{"id":34659,"date":"2021-03-24T09:03:35","date_gmt":"2021-03-24T09:03:35","guid":{"rendered":"https:\/\/new.bwiza.com\/2021\/03\/24\/uko-didier-drogba-yigeze-guhagarika-intambara-yari-imaze-igihe-muri-cote-d\/"},"modified":"2021-03-24T09:03:35","modified_gmt":"2021-03-24T09:03:35","slug":"uko-didier-drogba-yigeze-guhagarika-intambara-yari-imaze-igihe-muri-cote-d","status":"publish","type":"post","link":"https:\/\/bwiza.com\/?p=34659","title":{"rendered":"Uko Didier Drogba yigeze guhagarika intambara yari imaze igihe muri C\u00f4te d\u2019Ivoire"},"content":{"rendered":"

C\u00f4te d\u2019Ivoire ni igihugu kiri mu majyaruguru y\u2019uburengerazuba bw\u2019umugabane wa Afurika, kikaba iwabo w\u2019ibyamamare mu mupira w\u2019amaguru birimo: Yaya Tour\u00e9, Kolo Tour\u00e9, Emmanuel Ebou\u00e9, Didier Zokora na Didier Drogba wanditse amateka mu ikipe y\u2019igihugu na Chelsea mu Bwongereza.<\/strong><\/p>\n

Iki gihugu cyigeze gushegeshwa n\u2019intambara ishingiye ku makimbirane y\u2019abaturage bo mu majyepfo bari baharagariwe na Perezida Laurent Gbagbo n\u2019abo mu majyaruguru bari bahagarariwe n\u2019inyeshyamba za New Forces of Ivory Coast zari ziyobowe na Guillaume Soro.<\/p>\n

Nk\u2019uko BBC ibivuga, ibibazo byatangiye tariki ya 19 Nzeri 2000 ubwo inyeshyamba za Soro zatangiraga kugaba ibitero mu mijyi itandukanye igize C\u00f4te d\u2019Ivoire, intambara igenda ifata indi intera uko imyaka yagendaga itambuka.<\/p>\n

Iki gitangazamakuru kivuga ko intambara yabaye nk\u2019ihagaze mu mwaka w\u20192004, ariko bigeze mu 2005 yongera kubura. CNN ivuga ko kugeza mu Kwakira 2005, iyi ntambara yari imaze kugwamo abagera ku 4000, abarenga miliyoni imwe bamaze kuvanwa mu byabo.<\/p>\n

Mu bahunze iyi ntambara, harimo Sebastian Gnahore wari umukinnyi w\u2019umupira w\u2019amaguru. Yabwiye BBC uko yari ahangayikiye umuryango we yasize muri iki gihugu, ati: \u201cByari biteye ubwoba. Ubwo nahamagaye umukobwa wanjye, numvise amasasu hanze. Bose bihishe munzi y\u2019igitanda mu gihe cy\u2019iminsi ine, bagasohokamo gusa ari uko bagiye gushaka ibiryo. Icyo nahoraga ntekereza ni ukumenya niba umuryango wanjye umeze neza. Ni wo muhangayiko nagiraga buri gitondo.\u201d<\/p>\n

Drogba yashenguwe n\u2019ibyaberaga mu gihugu<\/strong><\/p>\n

Didier Drogba yashenguwe bikomeye n\u2019intambara yari ikomeje gufata intera muri C\u00f4te d\u2019Ivoire, ubwo yibukaga ubwiza iki gihugu cyari gifite, imibereho y\u2019abaturage yari myiza ndetse n\u2019ubumwe bari bafite mbere y\u2019umwaka w\u20192002.<\/p>\n

Drogba watangiye gukinira Chelsea mu 2004, yigeze kubwira Al Jazeera ati: \u201cNavuye muri C\u00f4te d\u2019Ivoire hateye hatya: yari nziza, imihanda yaho yari iteye ubwuzu, hose hari hatoshye kandi abaturage bari bishimye. Ubwo nagarukaga nyuma y\u2019imyaka mike, nabonye ibintu byarahindutse cyane. Icyo gihe natangiye kwibaza ibibazo.\u201d<\/p>\n

Ibibazo uyu mukinnyi yatangiye kwibaza ni ibyo kunga abashyamiranye muri C\u00f4te d\u2019Ivoire, akabasaba guhagarika intambara. Yabonaga amakimbirane hagati y\u2019abo mu majyepfo no mu majyaruguru adakwiye, mu gihe abakinnyi b\u2019ikipe y\u2019igihugu babasha gukinana bahuje intego, kandi bakomoka mu mpande zombi.<\/p>\n

Aho agakiza k\u2019abaturage ba C\u00f4te d\u2019Ivoire kashingiye<\/strong><\/p>\n

Umunsi mwiza kuri Drogba, abakinnyi bagenzi be n\u2019abaturage ba C\u00f4te d\u2019Ivoire utazibagirana mu mateka ni tariki ya 8 Ukwakira 2005 ubwo iyi kipe y\u2019igihugu yacakiranaga na Sudan mu irushanwa ryo gushaka itike y\u2019iry\u2019igikombe cy\u2019Isi ryagombaga kuba mu 2006.<\/p>\n

