{"id":35475,"date":"2021-04-22T15:28:48","date_gmt":"2021-04-22T15:28:48","guid":{"rendered":"https:\/\/new.bwiza.com\/2021\/04\/22\/polisi-y-igihugu-yasubije-abamaze-igihe-binubira-camera-zo-ku-muhanda\/"},"modified":"2021-04-22T15:28:48","modified_gmt":"2021-04-22T15:28:48","slug":"polisi-y-igihugu-yasubije-abamaze-igihe-binubira-camera-zo-ku-muhanda","status":"publish","type":"post","link":"https:\/\/bwiza.com\/?p=35475","title":{"rendered":"Polisi y’Igihugu yasubije abamaze igihe binubira Camera zo ku muhanda"},"content":{"rendered":"

Polisi y’Igihugu yavuze kuri Camera zo ku muhanda zimaze igihe zinubirwa n’abatari bake, ishimangira ko ziri mu bikoresho byayo byunganira abapolisi bo ku muhanda mu kazi kabo ka buri munsi.<\/strong> <\/em><\/p>\n

Abenshi mu Banyarwanda bakoresha imbuga nkoranyambaga bamaze igihe binubira ziriya Camera, nyuma yo gushyirwa ku mihanda yo hirya no hino mu gihugu mu rwego rwo guhangana n’abica amategeko y’umuhanda binyuze mu kurenza umuvuduko.<\/p>\n

Abinubira ziriya Camera bavuga ko zashyizwe ahantu hihishe bigoranye kuzibona, bagashinja Polisi gushaka kuzihisha igamije “kwiba Abanyarwanda.”<\/p>\n

Umuvugizi wa Polisi y’Igihugu, CP John Bosco Kabera mu kiganiro ‘Waramutse Rwanda’ cya Televiziyo y’u Rwanda, yavuze ko ziriya Camera zashyizweho mu rwego rwo kunganira Polisi yo mu muhanda.<\/p>\n

Ati: “Polisi rero kuko itashyira umupolisi kuri buri sentimetero y’umuhanda kuva Rusizi kugera Kagitumba, cyangwa se kuva Rubavu kugera Rusumo, mu rwego rw’iterambere iyo hagaragaye ibikoresho nka biriya bya za Camera Polisi irabyifashisha.”<\/p>\n

“Ziriya Camera rero zaje zije kunganira abapolisi, cyane cyane mu rwego rwo kubungabunga umutekano wo mu muhanda, Camera ikaba aho umupolisi atari. Ni ibikoresho bya Polisi.”<\/p>\n

Ku bijyanye no kuba ziriya Camera zishyirwa ahantu hihishe, CP Kabera yavuze ko “iyo uburiye umunyamakosa ukamubwira ibyo agomba kwirinda ntabyubahirize, none se iyo ugiye kumufara uramubwira uti ‘ndaje ngufate, noneho ngiye kujya hariya uhansange ngufate?’ Ntabwo ari byo. Abaturage rero nibumve ko bagomba gukora inshingano zabo na Polisi igakora izayo.”<\/p>\n

Yavuze ko abatwara ibinyabiziga bakwiye gusubiramo ibyo bize mu mategeko y’umuhanda no mu bukangurambaga bahabwa, mu rwego rwo kwirinda kugwa mu makosa ndetse n’impanuka zo mu muhanda.<\/p>\n

CP Kabera asa n’uburira abatwara ibinyabiziga, yavuze ko abinubira Camera babitangiye kare, kuko “umunsi azagera Kagitumba akayibona cyangwa akagera Rusumo akayibona cyangwa akagera Rusizi akayibona, urumva ni gahunda ndende rero, ahubwo abantu nibitegure basubiremo ibyo bize.”<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n