{"id":36041,"date":"2021-05-12T08:50:51","date_gmt":"2021-05-12T08:50:51","guid":{"rendered":"https:\/\/new.bwiza.com\/2021\/05\/12\/urukiko-rw-ikirenga-rwahamagaje-rssb-yanze-kwishyura-uwakoreye-impanuka-mu-kazi\/"},"modified":"2021-05-12T08:50:51","modified_gmt":"2021-05-12T08:50:51","slug":"urukiko-rw-ikirenga-rwahamagaje-rssb-yanze-kwishyura-uwakoreye-impanuka-mu-kazi","status":"publish","type":"post","link":"https:\/\/bwiza.com\/?p=36041","title":{"rendered":"Urukiko rw’Ikirenga rwahamagaje RSSB ‘yanze kwishyura’ uwakoreye impanuka mu kazi arenga miliyoni 12 FRW"},"content":{"rendered":"

Urukiko rw\u2019Ikirenga ruherutse guhamagaza umuyobozi mukuru w\u2019urwego rw\u2019igihugu rushinzwe ubwiteganyirize (RSSB), kugira ngo asobanure impamvu uru rwego rutishyura miliyoni 12 z\u2019amafaranga y\u2019u Rwanda n\u2019imishahara y\u2019ukwezi umukozi wakoreye impanuka mu kazi, bikamuviramo ubumuga bwo mu mutwe n\u2019ubw\u2019ingingo.<\/strong><\/p>\n

Urubuga Kigali Law Tidings dukesha aya makuru ruvuga ko uyu mukozi wakoraga isuku muri Trustco Rwanda Ltd ubwo yari mu kazi, yahanutse mu idirishya rya \u2018etage\u2019 ikoreramo ibiro bya Leta mu Gushyingo 2012, akomereka bikabije ku mutwe no ku maguru.<\/p>\n

Icyo gihe, Trustco yamujyanye ku bitaro byitiriwe Umwami Faisal, aravurwa, nyuma ikibazo cye gishyikirizwa RSSB nk\u2019urwego rufite mu nshingano ibijyanye n\u2019ubwiteganyirize bw\u2019abakozi kugira ngo rwishyure amafaranga yakoreshejwe mu kuvuza uyu mukozi, runatangire kumuha imishahara ye y\u2019ukwezi.<\/p>\n

Raporo y\u2019ibi bitaro yagaragaje ko ubumuga uyu mukozi yakuye mu mpanuka buri ku gipimo cya 45%, ariko abahanga ba RSSB bo bamusuzumye basanga buri ku 10%, ibishingiraho imwima aya mafaranga n\u2019imishahaea, isobanura ko \u201cumukozi wagiriye mu kazi ubumuga bw\u201910% kumanura, adahabwa ubwiteganyirize ku mpanuka\u201d.<\/p>\n

Byatumye mu 2013, uyu mukozi ajya kurega RSSB mu Rukiko Rwisumbuye rwa Nyarugenge, ko yamwimye ubwiteganyirize kandi yujuje ibisabwa. Uru rubuga ruvuga ko icyo gihe uru rwego rwatsinzwe.<\/p>\n

RSSB yajuririye mu Rukiko Rukuru yiregura ko itaha amafaranga y\u2019ubwiteganyirize umukozi ufite \u201cubumuga buto\u201d buri ku gipimo cy\u201910% , ariko nabwo iratsindwa.<\/p>\n

Nyuma y\u2019aho, RSSB yitabaje Urwego rw\u2019Umuvunyi, rusaba Urukiko rw\u2019Ikirenga gukurikirana iki kibazo, uru rukiko narwo rusaba inzobere muri Minisiteri y\u2019Ubuzima gusuzuma, zikareba igipimo cy\u2019ubumuga uyu mukozi yakuye muri iyi mpanuka.<\/p>\n

Inzobere za Minisiteri y\u2019Ubuzima zasanze uyu mukozi afite ubumuga bwo mu mutwe buri ku gipimo cya 80%, ubw\u2019urwasaya, amenyo n\u2019ukuguru kw\u2019ibumoso buri kuri 20%.<\/p>\n

Urukiko rw\u2019Ikirenga rushingiye kuri iyi raporo nshya, rwategetse RSSB kwishyura uyu mukozi miliyoni 12 FRW akubiyemo ayo yakoresheje mu gihe yavurirwaga muri Faisal ndetse n\u2019umushahara wa buri kwezi wa 29,758 FRW mu gihe cyose uyu mukozi akiriho. <\/p>\n

Uru rubuga ruvuga ko RSSB itigeze yubahiriza itegeko ry\u2019Urukiko rw\u2019Ikirenga, ari yo mpamvu tariki ya 8 Mata 2021 rwahamagaje Umuyobozi Mukuru wayo, kugira ngo yitabe tariki ya 11 Gicurasi.<\/p>\n

Ntabwo Urukiko rw\u2019Ikirenga rwigeze rwumva ibisobanuro by\u2019uyu muyobozi kuko iki gikorwa cyarasubitswe bitewe n\u2019uko Inteko y\u2019Abacamanza itari yuzuye.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n