{"id":35177,"date":"2021-04-12T10:39:18","date_gmt":"2021-04-12T10:39:18","guid":{"rendered":"https:\/\/new.bwiza.com\/2021\/04\/12\/fdlr-yaba-yakangutse-nyuma-y-itangazo-ry-ubufatanye-bw-ingabo-z-ibihugu-by\/"},"modified":"2021-04-12T10:39:18","modified_gmt":"2021-04-12T10:39:18","slug":"fdlr-yaba-yakangutse-nyuma-y-itangazo-ry-ubufatanye-bw-ingabo-z-ibihugu-by","status":"publish","type":"post","link":"https:\/\/bwiza.com\/?p=35177","title":{"rendered":"FDLR yaba yakangutse nyuma y\u2019itangazo ry\u2019ubufatanye bw\u2019ingabo z\u2019ibihugu by\u2019Akarere"},"content":{"rendered":"

Umutwe witwaje intwaro urwanya Leta y’u Rwanda umaze imyaka irenga 20 ushinze ibirindiro mu burasirazuba bwa Repubulika ya Demukarasi ya Congo (RDC), FDLR, urasa n\u2019aho wakangutse nyuma y\u2019itangazo ry\u2019umugambi w\u2019ubufatanye bw\u2019ingabo z\u2019ibihugu by\u2019akarere mu kurandura imitwe, na wo urimo.<\/strong><\/p>\n

Tariki ya 30 Werurwe 2021 ni bwo Umuvugizi w\u2019ingabo za RDC zizwi nka FARDC, Gen. Maj. L\u00e9on-Richard Kasonga yasohoye itangazo rimenyesha ko izi ngabo z\u2019ibihugu by\u2019akarere (zirimo iz\u2019u Rwanda na Uganda) zigiye kwifatanya mu kurandura imitwe yitwaje intwaro ihungabanya umutekano.<\/p>\n

Ni itangazo ryaje rikurikira inama Leta ya RDC yari imaze iminsi igirana n\u2019abasirikare bakuru barimo abaturuka mu Rwanda ndetse na Uganda, zabaye muri Mutarama, Gashyantare na Werurwe 2021.<\/p>\n

Ku ruhande rw\u2019u Rwanda, ibiganiro byabayeho byarebanaga n\u2019ubufatanye bw\u2019ingabo z\u2019ibihugu byombi mu kurandura imitwe yitwaje intwaro irukomokamo irimo: FDLR, CNRD-Ubwiyunge na RUD-Urunana.<\/p>\n

Ku ruhande rwa Uganda, ibiganiro byarebanaga n\u2019uburyo ingabo z\u2019ibihugu byombi zakwifatanya mu kurandura umutwe wegamiye ku idini ya Isilamu wa ADF, ukomoka muri iki gihugu.<\/p>\n

FDLR yaba yakangutse<\/strong><\/p>\n

Guhera tariki ya 7 Mata 2021 muri Teritwari ya Masisi mu Ntara ya Kivu y\u2019Amajyaruguru, hatangiye kumvikana ibitero bya FDLR yifatanyije n\u2019umutwe wa Nyatura CMC (Collectif des Mouvements pour Changement) na APCLS (Alliance des Patriotes pour un Congo Libre et Souverain).<\/p>\n

Ibitangazamakuru byo muri RDC bivuga ko tariki ya 9 Mata, iyi mitwe yahise ifata uduce twinshi turi muri Gurupoma ebyiri za Masisi, abasirikare n\u2019abapolisi ba Leta bari baturimo barahunga. Utwo turimo: Muhetu, Butare, Nyamitaba, Busibe, Kahira, Kalonge, Mpanamo, Kimoka, Kitchanga na Mweso.<\/p>\n

Gusa nk\u2019uko 7 Sur 7 yabitangaje, ingabo za RDC nazo zatangije ibitero zishaka kwigarurira utu duce turi mu maboko y\u2019iyi mitwe yitwaje intwaro.<\/p>\n

Muri iyi mirwano ikomeje irimo iyabereye mu duce twa Nyabiondo, Burora, Kaanja, Lwibo, Kanyumba tariki ya 10 Mata 2021; hakaba hakomeje kuboneka inkomere nyinshi n\u2019imfu ndetse byatumye ibikorwa byose bihagarara nk\u2019uko umudepite Alexis Bahunga yabwiye iki gitangazamakuru.<\/p>\n

Depite Bahunga yagize ati: \u201cIyi mirwano iri kubonekamo inkomere nyinshi buri munsi. Harimo abakomereka n\u2019abapfuye barimo umusirikare. Amashuri menshi yarafunze. Ibikorwa by\u2019imibereho n\u2019ubukungu byarahagaze bitewe n\u2019iyi mirwano.\u201d<\/p>\n

