{"id":34628,"date":"2021-03-23T09:30:57","date_gmt":"2021-03-23T09:30:57","guid":{"rendered":"https:\/\/new.bwiza.com\/2021\/03\/23\/kagame-ayoboye-afurika-yakemura-ibibazo-byayo_magufuli-yasize-abivuze\/"},"modified":"2021-03-23T09:30:57","modified_gmt":"2021-03-23T09:30:57","slug":"kagame-ayoboye-afurika-yakemura-ibibazo-byayo_magufuli-yasize-abivuze","status":"publish","type":"post","link":"https:\/\/bwiza.com\/?p=34628","title":{"rendered":"Kagame ayoboye Afurika, yakemura ibibazo byayo_Magufuli yasize abivuze"},"content":{"rendered":"

Nyakwigendera Dr John Pombe Magufuli wayoboye Repubulika Yunze Ubumwe ya Tanzania, yasize avuze ko Perezida wa Repubulika y\u2019u Rwanda, Paul Kagame, ayoboye umugabane wa Afurika, yakemura ibibazo byawo.<\/strong><\/p>\n

Ni ijambo Dr Magufuli yavugiye imbere y\u2019abayobozi bakomeye muri Tanzania n\u2019abahagarariye ibihugu byabo tariki ya 8 Nyakanga 2018, ubwo yari amaze kwakira indege nshya ya Boeing 787-8 Dreamliner y\u2019ikigo cy\u2019ubwikorezi bwo mu kirere cya Air Tanzania, ku kibuga cy\u2019indege mpuzamahanga cyitiriwe Julius Nyerere.<\/p>\n

Icyo gihe, Dr Magufuli yabwiye abari bitabiriye uyu muhango ko Perezida Kagame ari we wamugiriye inama yo kubyutsa Air Tanzania yari imaze igihe kirekire idakora, amusobanurira ibyiza yageza ku gihugu, birimo guteza imbere ubukerarugendo. Yagize ati: \u201cReka nshimire Perezida Kagame. Yarambwiye ati \u2018wowe bikore. Nutinda ushobora kuzahura n\u2019imbogamizi zikomeye.\u201d<\/p>\n

Dr Magufuli yabwiye aba bayobozi bimwe mu bibazo bikizitiye iterambere ry\u2019umugabane wa Afurika birimo kuba ubukoloni bw\u2019ubu; aho ihora iteze amaboko ibiturutse hakurya yayo. Yahereyeho avuga ko Perezida Kagame ayoboye uyu mugabane, byose yabikemura neza.<\/p>\n

Yagize ati: \u201cNizeye ko Nyakubahwa Kagame abaye umuyobozi wacu wa Afurika, yakemura neza ibi bibazo. Yakemura neza ibibazo biri mu bihugu bya Afurika, yakemura neza ibibazo by\u2019ubukoloni bw\u2019ubu bukorwa n\u2019umuntu uturutse hanze ya Afurika, akazanira Abanyafurika ibibazo.\u201d<\/p>\n

Dr. Magufuli yavuze ko Perezida Kagame afite ubunararibonye, cyane ko yamenye ibibazo by\u2019Abanyarwanda, akabasha kubikemura. Ati: \u201cAzi ibibazo by\u2019Abanyarwanda, azi ibibazo bishobora kuzanwa n\u2019umuntu n\u2019ubwo yaba umwe gusa. Birashoboka ko ryaba ari itangazamakuru ritangaza cyangwa rikandika ikintu cyazana uruhuri rw\u2019ibibazo.\u201d<\/p>\n

Yakomeje ati: \u201cKagame arabizi, ubunararibonye bwe ni bunini, ni yo mpamvu njye nizera ko izina yanditse muri Afurika no kuba ari umuyobozi mwiza wa Afurika no kuba akunda urubyiruko rwa Afurika, ubwo bunararibonye bwageza ibihugu bya Afurika ku iterambere.\u201d<\/p>\n

Nyakwigendera yavuze ko Perezida Kagame amubwira ku iterambere rya Afurika, yamuganirije ku kintu cy\u2019ingenzi cyatuma uyu mugabane ubona ibisubizo by\u2019ibibazo ufite. Ngo ni uko urubyiruko rwakorana umwete kandi rukumva ko amahirwe rwabyaza umusaruro arwegereye.<\/p>\n

Ati: \u201cAriko yanganirije ikintu kimwe cy\u2019ingenzi, ko urubyiruko rugomba kumenya ko nta cy\u2019ubusa, ni ngombwa ko dukora akazi, twige gukunda akazi. Nitwiga gukora akazi, bizaba igusubizo cy\u2019ibibazo duhura nabyo. Dufite ibyanya bigari twabaza umusaruro, igikenewe ni uko urubyiruko rutekereza, hakorwe iki kijyanye n\u2019urubuga uriho? Ntidutekereze ko buri gihe wirukiye i Burayi, ari bwo uba ugiye kubona ibisubizo, birashoboka ko ibibazo byacu byakemurirwa hano hano muri Afurika, hifashishijwe amahirwe ya hano muri Afurika.\u201d<\/p>\n

Dr Magufuli aherutse kwica n\u2019indwara y\u2019umutima tariki ya 17 Werurwe 2021. Ni umuyobozi wa Tanzania wigaruriye imitima y\u2019Abanyarwanda cyane bitewe ahanini n\u2019uko u Rwanda ari cyo gihugu cya mbere yasuye kuva yajya ku butegetsi mu Gushyingo 2015. Byabaye tariki ya 6 Mata 2016, we na Perezida Kagame batashye ku mugaragaro ikiraro cya Rusumo n\u2019ibiro bya gasutamo byaho. Bakomereje i Kigali, yitabira itangira ry\u2019icyumweru cy\u2019icyunamo ndetse anasura urwibutso rwa jenoside yakorewe Abatutsi rwa Kigali, ku Gisozi.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n