{"id":36280,"date":"2021-05-20T10:41:23","date_gmt":"2021-05-20T10:41:23","guid":{"rendered":"https:\/\/new.bwiza.com\/2021\/05\/20\/perezida-kagame-n-ubu-ntarumva-impamvu-yafungiwe-mu-bufaransa_gen-varret\/"},"modified":"2021-05-20T10:41:23","modified_gmt":"2021-05-20T10:41:23","slug":"perezida-kagame-n-ubu-ntarumva-impamvu-yafungiwe-mu-bufaransa_gen-varret","status":"publish","type":"post","link":"https:\/\/bwiza.com\/?p=36280","title":{"rendered":"Perezida Kagame n\u2019ubu ntarumva impamvu yafungiwe mu Bufaransa_Gen. Varret"},"content":{"rendered":"

Ku wa Kabiri tariki ya 18 Gicurasi 2021, Perezida Kagame yagiranye ikiganiro n\u2019abasirikare bari mu Rwanda mbere no mu gihe cya jenoside yakorewe Abatutsi, cyabereye i Paris aho aherereye ubu ngubu.<\/strong><\/p>\n

Muri aba basirikare harimo General Jean-Varret w\u2019imyaka 86 y\u2019amavuko, kuva mu 1990 kugeza mu 1993 akaba yari ashinzwe ubufatanye mu bya gisirikare hagati y\u2019u Bufaransa n\u2019u Rwanda.<\/p>\n

Muri iki kiganiro, Gen. Varret yanenze politiki y\u2019u Bufaransa muri icyo gihe, aho avuga ko butagombaga kurebera ubwicanyi bwakorerwaga mu Rwanda, bwacaga amarenga ko hashobora kubaho jenoside.<\/p>\n

Uyu musaza yavuze ko yagerageje kubwira Fran\u00e7ois Mitterrand wari Perezida w\u2019u Bufaransa ko akwiye guhindura politiki ye ku Rwanda, ariko ngo yanze kumwizera, amwima amatwi.<\/p>\n

Kutizerwa no kutumva inama kwa Mitterrand, kwababaje Gen. Varret, bituma ahitamo guceceka, bigeze mu 1993 yegura kuri izi nshingano. Yabwiye Perezida Kagame ati: \u201cBwari ubwa mbere mu kazi kannye abantu bari banze kunyizera. Ubwo mu 1993 nafashe icyemezo cyo guceceka maze ndegura.\u201d
\n\"kagame_paul.jpg\"<\/p>\n

Perezida Kagame ntarumva impamvu yafunzwe<\/strong><\/p>\n

Nyuma y\u2019ikiganiro na Perezida Kagame, Gen. Varret yagiranye ikindi n\u2019igitangazamakuru La Croix, agihishurira ibyo bavuganye n\u2019uyu Mukuru w\u2019Igihugu.<\/p>\n

Iki gitangazamakuru kiti \u201cPaul Kagame yababwiye ibiki?\u201d, Gen. Varret asubiza ati \u201cYatuganirije mu gihe kigera ku isaha, mu Cyongereza. Yadushimiye ko turi abantu bamufashije muri kirya gihe.\u201d<\/p>\n

Muri iki kiganiro, Gen. Varret yavuze ko Umukuru w\u2019Igihugu yagarutse ku buryo muri Nzeri 1991 yatawe muri yombi ubwo yari i Paris, yatumiwe mu biganiro by\u2019amahoro nk\u2019uwari uyoboye umutwe witwaje intwaro urwanya ubutegetsi bw\u2019u Rwanda, RPA-Inkotanyi.<\/p>\n

Gen. Varret yavuze ko Perezida Kagame yababwiye ko kugeza ubu atarumva impamvu icyo gihe yafungiwe mu Bufaransa. Ati: \u201cN\u2019ubu ntabwo arumva impamvu yatumye afungwa.\u201d<\/p>\n

Uko byagenze<\/strong><\/p>\n

Abarwanyi ba RPA-Inkotanyi batangije urugamba rwo kubohora u Rwanda mu 1990, bigera aho bajya mu mishyikirano y\u2019amahoro na Leta yariho, yabereye i Arusha muri Tanzania.<\/p>\n

Muri icyo gihe, u Bufaransa bwari bubogamiye ku ruhande rwa Leta y\u2019u Rwanda bwari bubereye inshuti y\u2019akadasohoka nk\u2019uko amateka abigaragaza.<\/p>\n

Raporo y\u2019u Rwanda iherutse gusohoka muri Mata 2021, igaragaza uruhare rw\u2019u Bufaransa kuri iki gihugu: mbere, mu gihe na nyuma ya jenoside yakorewe Abatutsi mu 1994 ikubiyemo ubuhamya bw\u2019abantu 230 barimo Perezida Kagame, irabishimangira.<\/p>\n

Iyi raporo ivuga ko mu gihe cy\u2019imishyikirano y\u2019Inkotanyi na Leta y\u2019u Rwanda, Paul Dijoud wari umujyanama wa Mitterrand yijeje Dr Casimir Bizimungu wari Minisitiri w\u2019Ububanyi n\u2019amahanga ko u Bufaransa bubashyigikiye muri byose.<\/p>\n

Ibyo Dijoud yabigaragaje muri Nzeri 1991 ubwo yari yakiriye intuma z\u2019Inkotanyi zari ziyobowe na Paul Kagame, bakagirana ikiganiro cyaranzwe n\u2019umwumvikane buke.<\/p>\n

Dijoud yasabye Kagame ko Inkotanyi zihagarika urugamba kuri Leta y\u2019u Rwanda, arabyanga, amusubiza ati \u201chari impamvu turwana, kandi tugomba kuyibonera umuti\u201d. <\/p>\n

Umujyanama wa Mitterrand yararakaye, abwira Kagame ko Inkotanyi nizitera, zikagera i Kigali, zizasanga abo mu miryango yazo barishwe. <\/p>\n

Ubwo izi ntumwa za RPA zari zikiri i Paris, Perezida Kagame yavuze ko ari bwo abapolisi bamusanze muri Hilton Hotel ari kumwe na bagenzi be, bamutunga imbunda, maze babata muri yombi, babafungira mu ishami rishinzwe kurwanya iterabwoba mu rwego rushinzwe iperereza, babashinja kuba mu mutwe w\u2019iterabwoba.<\/p>\n

Gusa kuri uwo munsi, abapolisi babafunguye nta kindi gisobanuro basabwe ku byaha bari bashinjwe.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n