{"id":35061,"date":"2021-04-08T12:24:58","date_gmt":"2021-04-08T12:24:58","guid":{"rendered":"https:\/\/new.bwiza.com\/2021\/04\/08\/dr-clark-yavuze-ku-butabera-buzahabwa-rusesabagina-utacyitabira-urubanza\/"},"modified":"2021-04-08T12:24:58","modified_gmt":"2021-04-08T12:24:58","slug":"dr-clark-yavuze-ku-butabera-buzahabwa-rusesabagina-utacyitabira-urubanza","status":"publish","type":"post","link":"https:\/\/bwiza.com\/?p=35061","title":{"rendered":"Dr Clark yavuze ku butabera buzahabwa Rusesabagina utacyitabira urubanza"},"content":{"rendered":"

Tariki ya 12 Werurwe 2021 ni bwo Paul Rusesabagina ushinjwa ibyaha by\u2019iterabwoba yatangarije mu Rukiko Rukuru, Urugereko ruburanisha ibyaha mpuzamahanga n\u2019ibyambukiranya imbibi, ko atazongera kwitabira urubanza rwe kubera ko \u201cnta butabera yiteze\u201d.<\/strong><\/p>\n

Rusesabagina yafashe iki cyemezo ubwo Umucamanza yari amaze gutesha agaciro ubusabe bwe bw\u2019uko urubanza rwe rwasubikwa, rukazasubukurwa nyuma y\u2019amezi atandatu, ubwo azaba amaze gusesengura dosiye y\u2019ibyaha aregwa, ahamya ko ari ndende.<\/p>\n

Mu iburanisha ryakomeje tariki ya 24 Werurwe 2021, Rusesabagina ntiyabonetse mu rubanza nk\u2019uko yari yarabiteguje. Icyo gihe urukiko rwakiriye raporo y\u2019umuyobozi wa Gereza ya Nyarugenge afungiwemo, CSP Michel Kamugisha, irumenyesha ko uregwa atazongera kwitabira urubanza rwe, Inteko iburanisha yanzura ko rukomeza.<\/p>\n

Rusesabagina yabona ubutabera buboneye, atacyitabira urubanza<\/strong><\/p>\n

Dr Phil Clark, umwarimu wigisha isomo rya politiki mpuzamahanga mu ishuri rya Oriental and African Studies (SOAS), i Londres mu Bwongereza, akaba umwe mu bakurikirana amateka y\u2019u Rwanda, yaganiriye na Al Jazeera ayisesengurira niba byashoboka ko Rusesabagina yabona ubutabera buboneye mu gihe atitabira iburanisha.<\/p>\n

Uyu mwarimu avuga ko yizera ko Rusesabagina yahabwa ubutabera buboneye ashingiye ku buryo bamwe mu bakomeye mu gihe cya vuba bagiye baburanishwa mu Rwanda. Ati: \u201cAmateka ya vuba y\u2019abakomeye bakurikiranwe mu Rwanda yerekana ko Rusesabagina azabona ubutabera buboneye.\u201d<\/p>\n

Dr Clark yavuze ko abajyanama mu by\u2019amategeko ba Rusesabagina ndetse n\u2019imiryango mpuzamahanga iharanira uburenganzira bw\u2019ikiremwamuntu, byemeza ko \u201cubutabera buboneye mu Rwanda budashoboka\u201d ariko akavuga ko yagiye akurikiranira bya hafi uburyo abanyapolitiki batavuga rumwe n\u2019ubutegetsi ndetse n\u2019abakekwaho ibyaha bya jenoside bagiye bagezwa mu Rwanda, ati \u201cbyagaragaje ubutabera buboneye ku rwego rwo hejuru.\u201d<\/p>\n

\"ruses.png\"<\/p>\n

Yavuze ko indi mpamvu yerekana ko Rusesabagina azahabwa ubutabera buboneye ari uko urubanza rwe n\u2019abandi 20 bareganwa rutambuka ku rubuga rwa YouTube ruri kuba (live), rukaburanishwa mu rurimi rw\u2019Ikinyarwanda kandi rugasemurwa mu Cyongereza kugira ngo abanyamahanga bumve imiburanishirize yarwo, ati: \u201cBirerekana umucyo.\u201d<\/p>\n

Uyu mwarimu yavuze ko urubanza rwa Rusesabagina rwitabirwa kandi rugakurikiranwa n\u2019abantu batandukanye, barimo abadipolomate n\u2019abahagarariye imiryango itegamiye kuri Leta. Ati: \u201cMu cyumba cy\u2019iburanisha, niboneyemo \u2018ambasade z\u2019amahanga\u2019 ndetse n\u2019imiryango itegamiye kuri leta, bitabira buri munsi w\u2019urubanza. Kuri link ya videwo, biranashoboka ko abagenzuzi bo mu mahanga na bo bakurikirana buri buranisha.\u201d<\/p>\n

Rusesabagina yatawe muri yombi mu mpera za Kanama 2020, nk\u2019umuyobozi w\u2019ihuriro ry\u2019amashyaka ya politiki rya MRCD-Ubumwe rishamikiyeho umutwe witwaje intwaro wa FLN wigamye kugaba ibitero mu bice by\u2019uturere twa Nyamagabe na Nyagururu byegereye ishyamba rya Nyungwe mu mwaka w\u20192018, bigahitana ubuzima bw\u2019abaturage.<\/p>\n

Yafashe icyemezo cyo kutitabira urubanza ataraburana ibyaha aregwa kuko yabanje kuburana ku nzitizi yari yatanze y\u2019uko uru rukiko nta bubasha rufite rwo kumuburanisha, atanga indi y\u2019uko yambuwe uburenganzira bwo kunganirwa n\u2019abanyamategeko mpuzamahanga, kimwe n\u2019iyi yo kuba atarasesengura dosiye y\u2019ibyaha aregwa; zose umucamanza yazitesheje agaciro, asaba ko urubanza rukomeza.<\/p>\n

Icyemezo Rusesabagina yafashe ni kimwe ni icya Andr\u00e9 Rwamakuba wabaye Minisitiri w’uburezi bw’amashuri abanza n’ayisumbuye muri Guverinoma y’Inzibacyuho mu 1994. Rwamakuba yaterewe muri yombi muri Namibia mu Kwakira 1998, akurikiranweho ibyaha bya jenoside yakorewe Abatutsi.<\/p>\n

Rwamakuba wari ukurikiranwe n’urukiko mpuzamahanga mpanabyaha rw’i Arusha rwashyiriweho u Rwanda (ICTR), yagiye mu rubanza rwe inshuro imwe, avuga ko ubutaha atazasubiramo. Umucamanza yafashe icyemezo cy’uko urubanza rukomeza, ndetse urukiko rwaje kumugira umwere tariki ya 20 Nzeri 2006 arafungurwa. Ubushinjacyaha bwanyuzwe n’icyemezo cy’urukiko.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n