{"id":35630,"date":"2021-04-27T10:54:32","date_gmt":"2021-04-27T10:54:32","guid":{"rendered":"https:\/\/new.bwiza.com\/2021\/04\/27\/iby-ingenzi-ku-mutwe-wa-twirwaneho-ugizwe-n-abanyamulenge\/"},"modified":"2021-04-27T10:54:32","modified_gmt":"2021-04-27T10:54:32","slug":"iby-ingenzi-ku-mutwe-wa-twirwaneho-ugizwe-n-abanyamulenge","status":"publish","type":"post","link":"https:\/\/bwiza.com\/?p=35630","title":{"rendered":"Iby\u2019ingenzi ku mutwe wa \u2018Twirwaneho\u2019 ugizwe n\u2019Abanyamulenge"},"content":{"rendered":"

Umutekano muke w\u2019Abanyamulenge batuye mu duce dutandukanye mu misozi miremire ya Uvira, Fizi na Itombwe, uvugwa kuva mu mwaka w\u20192017 kugeza ubu, aho bamwe bagiye bicwa, bagatwikirwa inzu, bagahohoterwa, bagasahurwa imitungo yabo irimo inka, abandi bagahunga.<\/strong><\/p>\n

Amakuru mashya aturukayo avuga ko Abanyamulenge babarirwa mu 4000 bari batuye mu gace ka Ruramo, Gurupoma ya Lemera muri Teritwari Uvira kuva muri Werurwe 2021 kugeza mu mpera z’icyumweru gishize bamaze guhunga ibitero bya Mai Mai Ilungu na Red Tabara, n’ubwo Bulizi Aimable uyoboye aba barwanyi we avuga ko batagaba ibitero ku basivili, ahubwo barwanya umutwe yitwaje intwaro ihakorera.
\n\"abanyam.png\"<\/p>\n

Abanyamulenge bavuga ko bibasirwa n\u2019imitwe yitwaje intwaro itandukanye ya Mai Mai irimo: Biloze Bishambuke, Ilungu, Yakutumba, Mulumba, Ebuila Mtetezi na Aoci, yifatanyije n\u2019indi nka Red-Tabara, FOREBU na FNL ikomoka mu Burundi, na bamwe mu basirikare b\u2019ingabo za Repubulika ya Demukarasi ya Congo (RDC), ngo \u201cintego ni ukubamaraho\u201d.<\/p>\n

Bashinja Leta ya RDC kurebera urugomo bakorerwa kuva mu myaka itatu ishize, kuko ngo usibye kutagira ubushake, ntiyabananiwe kubarinda, ikimenyimenyi ingabo zayo (FARDC) zifite ibirindiro byinshi muri iyi misozi, birimo bitandatu bizengurutse ibiturage byabo bibarirwa muri 28 muri Itombwe nk\u2019uko umushakashatsi w\u2019Umunyamulenge akaba n\u2019umunyamategeko, Me Oscar Niyongabo yabitangarije mu nyandiko yise \u201cTwirwaneho iracyari umutwe wa gisivili wo kwirwanaho n\u2019ubwo harimo abasirikare bake\u201d yasohotse muri Werurwe 2021.<\/p>\n

Kubona Leta ntacyo ikora, ngo ni byo byatumye Abanyamulenge bashinga uyu mutwe witwa Twirwaneho ugamije kubafasha kwirindira umutekano (kwirwanaho) mu gihe batewe n\u2019iyi mitwe yitwaje intwaro, bavuga ko yaba ifashwa na Leta.<\/p>\n

Twirwaneho muri raporo ya KST<\/strong><\/p>\n

Raporo nshya ya Kivu Security Tracker (KST) ikorwa n\u2019itsinda ry\u2019abashakashatsi mu Ntara ya Kivu y\u2019Amajyepfo n\u2019iy\u2019Amajyaruguru ku bufatanye n\u2019umuryango mpuzamahanga wa HRW (Human Right Watch) uharanira uburenganzira bwa muntu isobanura ko Twirwaneho cyangwa Twigwaneho nk\u2019uko ibivuga, ari umutwe w\u2019Abanyamulenge ugamije kubarinda, ukaba ukorera mu misozi miremire ya Fizi na Mwenga.<\/p>\n

Iyi raporo yasohotse muri Gashyantare 2021 ivuga ko Twigwaneho ikunze gukorera mu gace ka Bijombo na Minembwe, ko ndetse \u201cikorana n\u2019umutwe wa Gumino\u201d. Iti ariko: \u201cBitandukanye na Gumino, ntabwo Twigwaneho yitwaza intwaro.\u201d<\/p>\n

Ivuga kandi ko kuva mu 2020, uyu mutwe watangiye gukorana n\u2019undi mutwe AFP Gutabara \u201cwigometse\u201d wa Col. Michel Rukunda, Umunyamulenge wamenyekanye ku izina rya \u2018Makanika\u2019. <\/p>\n

Twirwaneho si umutwe witwaje intwaro<\/strong><\/p>\n

Me Niyongabo avuga ko Twirwaneho atari umutwe witwaje intwaro, wigometse kuri Leta ya RDC n\u2019ubwo hari abasirikare b\u2019Abanyamulenge bake bavuye mu ngabo z\u2019igihugu, bakifatanya nawo.<\/p>\n

Mu basirikare yavuze bavuye mu ngabo za Leta bakiyunga na Twirwaneho harimo Col. Makanika, Col. Charles Sematama, Lt. Col. Mufoko Jolie Rungwe, Maj. Patrick Muco na Maj. Senanda, ati \u201cBahisemo gutakaza imyanya yabo mu gisirikare, aho gukomeza gukorera ingabo zananiwe kurinda ubwoko bwabo umugambi wo kubutsemba.\u201d
\n\"makanika.jpg\"
\n\"sematama-3.jpg\"<\/p>\n

Mu kwerekana ko uyu mutwe utarwanya Leta, Me Niyongabo avuga ko wigeze kugabwaho igitero n\u2019abarwanyi ba Mai Mai bifatanyije n\u2019abasirikare ba Leta muri Kamombo, Tuwetuwe na Bilalombili hagati ya Gicurasi na Nyakanga 2020, bagamije kuwusenya.<\/p>\n

Ati: \u201cAriko Twirwaneho mu kwereka Leta ya Congo ko itashakaga kurwanya ingabo za Leta, tariki ya 2 Nyakanga 2020 yahaye Perezida wa Sosiyete Sivili iri muri Minembwe, Bwana Ruvuzangoma abasirikare bane yari yafashe mpiri, umusirikare w\u2019umugore n\u2019umwana we mutoya, bari bafatiwe muri Kamombo.\u201d<\/p>\n

Ku musozo w\u2019inyandiko ye, Me Niyongabo yongeye gushimangira ko \u201cbitandukanye n\u2019ibivugwa n\u2019abatabifiteho amakuru\u201d, aba basirikare b\u2019Abanyamulenge batatorotse igisirikare cya Leta kugira ngo bayirwanye, ngo ahubwo bagiye kurinda abavandimwe babo. Yavuze ko kandi mu gihe Leta yarinda Abanyamulenge, igahagarika gushyigikira imitwe ya Mai Mai, Twirwaneho na yo yaseswa.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n