Ishami ry\u2019umuryango w\u2019abaganga batagira umupaka, MSF (M\u00e9decins Sans Fronti\u00e8res) muri RDC, tariki ya 10 Mata ryatangarije ku rubuga rwa Twitter ko kuva tariki ya 9 kugeza ku ya 10, ryakiriye abarwayi 17 bagizweho ingaruka n\u2019ibi bitero, biganjemo abagize ihungabana. <\/p>\n

MSF yavuze kandi abaturage ba Masisi barenga 6000 bari bamaze guhunga, bose ikaba yarabakiriye.<\/p>\n

Kuri uyu wa 11 Mata, imirwano yakomereje muri Masisi, 7 Sur 7 ikaba ivuga ko ingabo za Leta zasubije inyuma iyi mitwe yitwaje intwaro, zigarurira uduce twinshi yari yarafashe. <\/p>\n

BBC ivuga ko yavuganye n’Umuvugizi w’ingabo za RDC mu Ntara ya Kivu y’Amajyaruguru, Maj. Ndjike Kaiko avuga ko bamaze kwigarurira uduce twose twari twarafashwe n’iyi mitwe ndetse ngo imirwano yarangiye. Ati: “Ibintu ubu biratuje, ahantu hose haragenzurwa n’ingabo za Leta. Twigaruriye ahantu hose hari harafashwe n’ubufatanye bw’inyeshyamba za APCLS-Nyatura na FDLR, twafashe n’ibirindiro byabo n’aho umwanzi yari ashingiye.”<\/p>\n

FDLR yashegeshwe bikomeye<\/strong><\/p>\n

Guhera tariki ya 18 Nzeri 2019 ubwo ingabo za RDC zicaga Lt. Gen. Sylvestre Mudacumura wari umaze igihe kirekire ayobora FDLR, abasesenguzi bakurikirana iby\u2019umutekano mu burasirazuba bwa RDC bavuze ko uyu mutwe (byakekwaga ko umaze igihe wisuganya nyuma ya operasiyo nka Umoja Wetu) waba uri mu marembera.<\/p>\n

Urupfu rwa Gen. Mudacumura rwakurikiranye n\u2019ifatwa rya Lt. Col. Habimana wari uzwi nka Asifiwe Manudi Nshimiyimana wayobora umutwe w\u2019abarwanyi badasanzwe wa FDLR, witwa CRAP (Commandos de Recherche et d’Action en Profondeur). Yafatiwe n\u2019ingabo za RDC i Goma tariki ya 2 Ukuboza 2019.<\/p>\n

Raporo ya Kivu Security Tracker (KST) ikorwa n\u2019itsinda ry\u2019abashakashatsi muri RDC ku bufatanye na Human Rights Watch, yagiye ahagaragara muri Gashyantare 2021, ivuga ko umutwe wa FDLR wagiye utakaza imbaraga cyane bitewe n\u2019impamvu zirimo: imfu z\u2019abayobozi bakuru bayo, ifatwa ry\u2019abayobozi bayo ndetse no kwitandukanya kw\u2019aba bayobozi, aho bamwe bagiye bashinga imitwe yabo nka CNRD-Ubwiyunge na RUD-Urunana.<\/p>\n

Intege nkeya ngo zatumye ibikorwa bya FDLR muri Teritwari za Masisi na Rutshuru (ni ho zari zifite ibirindiro bikomeye) bisa n\u2019ibihagaze.<\/p>\n

Kivu Security Tracker kandi ivuga ko umubare w\u2019abarwanyi ba FDLR wagabanyutse mu buryo bukomeye, kuko nko mu mwaka w\u20192008 yari ifite abarwanyi bagera ku 6,500 ariko umwaka w\u20192020 warangiye isigaranye abari hagati ya 500 n\u20191000.<\/p>\n

Iti: \u201cUyu mutwe watakaje ububasha bwo kugenzura hafi teritwari yose n\u2019uduce dukorerwamo ubucukuzi bw\u2019amabuye y\u2019agaciro wagenzuraga mu bihe byashize.\u201d<\/p>\n

Iyi raporo ivuga ko nyuma y\u2019ibi bibazo byose umutwe wa FDLR uyobowe na Lt. Gen. Pacifique Ntawunguka (Omega) na Gaby Ruhinda wagize, ubu uri kuzanzamukira mu gace ka Bwito wifatanyije na CMC. Uku kuzanzamuka kandi igukesha itatana ry\u2019abarwanyi bakuru (Guidon Shimiray na Bwira) b\u2019umutwe wa NDC-Renov\u00e9 wafatanyaga na FARDC kuyigabaho ibitero.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n