{"id":34592,"date":"2021-03-22T07:01:11","date_gmt":"2021-03-22T07:01:11","guid":{"rendered":"https:\/\/new.bwiza.com\/2021\/03\/22\/impinduka-muri-guverinoma-urupfu-rwa-magufuli-n-ishyaka-rishya-mu-nkuru\/"},"modified":"2021-03-22T07:01:11","modified_gmt":"2021-03-22T07:01:11","slug":"impinduka-muri-guverinoma-urupfu-rwa-magufuli-n-ishyaka-rishya-mu-nkuru","status":"publish","type":"post","link":"https:\/\/bwiza.com\/?p=34592","title":{"rendered":"Impinduka muri Guverinoma, urupfu rwa Magufuli n\u2019ishyaka rishya; mu nkuru nyamukuru zaranze icyumweru gishize"},"content":{"rendered":"

Icyumweru gishize cyatangiye tariki ya 15 Werurwe 2021 cyaranzwe n\u2019amakuru atandukanye, arimo arebana n\u2019ubuzima na politiki. Ni cyo cyumvikanyemo inkuru y\u2019urupfu rwa Dr Magufuli wayoboye Tanzania, cyumvikanyemo koroshywa kw\u2019ingamba zo kwirinda Covid-19 n\u2019impinduka muri guverinoma y\u2019u Rwanda.<\/strong><\/p>\n

Izi ni inkuru nyamukuru zakiranze:<\/p>\n

Impinduka zikomeye muri Guverinoma<\/strong><\/p>\n

Perezida wa Repubulika y\u2019u Rwanda, Paul Kagame tariki ya 15 Werurwe 2021 yakoze impinduka zikomeye muri guverinoma, avanamo umwe, undi amuhindurira imirimo, ashyiramo babiri bashya.<\/p>\n

Uwavanwemo ni Prof. Shyaka Anastase wari Minisitiri w\u2019Ubutegetsi bw\u2019Igihugu, akaba yarasimbujwe Gatabazi Jean Marie Vianney wari Guverineri w\u2019Intara y\u2019Amajyaruguru.<\/p>\n

Soraya Hakuziyaremye wari Minisitiri w\u2019Ubucuruzi n\u2019Inganda yahawe inshingano ya Guverineri Wungirije wa Banki Nkuru y\u2019Igihugu, muri Guverinoma asimbuzwa Beatha Habyarimana.<\/p>\n

Urupfu rwa Magufuli<\/strong><\/p>\n

Samia Suluhu wari Visi Perezida wa Tanzania tariki ya 17 Werurwe 2021 yatangaje ko Dr John Pombe Magufuli wari Umukuru w\u2019Igihugu yiciwe n\u2019indwara y\u2019umutima mu bitaro by\u2019i Dar es Salaam mu masaa kumi n\u2019ebyiri y’umugoroba.<\/p>\n

Iyi nkuru y\u2019incamugongo by\u2019umwihariko ku baturage ba Tanzania, yamenyekanye nyuma y\u2019amakuru yiswe ibihuha yari amaze iminsi acicikana avuga ko Dr Magufuli yaba arembeye mu bitaro byo muri Kenya, aho yaba arwaye Covid-19.<\/p>\n

Nk\u2019uko itegekonshinga rya Tanzania ribiteganya, Samia Suluhu ni we waje kurahirira inshingano zo kuyobora iki gihugu kugeza mu 2025 ubwo manda Dr Magufuli yari yaratorewe izaba irangiye, naho umuhango wo gusezera bwa nyuma kuri nyakwigendera uteganyijwe tariki ya 25 Werurwe.<\/p>\n

Ishyaka rishya mu Rwanda<\/strong><\/p>\n

Tariki ya 16 Werurwe 2021, umushakashatsi, umusesenguzi akaba n\u2019umunyamakuru; Dr Christopher Kayumba yatangaje ko yashinze ishyaka rya politiki riharanira demukarasi, RPD (Rwandese Platform for Democracy).<\/p>\n

Mu itangazo yageneye abanyamakuru kuri uwo munsi, Dr Kayumba yavuze ko iri shyaka rigamije gukemura ibibazo birimo: ubukene, ubusumbane, akarengane, urugomo rw\u2019abitwaje intwaro; rikaba rigamije gutanga umusanzu muri demukarasi, ubwisanzure, umutekano n\u2019amahoro arambye mu Rwanda.<\/p>\n

Iri shyaka Dr Kayumba yarishinze nyuma y\u2019igihe gito afunguwe, aho yari amaze umwaka afungiwe ibyaha birimo guteza imvururu ku kibuga cy\u2019indege, na nyuma yo kwandikira Umukuru w\u2019Igihugu amumenyesha ibibazo byatewe n\u2019ingaruka za Covid-19 bikwiye gushakirwa umuti.<\/p>\n

RPD ntabwo irandikwa mu mashyaka ya politiki abarizwa mu gihugu.<\/p>\n

Guma mu Karere yavuyeho<\/strong><\/p>\n

Inama y\u2019Abaminisitiri yateranye tariki ya 15 Werurwe 2021 yakuyeho gahunda ya Guma mu Karere yari yarashyizeho mu ntangiriro za Mutarama nk\u2019uburyo bwo kwirinda ikwirakwira ry\u2019icyorezo cya Covid-19; aho ingendo zihuza intara n\u2019umujyi wa Kigali zitari zemewe.<\/p>\n

Gusa habayeho umwihariko ku turere twa Gisagara, Nyanza na Bugesera; aho nta muntu wemerewe kutuvamo cyangwa se ngo atujyemo, bikaba byaratewe n\u2019uko twari dukomeje gukwirakwiza iki icyorezo.<\/p>\n

Iyi nama yoroheje izindi ngamba zirimo kongera amasaha y\u2019ingendo, yavuye kuri saa mbiri z\u2019ijoro agera kuri saa tatu z\u2019ijoro. Nk\u2019uko byari bisanzwe kandi, ingamba yo kudakora ingendo mbere ya saa kumi z\u2019igitondo yagumyeho.<\/p>\n

CSP Kayumba n\u2019abo bareganwa bashinjwe kwiba amafaranga y\u2019umufungwa<\/strong><\/p>\n

Urukiko rw\u2019Ibanze rwa Nyarugenge rwashinje CSP Kayumba Innocent wayoboraga Gereza ya Nyarugenge, SP Ntakirutimana Eric wari umwungirije na Ephrem Mutamaniwa wari ushinzwe iperereza kwiba amafaranga y\u2019umufungwa w\u2019Umwongereza ufungiwe muri iyi gereza.<\/p>\n

Inyandiko y\u2019uru rukiko BBC yabonye, ivuga ko aba bose batangiye kwiba amafaranga ku ikarita yifashishwa mu kubikuza no kugura \u2018Debit Card\u2019 guhera muri Nzeri 2020 kugeza muri Mutarama 2021, bakuraho amafaranga y\u2019u Rwanda arenga miliyoni 9.<\/p>\n

Urukiko rwavuze ko aba bayobozi ba gereza binjiye mu makuru ya mudasobwa y\u2019uyu mufungwa, bayifashisha bagura ibirimo telefone, ibiribwa n\u2019ibinyobwa, babifashijwemo n’umufungwa usanzwe azi iby\u2019ikoranabuhanga.<\/p>\n

Bahakanye ibyo baregwa, bavuga ko batazobereye iby\u2019ikoranabuhanga.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n