{"id":35059,"date":"2021-04-08T11:25:02","date_gmt":"2021-04-08T11:25:02","guid":{"rendered":"https:\/\/new.bwiza.com\/2021\/04\/08\/loni-ishyira-rdc-ku-mwanya-wa-mbere-ku-isi-mu-bihugu-byugarijwe-n-inzara\/"},"modified":"2021-04-08T11:25:02","modified_gmt":"2021-04-08T11:25:02","slug":"loni-ishyira-rdc-ku-mwanya-wa-mbere-ku-isi-mu-bihugu-byugarijwe-n-inzara","status":"publish","type":"post","link":"https:\/\/bwiza.com\/?p=35059","title":{"rendered":"Loni ishyira RDC ku mwanya wa mbere ku Isi mu bihugu byugarijwe n’inzara"},"content":{"rendered":"

Igihugu cya Repubulika Iharanira Demokarasi ya Congo kiza imbere ku Isi mu bihugu byugarijwe n’ibura ry’ibiribwa, nk’uko byatangajwe n’Umuryango w’Abibumbye.<\/strong> <\/em><\/p>\n

Itangazo rigenewe abanyamakuru rihuriweho n’Ishami ry’Umuryango w’Abibumbye ryita ku buhinzi (FAO) ndetse n’Ishami ryita ku biribwa (WFP\/PAM), rivuga ko Abakongomani babarirwa muri miliyoni 27.3 bugarijwe n’ikibazo cy’inzara, barimo abagera kuri miliyoni 7 bakeneye ubufasha bwihuse bw’ibiribwa.<\/p>\n

FAO na PAM bakomeza bavuga ko byibura Umukongomani umwe muri batatu bugarijwe n’ikibazo cy’inzara.<\/p>\n

Ibi bigira Congo Kinshasa igihugu cya mbere ku Isi gifite “umubare munini w\u2019abantu bakeneye ubufasha bwihutirwa mu bijyanye n\u2019umutekano w\u2019ibiribwa.”<\/p>\n

Impamvu nyamukuru Loni itanga nk’izituma Congo Kinshasa yugarizwa n’inzara, ni intambara z’urudaca zimaze igihe zarayogoje ibice bitandukanye bya kiriya gihugu.<\/p>\n

Intara za Kivu y’Amajyaruguru n’iy’Amajyepfo, iya Tanganyika iri mu majyepfo ya kiriya gihugu n’iya Kasai iri rwagati mu gihugu ziri mu zugarijwe cyane.<\/p>\n

Indi mpamvu yatanzwe ni isubira inyuma ry’ubukungu bwa kiriya gihugu bwatewe n’icyorezo cya Virusi ya Corona.<\/p>\n

Loni ivuga ko “ababyeyi babuze uburenganzira ku butaka bwabo ndetse bahatiwe guhunga mu rwego rwo gukiza ubuzima bwabo, bityo bisanga abana babo barwara kubera kubura ibyo kurya.”<\/p>\n

WFP ivuga ko yahuye n’imiryango yagiye itahuka mu midugudu yayo igasanga amazu yayo yaratwitswe ndetse n’imyaka yarasahuwe burundu, ku buryo bamwe bahitamo gutungwa n’imizi y’ibiti ndetse n’amababi y’imyumbati.<\/p>\n

Abaturage bibasiwe cyane n\u2019inzara ni abavuye mu byabo, impunzi, abatahutse, imiryango yakiriye impunzi ndetse n\u2019abantu bahuye n\u2019ibiza (imyuzure, inkangu, inkongi y’umuriro) cyo kimwe n\u2019ingo zabapfakazi.<\/p>\n

FAO na WFP basaba ko hakenewe ubufasha bwihuse mu rwego rwo kurokora ubuzima bw’Abakongomani bugarijwe n’inzira.<\/p>\n

Aya mashami ya Loni yagereranyije RDC n’ibihugu byugarijwe n’inzara nka Syria, Iraq na Yemen.<\/p>\n