{"id":35418,"date":"2021-04-21T07:53:01","date_gmt":"2021-04-21T07:53:01","guid":{"rendered":"https:\/\/new.bwiza.com\/2021\/04\/21\/umunyamakuru-cyuma-avuga-ko-yari-agiye-gufungwa-abaturage-bamurengana-mu-masaka\/"},"modified":"2021-04-21T07:53:01","modified_gmt":"2021-04-21T07:53:01","slug":"umunyamakuru-cyuma-avuga-ko-yari-agiye-gufungwa-abaturage-bamurengana-mu-masaka","status":"publish","type":"post","link":"https:\/\/bwiza.com\/?p=35418","title":{"rendered":"Umunyamakuru Cyuma avuga ko yari agiye gufungwa, abaturage bamurengana mu masaka"},"content":{"rendered":"

Umunyamakuru Niyonsenga Dieudonne (Cyuma Hassan) wa Ishema TV avuga ko kuri uyu wa 20 Mata 2021, yari agiye gutabwa muri yombi n\u2019abapolisi n\u2019abasirikare ubwo yari mu Karere ka Rwamagana, abaturage baho bamurengana mu masaka.<\/strong><\/p>\n

Nk\u2019uko Cyuma yabitangarije abanyamakuru bagenzi be, yari yagiye gutara inkuru ku rupfu rwa Twiringiyimana Jean de Dieu wari utuye mu Kagari ka Murehe, Umurenge wa Muyumbu, uherutse kwicwa arashwe azira kwiba igihingwa cya \u2018macadamia\u2019, umurambo we ugatwarwa uzingazinze muri shitingi.<\/p>\n

Mu masaa moya y\u2019umugoroba wo kuri uyu wa 20 Mata, umunyamakuru Eric Bagiruwubusa wa Radiyo Ijwi rya Amerika yatangarije ku rubuga rwa Twitter ko [kuri telefone], yumvise Cyuma atabaza avuga ko yari mu ishyamba \u201cyagoswe n\u2019abapolisi n\u2019abasirikare!\u201d Ati: \u201cNyuma numvaga bamwambura T\u00e9l\u00e9phone ya cameraman we twavuganiragaho.\u201d<\/p>\n

Mu masaa mbiri y\u2019ijoro, Bagiruwubusa yongeye kumenyesha abamukurikira kuri uru rubuga ko telefone yavuganiragaho na Cyuma yasubiye ku murongo. Ngo Cyuma yabwiye mugenzi we ati: \u201cNtabwo byoroshye Papa, [\u2026] mvuye mu menyo ya rubamba.\u201d<\/p>\n

Ubu butumwa bwombi Bagiruwubusa yashyize kuri Twitter, yabumenyeshaga (tag) inzego zirimo urw\u2019ubugenzacyaha (RIB) n\u2019urw\u2019abanyamakuru bigenzura (RMC) hamwe na Minisitiri w\u2019Ubutabera, Busingye Johnston, ariko nta rwigeze rugira icyo rubuvugaho (reaction).<\/p>\n

Umunyamakuru Ntwali John Williams wa PAX TV na we yavuganye na Cyuma nyuma yo gucika abashinzwe umutekano, amusobanurira ko yacikishijwe n\u2019abaturage, bamunyujije mu masaka.<\/p>\n

Abajijwe igihe abashinzwe umutekano bamumaranye, yasubije ati: \u201cKutumarana ntabwo basabye umwanya munini\u201d, ati \u201cahubwo byansabye umwanya munini ndi gutegura ukuntu nabacika kuko abaturage bamfashe bandengana mu masaka, bampishahisha bati \u2018ntabwo mumudukuramo\u2019.\u201d<\/p>\n

Ati: \u201cUbundi hari nka saa 18h10, ni bwo nari ngisoza interview ya mbere maze umuturage ngo bamaze iminsi basaba ko bahabwa umurambo.\u201d Yavuze ko aba baturage bari bamaze guhabwa umurambo wa Twiringiyimana.<\/p>\n

Cyuma yavuze ko ubwo yari muri iki kiganiro n\u2019abaturage, hari intasi nyinshi cyane, ari nazo zamuhamagariye imodoka y\u2019igisirikare kugira ngo ize imutware, ati \u201cnanjye ubwo ndeba uko mbigenza.\u201d<\/p>\n

Ngo iyo modoka yahageze, abasirikare bashaka kumuta muri yombi, abaturage bamwirukankana mu ishyamba no mu masaka bamuhungisha. Ati: \u201cKuko n\u2019ubwo twirukankaga, harimo abantu batwirukankagamo bambaye ibicocero, ari bo bari kuneka. Ni bwo twahise tubagwamo rero, babona abaturage bakoze ikintu kimeze nk\u2019imyigaragambyo, bati \u2018ntabwo twabishobora\u2019, barahamagarana ku matelefona, bahamagara ba Boss babo, babonye ibintu bifashe indi ntera bati \u2018musibe amashusho\u2019.\u201d<\/p>\n

Cyuma ngo yanze gusiba amashusho yafashe, aba basirikare baramureka, amaherezo baramurekura, ava i Rwamagana amahoro nk\u2019uko yabivuze.<\/p>\n

Twiringiyimana yarashwe tariki ya 13 Mata 2021. Umuryango we wari umaze iminsi igera kuri 7 utegereje umurambo we wari ubitse mu buruhukiro (morgue) bw\u2019ibitaro by\u2019Akarere ka Rwamagana.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n