{"id":35270,"date":"2021-04-15T11:28:55","date_gmt":"2021-04-15T11:28:55","guid":{"rendered":"https:\/\/new.bwiza.com\/2021\/04\/15\/u-burusiya-ntibwemeranya-na-raporo-ya-un-ishinja-ingabo-zabwo-gukorera-ibyaha\/"},"modified":"2021-04-15T11:28:55","modified_gmt":"2021-04-15T11:28:55","slug":"u-burusiya-ntibwemeranya-na-raporo-ya-un-ishinja-ingabo-zabwo-gukorera-ibyaha","status":"publish","type":"post","link":"https:\/\/bwiza.com\/?p=35270","title":{"rendered":"U Burusiya ntibwemeranya na raporo ya UN ishinja ingabo zabwo gukorera ibyaha muri CAR"},"content":{"rendered":"

Guverinoma y\u2019u Burusiya ntiyemeranya na raporo impuguke z\u2019Umuryango w\u2019Abibumbye (UN) ziherutse gusohora, ishinja ingabo z\u2019amahanga zirimo izo muri iki gihugu zoherejwe muri Repubulika ya Centrafrika (CAR) gukandagira uburenganzira bw\u2019ikiramwamuntu.<\/strong><\/p>\n

Tariki ya 31 Werurwe 2021 ni bwo izi mpuguke zasohoye iyi raporo zigaragaza ko zihangayikishijwe cyane n\u2019imitwe y\u2019ingabo yigenga ituruka mu mahanga, yoherejwe muri CAR kwifatanya n\u2019ingabo za Leta mu kurwanya imitwe yitwaje intwaro ikomeje guhungabanye umutekano w\u2019igihugu, cyane cyane kuva mu Kuboza 2020.<\/p>\n

Imitwe y\u2019ingabo yatunzwe agatoki ni iyaturutse mu Burusiya, ikajya muri CAR mu buryo butemewe n\u2019amategeko mpuzamahanga, nk\u2019uko izi mpuguke zakomeje zibivuga. <\/p>\n

Muri iyo raporo, impuguke za UN zavuze ko izi ngabo zikora ibyaha birimo: kurasa abantu mu kivunge, gufunga nta gishingiweho, iyicarubozo mu gihe cy\u2019ubugenzacyaha, kuzimiza abantu, guhatira abasivili guta ingo no kwibasira ibikorwa by\u2019abasilivi, kimwe n\u2019ibyabashinzwe ibikorwa by\u2019ubutabazi.<\/p>\n

Minisiteri y\u2019Ububanyi n\u2019Amahanga y\u2019u Burusiya yasubije igitangazamakuru Deutsche Welle (DW) cy\u2019Abadage ko izi ngabo (yita impuguke mu bya gisirikare) ziri muri CAR mu buryo bwemewe n\u2019amategeko bitandukanye n\u2019ibyo impuguke za UN zivuga.<\/p>\n

Yagize iti: \u201cImpuguke mu bya gisirikare zaturutse mu Burusiya zoherejwe mu gihugu hashingiwe ku mabwiriza y\u2019akanama ka UN gashinzwe umutekano.\u201d<\/p>\n

Iyi Minisiteri yakomeje iti: \u201cInkunga y\u2019u Burusiya itangwa hashingiwe ku cyo umuryango mpuzamahanga (UN) uteganya mu gukaza umutekano muri Repubulika ya Centrafrika.\u201d<\/p>\n

DW ivuga ko u Burusiya bwohereje ku mugaragaro ingabo 535 muri CAR, ariko ibitangazamakuru bikagaragaza ko uyu mubare w\u2019iziri muri iki gihugu ukaba urenga cyane. Yatanze urugero rw\u2019umutwe wa Wagner Group, aho wonyine ufite ingabo zirenga 1000 muri CAR, hakaba n\u2019indi mitwe nka Sewa Security na yo ifiteyo ingabo.<\/p>\n

Iyi Minisiteri yasubije ko ubu itazi umubare w\u2019Abarusiya baba muri CAR, ivuga ko hari ababayo bakora ubucuruzi cyangwa se ubukerarugendo. Iti: \u201cNta makuru dufite ku mubare wose w\u2019Abarusiya bari muri CAR ubu ngubu. Abarusiya bari muri Repubulika ya Centrafrika by\u2019igihe gito, bakora ubucuruzi cyangwa se ubukerarugendo. Ngo aba ngaba ntibasabwa kwitangaho amakuru ku biro by\u2019uhagarariye u Burusiya muri iki gihugu.<\/p>\n

Ingabo zaturutse mu Burusiya ziri muri CAR zigaragara mu bikorwa byo kurinda umutekano ahatandukanye nko: ku bibuga by\u2019indege, ku biro bikuru nka za Minisiteri, ndetse ziri mu zirinda Umukuru w\u2019Igihugu, Faustin Archange-Touad\u00e9ra.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n