{"id":35450,"date":"2021-04-21T15:08:32","date_gmt":"2021-04-21T15:08:32","guid":{"rendered":"https:\/\/new.bwiza.com\/2021\/04\/21\/perezida-kagame-yavuze-ibyo-azahora-yibukira-kuri-marshal-idriss-deby\/"},"modified":"2021-04-21T15:08:32","modified_gmt":"2021-04-21T15:08:32","slug":"perezida-kagame-yavuze-ibyo-azahora-yibukira-kuri-marshal-idriss-deby","status":"publish","type":"post","link":"https:\/\/bwiza.com\/?p=35450","title":{"rendered":"Perezida Kagame yavuze ibyo azahora yibukira kuri Marshal Idriss D\u00e9by"},"content":{"rendered":"

Perezida wa Repubulika, Paul Kagame, yihanganishije abaturage b’igihugu cya Tchad ndetse n’umuryango wa Marshal Idriss D\u00e9by Itno wari Perezida wacyo, ashimangira ko azahora yibukirwa ku musanzu we mu kurwanya iterabwoba n’ubwihebe.<\/strong> <\/em><\/p>\n

Ni ibikubiye mu butumwa Umukuru w’Igihugu yanyujije ku rubuga rwe rwa Twitter kuri uyu wa Gatatu.<\/p>\n

Idriss D\u00e9by wari umaze imyaka 30 ari Perezida wa Tchad, yitabye Imana ejo ku wa Kabiri Tariki ya 20 Mata, ahita asimburwa n’umuhungu we Mahamat Idriss D\u00e9by Itno uri ku rwego rwa Jenerali w’inyenyeri enye.<\/p>\n

Igisirikare cya Tchad cyatangaje ko Perezida D\u00e9by yazize ibikomere by’amasasu yarashwe ku wa Gatandatu w’Icyumweru gishize, ubwo yari ayoboye ingabo ze ku rugamba zari zihanganyemo n’inyeshyamba za FACT.<\/p>\n

Perezida Kagame ari mu banyacyubahiro batambukije ubutumwa bufata mu mugongo abanya-Tchad bafataga Perezida D\u00e9by nk’intwari ikomeye, cyane mu guhangana n’iterabwoba.<\/p>\n

Abinyujije kuri Twitter yagize ati: “Nihanganishije cyane abaturage ba Tchad n’umuryango wa Nyakwigendera Perezida Idris D\u00e9by Itno. Azahora yibukirwa ku musanzu we ntagereranywa mu kurwanya iterabwoba n’ubutagondwa.”<\/p>\n

Ubutumwa bwa Perezida Kagame buje bukurikira ubw’abandi banyacyubahiro batandukanye, barimo nka Perezida w’u Burundi, Evariste Ndayishimiye, Bah Ndaw wa Mali, Mohamed Bazoum wa Niger, Paul Biya wa Cam\u00e9roun, Cyril Ramaphosa wa Afurika y’Epfo, F\u00e9lix Tshisekedi wa Repubulika Iharanira Demokarasi ya Congo n’abandi.<\/p>\n

Aba bose uretse kuba bihanganishije abaturage ba Tchad, bahuriza ku kuba urupfu rwa Perezida Idriss D\u00e9by ari igihombo gikomeye ku mugabane wa Afurika, kubera uruhare yagiraga mu kurwanya iterabwoba n’ubuhezanguni.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n