{"id":36165,"date":"2021-05-17T06:54:38","date_gmt":"2021-05-17T06:54:38","guid":{"rendered":"https:\/\/new.bwiza.com\/2021\/05\/17\/ifatwa-ry-indwanyi-y-umufaransa-ibyamamare-mu-rwanda-n-uruzinduko-rwa-gen\/"},"modified":"2021-05-17T06:54:38","modified_gmt":"2021-05-17T06:54:38","slug":"ifatwa-ry-indwanyi-y-umufaransa-ibyamamare-mu-rwanda-n-uruzinduko-rwa-gen","status":"publish","type":"post","link":"https:\/\/bwiza.com\/?p=36165","title":{"rendered":"Ifatwa ry\u2019indwanyi y\u2019Umufaransa, ibyamamare mu Rwanda n\u2019uruzinduko rwa Gen. Kazura muri Tanzania, mu nkuru z\u2019icyumweru gishize"},"content":{"rendered":"

Icyumweru gishize cyatangiye tariki ya 9 Gicurasi 2021 cyaranzwe n\u2019amakuru uw’ingenzi atandukanye, arimo arebana na politiki, umutekano, ubukungu, siporo n\u2019imyidagaduro.<\/strong><\/p>\n

Ni akurikira:<\/p>\n

Indwanyi y\u2019Umufaransa yafatiwe muri CAR<\/strong><\/p>\n

Polisi ya Repubulika ya Centrafrica tariki ya 10 Gicurasi yataye muri yombi indwanyi kabuhariwe ikomoka mu Bufaransa yitwa Juan Remy Quignolot iyikekaho gukorana n\u2019imitwe yitwaje intwaro irwanya Leta.<\/p>\n

Uyu Mufaransa wabaye mu mutwe wa parakomando mu ngabo z\u2019u Bufaransa, yafatanwe intwaro z\u2019ubwoko butandukanye ndetse n\u2019amasasu mu rugo abamo muri CAR.<\/p>\n

We ntiyemera gukorana n\u2019iyi mitwe, ahubwo yasobanuye ko yagiye muri CAR gutoza abakozi b\u2019urwego rwigenga rucunga umutekano.<\/p>\n

Ibyamamare mu muziki na siporo mu Rwanda<\/strong><\/p>\n

Mu cyumweru gishize, u Rwanda rwakiriye ibyamamare byinshi mu muziki birimo umuraperi Jermaine Lamarr Cole (J. Cole) ukomoka muri USA na Mohombi Nzasi Moupondo ukomoka muri RDC n\u2019ibyo mu mupira w\u2019amaguru birimo: Arsene Wenger watoje Arsenal igihe kirekire, Gianni Infantino uyoboye ishyirahamwe ry’umupira w’amaguru ku Isi na Patrice Motsepe, umuherwe uyoboye impuzamashyirahamwe y\u2019umupira w\u2019amaguru muri Afurika, CAF.<\/p>\n

J. Cole na Mohombi baje kwitabira irushanwa nyafurika rya Basketball (BAL) ryatangiye kuri uyu wa 16 Gicurasi, aho uyu muraperi yakiniye ikipe ya Patriots BBC yo mu Rwanda, uyu muririmbyi mugenzi we akaba yaragombaga gutaramira abaryitabiriye.<\/p>\n

Wenger, Infantino na Motsepe bo baje i Kigali mu nama ya CAF yabaye kuri uyu wa 15 Gicurasi 2021, yigaga ku iterambere ry\u2019umupira w\u2019amaguru ku mugabane wa Afurika. <\/p>\n

Abayobozi bo mu Rwanda na RDC barahuye, biga ku bibazo by\u2019ubucuruzi<\/strong><\/p>\n

Abayobozi bo mu Rwanda bari bahagarariwe na Guverineri w\u2019Intara y\u2019Uburengerazuba, Habitegeko Fran\u00e7ois n\u2019abo muri Repubulika ya Demukarasi ya Congo (RDC) bari bahagarariwe na Guverineri w\u2019Intara ya Kivu y\u2019Amajyepfo, Th\u00e9o Ngwabidje Kasi tariki ya 10 Gicurasi bagiraniye ikiganiro mu Karere ka Rusizi, kigamije gushakira ibisubizo ibibazo mu bucuruzi bwambukiranya imipaka.<\/p>\n

Ni ikiganiro cyabaye hashize igihe kirekire abacuruzi bo mu Karere ka Rusizi n\u2019abo mu mujyi wa Bukavu muri RDC bagaragaza imbogamizi bahura nazo, zituma badakora neza, cyane cyane imisoro iri hejuru.<\/p>\n

Impande zombi zemeranyije gukuraho inzitizi abacuruzi bagaragaje, kugira ngo ubucuruzi bwongere bukorwe neza.<\/p>\n

Gen. Kazura na Dan Munyuza muri Tanzania<\/strong><\/p>\n

Umugaba Mukuru w\u2019Ingabo z\u2019u Rwanda, Gen. Jean Bosco Kazura n\u2019Umuyobozi Mukuru wa Polisi y\u2019u Rwanda kuva tariki ya 10 kugeza ku ya 15 Gicurasi 2021 bagiriye uruzinduko muri Tanzania.<\/p>\n

Uyu musirikare n\u2019umupolisi bamaze iki gihe muri Tanzania bari mu biganiro byo gukomeza ubufatanye mu bijyanye n\u2019umutekano hagati y\u2019ibihugu byombi.<\/p>\n

U Rwanda na Tanzania byari bisanzwe bifitanye amasezerano y\u2019ubufatanye mu by\u2019umutekano, yasinywe i Dar es Salaam muri Mata 2018, ubwo Dr John Pombe Magufuli yari ku butegetsi.<\/p>\n

Uruzinduko rwa Perezida Ndayishimiye muri Uganda<\/strong><\/p>\n

Perezida w\u2019u Burundi, Evariste Ndayishimiye yagiriye uruzinduko muri Uganda rwakurikiye umuhango w\u2019irahira rya Perezida Yoweri Museveni yari yitabiriye tariki ya 12 Gicurasi 2021.<\/p>\n

Muri uru ruzinduko, Ndayishimiye yagiranye ikiganiro na Museveni, bishimira urwego umubano w\u2019ibihugu byombi uriho, ndetse banasezerana gufatanya mu guteza imbere urwego rw\u2019ubukungu.<\/p>\n

Mu bindi bemeranyije, harimo ubufatanye mu rwego rw\u2019umutekano, aho Perezida Museveni yabwiye Ndayishimiye ko azamwoherereza abashinzwe umutekano, bakabiganiraho mu buryo burambuye.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n