{"id":35604,"date":"2021-04-26T17:36:37","date_gmt":"2021-04-26T17:36:37","guid":{"rendered":"https:\/\/new.bwiza.com\/2021\/04\/26\/musanze-amazi-atunguranye-yaturutse-mu-birunga-yatwaye-umunyeshuri-wari-muri\/"},"modified":"2021-04-26T17:36:37","modified_gmt":"2021-04-26T17:36:37","slug":"musanze-amazi-atunguranye-yaturutse-mu-birunga-yatwaye-umunyeshuri-wari-muri","status":"publish","type":"post","link":"https:\/\/bwiza.com\/?p=35604","title":{"rendered":"Musanze: Amazi \u2018atunguranye\u2019 yaturutse mu birunga, yatwaye umunyeshuri wari muri ‘stage’"},"content":{"rendered":"

Amazi atunguranye y\u2019umugezi wa Nyagisenyi uturuka mu Kagari ka Nyonirima mu Murenge wa Kinigi w\u2019Akarere ka Musanze, ku mugoroba wo kuri uyu wa 25 Mata 2021 yatwaye umusore w\u2019imyaka 26 y\u2019amavuko witwa Hakizimana Clement wigaga mu ishuri ry\u2019imyuga ryitiriwe Mutagatifu (St) Kizito riherereye i Rwamagana.<\/strong><\/p>\n

Habarurema Jean Claude, umwe muri bane bari kumwe na Hakizimana, yatangarije Bwiza ko babuze mugenzi wabo mu masaa cyenda y\u2019uwo munsi, ubwo batembereraga mu gahanda k\u2019amabuye kari hafi y\u2019uyu mugezi, muri Nyonirima.<\/p>\n

Yagize ati: \u201cUrupfu rwe rwabaye ejo nimugoroba saa cyenda. Twakoraga stage hano mu majyaruguru, i Musanze. Ubwo dukora iminsi yose usibye ku Cyumweru. Ubwo rero ku Cyumweru twiriwe mu rugo, turateka turarya, hanyuma tumaze kurya turatembera. Tugeze ahantu [sinibuka izina ryaho], twumva umuriri w\u2019amazi, hashize iminota itanu, yatugezeho menshi cyane atembamo n\u2019amabuye.\u201d<\/p>\n

Habarurema yavuze ko ubwo aya mazi yatembaga, bisa n\u2019aho nta mvura yagwaga usibye utujojoba. Ngo babonaga ari nk\u2019igitangaza. Ati: \u201cTwabonaga bisa nk\u2019igitangaza kureba ayo mazi ahise aza kandi nta yari ahari.\u201d<\/p>\n

Muri ako kanya, Hakizimana ngo yegereye umugezi kugira ngo arebe aya mazi neza, ati: \u201cMuri uko kureba rero, Clement we yabaye nk\u2019uwegereye imbere ho gatoya kugira ngo arebe neza, akandagira ku ibuye, aranyerera agwamo.\u201d
\n\"img-20210426-wa0030_1.jpg\"<\/p>\n

Nyuma yo kubona umugezi utwaye Hakizimana, aba basore bahise batabaza abaturage, inzego z\u2019ubuyobozi n\u2019izishinzwe umutekano kugira ngo babatabare ariko ntacyo byatanze.<\/p>\n

Kuva mu masaa cyenda yo kuri uyu wa 25 Mata 2021, Hakizimana yarashakishijwe ariko irengero rye rirabura. Mu masaa kumi n\u2019ebyiri y\u2019igitondo cyo kuri uyu wa 26 Mata, umurambo we waje kuboneka isayo riri mu cyobo kinini gifata amazi aturuka mu birunga giherereye mu Mudugudu wa Kagano, Akagari ka Cyivugiza mu Murenge wa Nyange uri mu majyepfo ya Kinigi.<\/p>\n

Nyuma yo kuvana umurambo wa Hakizimana muri iki cyobo, imodoka y\u2019Akarere ka Musanze yawujyanye mu bitaro bikuru bya Ruhengeri kugira ngo ukorerwe ikizamini (autopsy).<\/p>\n

Hakizimana avuka mu Kagari ka Kibari, Umurenge wa Byumba mu Karere ka Gicumbi, akaba yigaga amasomo y\u2019igihe gito (short courses) y\u2019ubwubatsi muri Saint Kizito Rwamagana. <\/p>\n

We na bagenzi be 11 bavuye i Rwamagana, bagera mu Kinigi tariki ya 12 Mata 2021, boherejwe n\u2019iri shuri kugira ngo bakore imenyerezamwuga (stage) ry\u2019ubwubatsi ryari rizarangira tariki ya 19 Kamena.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n