nzima. Yagize ati: \u201cNi umushinga twishimiye nk\u2019ubuyobozi bw\u2019akarere. Ariko iyo abantu bari mu bikorwa birashoboka ko hari icyo badahuza. Kuganira ni byo bivamo urubuto rwiza kuko bombi ni abafatanyabikorwa b\u2019akarere beza. Ubwo turabimenye.\u201d<\/p>\n

Umwe mu basesengura imikorere ya Kiliziya Gatolika avuga ko ikibazo nyamukuru ari uko Kiliziya ishaka kwisanzura muri icyo gikorwa naho Abakirisitu b\u2019Abanyamerika bakaba bashaka kumenya uko inkunga batanga izakoreshwa.<\/p>\n

Nk\u2019uko igishushanyo mbonera cyakozwe ku nkunga ya Fondatiyo ‘Our Lady of Kibeho’ cyabiteganyaga, imirimo yo kubaka yagombaga gutangira mu ntangiriro za 2020 ikarangira muri 2022. Yagombaga kuba igizwe na kiliziya ebyiri: imwe yakira abantu 7,000 bicaye, indi ijyamo 1,200, icyanya kiri hanze ariko gisakaye cyakira abantu 100,000 na hoteli izajya ivamo amafaranga yo kwita kuri Kiliziya (maintenance). <\/p>\n

Ibi byose hamwe byagombaga gutwa amadolari ya Amerika ($) asaga miliyoni 50. Iyi Fondasiyo ni na yo kandi yatanze amafaranga yo kuvugurura inyubako z\u2019ishuri ryisumbuye rya Kibeho ryitiriwe Bikira Mariya Nyina wa Jambo. Byatwaye asaga miliyoni 4 $. Amakuru ava ahantu hizewe avuga kandi ko iriya shapele (chapelle) iri i Kibeho ubu ngubu, atari yo Bikira Mariya yari yasabye. Ngo igomba kuvugururwa.<\/p>\n

\"img-20210319-wa0036.jpg\"<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n