Uyu mukino wabereye kuri Sitade ya Omdurman yarimo abafana babarirwa mu 20,000, utangira saa kumi z\u2019umugoroba. C\u00f4te d\u2019Ivoire yari yitabaje abakinnyi 11 barimo Drogba, Boubacar Barry, Ebou\u00e9, Kolo Tour\u00e9, Abdoulaye Me\u00eft\u00e9, Blaise Kouassi, Zokora, Gilles Yapi-Yapo, Kanga Akal\u00e9, Abdoulaye Djir\u00e9 na Aruna Dindane.<\/p>\n

Uwo munsi icyizere cyo gukatisha itike cyari gisa n\u2019icyayoyotse kuri C\u00f4te d\u2019Ivoire, nyuma yo gutsindwa na Cameroun ubugira kabiri. Ku kabi n\u2019akeza, yo yagombaga gutsinda Sudan, ahasigaye igategereza kureba Cameroun inganya na Misiri; imikino yombi yaberaga rimwe.<\/p>\n

C\u00f4te d\u2019Ivoire yaje gutsinda Sudan ibitego 3 birimo icyatsinzwe na Akal\u00e9 ku munota wa 22 ndetse na bibiri byatsinzwe na Dindane; ku munota wa 51 n\u2019uwa 73. Sudan yo yatsinze kimwe cy\u2019impozamarira cya Haytham Tambai ku munota wa 89. Nk\u2019uko yabyifuzaga, Cameroun nayo yaje kunganya na Misiri igitego 1-1, biyiha amahirwe yo gukatisha itike y\u2019irushanwa ry\u2019igikombe cy\u2019Isi.<\/p>\n

\"drgb.jpg\"<\/p>\n

Ijambo rya Drogba ryacunguye abaturage<\/strong><\/p>\n

Ubwo C\u00f4te d\u2019Ivoire yari imaze gutsinda Sudan 3-1 na Cameroun inganyije na Misiri 1-1, abaturage bose ; baba abo mu majyaruguru y\u2019igihugu n\u2019abo mu majyepfo barimo n\u2019inyeshyamba zari mu gace ka Bouake zafataga nk\u2019umurwa mukuru wazo, babyinnye intsinzi.<\/p>\n

Muri uwo mwanya, Drogba na bagenzi be bari bageze mu rwambariro rwa Sitade Omdurman bahatigishije kubera ibyishimo, babyina bafatanye ku ntugu, maze bahamagara itangazamakuru.<\/p>\n

Drogba yafashe insakazamajwi (micro) ajya imbere y\u2019imfatashusho (camera)maze ahamagara ati: “Bagabo namwe bagore ba C\u00f4te d\u2019Ivoire, abo mu majyaruguru, mu majyepfo, hagati no mu burengerazuba. Uyu munsi twerekanye ko twese twabana, tugakinira hamwe duhuje umugambi, wo gushaka itike y\u2019igikombe cy\u2019Isi.”<\/p>\n

Yakomeje ati: “Twabasezeranyije ko kwizihirwa kwakunga abantu, uyu munsi tubinginze dupfukamye.” Icyo gihe abakinnyi bose bahise bapfukama, maze akomeza ati: “Igihugu kimwe cya Afurika gifite abaherwe benshi ntabwo gikwiye kujya mu ntambara. Turabingize, nimurambike intwaro zanyu, habe amatora. Turashaka kwishima, rero nimuhagarike kurasa imbunda zanyu.”<\/p>\n

Abari muri C\u00f4te d\u2019Ivoire bavuga ko nyuma y\u2019iri jambo nta sasu ryongeye kuvuga, ahubwo icyariho ari ukubyina insinzi, abantu banywa basabana mu buryo bwose bushoboka.<\/p>\n

Nyuma yo kubona impinduka zitewe n\u2019ijambo rye, Drogba yabwiye Al Jazeera ko byari birambiranye kujya mu kibuga, bakazengurukwa n\u2019ibitwaro biremereye mu gihe hari umunyacyubahiro witabiriye uwo mukino. Ati: “Mo imbere, twashakaga ko byose bihagarara. Mu gihe ukina, uzengurutswe na za roketi (rocket-launchers)\u2026yego ni umutekano wa Perezida ariko uri gukina hose zihari. Twifuzaga kongera gukinira mu mwuka utuje. Rero ubwo nyuma y\u2019umukino, umwe yanyongereye ambwira ko ari cyo gihe ngo dutange ubutumwa. Ubwo rero twahise dutungurana.”<\/p>\n

Kubera ijambo rya Drogba, Perezida Gbagbo na Soro mu ntangiriro 2007 basinye amasezerano y\u2019amahoro, batangaza ku mugaragaro ko intambara irangiye ndetse bemereanya ko hagiye gutegurwa amatora y\u2019Umukuru w\u2019Igihugu. Gusa byageze mu 2010 amatora ataraba, intambara yongera kwaduka.<\/p>\n

Drogba wari wakoze ibishoboka ngo abaturage babane mu mahoro, yasezeye ku mupira w\u2019amaguru mu mwaka w\u20192018 ubwo yakiniraga Phoenix Rising yo muri Leta Zunze Ubumwe za Amerika. Chelsea ni yo kipe yamazemo igihe kirekire kuko yayikiniye kuva mu 2004 kugeza mu 2012, arongera ayikinira kuva mu 2015 kugeza mu 2016 ; ayitsindira ibitego104 mu mikino 254.<\/p>\n

\"drog.jpg\"<\/p>\n

Amafoto: BBC<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n