{"id":35401,"date":"2021-04-20T12:12:50","date_gmt":"2021-04-20T12:12:50","guid":{"rendered":"https:\/\/new.bwiza.com\/2021\/04\/20\/perezida-lazarus-chakwera-yaburiye-ibisambo-biri-muri-leta-ya-malawi\/"},"modified":"2021-04-20T12:12:50","modified_gmt":"2021-04-20T12:12:50","slug":"perezida-lazarus-chakwera-yaburiye-ibisambo-biri-muri-leta-ya-malawi","status":"publish","type":"post","link":"https:\/\/bwiza.com\/?p=35401","title":{"rendered":"Perezida Lazarus Chakwera yaburiye ‘ibisambo’ biri muri Leta ya Malawi"},"content":{"rendered":"

Perezida wa Malawi, Lazarus Chakwera, yaburiye abo yise ‘ibisambo’ bikora mu nzego z’ubuyobozi bw’igihugu cye ko uwo ibimenyetso bizatunga agatoki nk’umwe mu bisambo azakomereza ubuzima mu buroko.<\/strong> <\/em><\/p>\n

Perezida Chakwera yabigarutseho, mu gihe aheruka kwirukana Minisitiri w’Umurimo mu gihugu cye, Ken Kandodo wajyanye n’abandi bayobozi 19 baheruka gutabwa muri yombi.<\/p>\n

Aba bazize za miliyoni z’amadorali ya Amerika bakekwaho kunyereza, mu gihe yari agenewe gufasha Malawi guhangana n’icyorezo cya Virusi ya Corona.<\/p>\n

Ubugenzuzi bwakozwe bwagaragaje ko hari $ miliyoni 8 zaburiwe irengero, mu gihe zagombaga gufasha Malawi guhangana na kiriya cyorezo.<\/p>\n

Perezida Chakwera mu ijambo rye ryatambutse kuri Televiziyo y’Igihugu, yavuze ko kwirukana uriya muminisitiri no guta muri yombi bariya bayobozi bigamije kwerekana ko ruswa itagomba kwihanganirwa na rimwe.<\/p>\n

Perezida Chakwera n’uburakari bwinshi yavuze ko umuyobozi wese bizagaragara ko yagize uruhare mu inyerezwa rya ziriya miliyoni 8 azahura n’ingaruka.<\/p>\n

Ati: “Rero ndagira ngo ibisambo byose byihishe mu nzego za Leta binyumve: Gihamya niramuka igutunze urutoki nka kimwe mu bisambo byibye amafaranga ya COVID yo kurokora ubuzima mu gihe amagana y’abantu bacu bicwa na COVID-19, uzisanga muri gereza.”<\/p>\n

Itangazo Polisi ya Malawi yasohoye ku Cyumweru rivuga ko bariya bayobozi baheruka gutabwa muri yombi bashobora kuregwa ibyaha birimo “ubujura bukozwe n’umukozi wa Leta”, byabahama bakaba bakoreshwa imirimo y’amaboko ivunannye.<\/p>\n

Abayobozi batawe muri yombi ku Cyumweru bakurikiye abandi 28 bari bakuriye uturere birukanwe muri Gashyantare uyu mwaka bazira gukoresha nabi ariya mafaranga.<\/p>\n

Perezida Chakwera yavuze ko yamaze guhagarika imishahara y’abayobozi Bose bakekwaho kunyereza ariya mafaranga, ndetse ko urugendo rwo kubahana rugomba gutangira mu gihe cy’ibyumweru bibiri.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n