{"id":36282,"date":"2021-05-20T09:40:02","date_gmt":"2021-05-20T09:40:02","guid":{"rendered":"https:\/\/new.bwiza.com\/2021\/05\/20\/tshisekedi-ntavuga-rumwe-na-perezida-kagame-kuri-mapping-report-na-dr-mukwege\/"},"modified":"2021-05-20T09:40:02","modified_gmt":"2021-05-20T09:40:02","slug":"tshisekedi-ntavuga-rumwe-na-perezida-kagame-kuri-mapping-report-na-dr-mukwege","status":"publish","type":"post","link":"https:\/\/bwiza.com\/?p=36282","title":{"rendered":"Tshisekedi ntavuga rumwe na Perezida Kagame kuri Mapping Report na Dr Mukwege"},"content":{"rendered":"

Perezida F\u00e9lix Antoine Tshisekedi wa Repububulika Iharanira Demokarasi ya Congo, yagaragaje ukutavuga rumwe na Perezida Paul Kagame w’u Rwanda kuri Mapping Report na Dr Denis Mukwege.<\/strong> <\/em><\/p>\n

Ku wa 01 Ukwakira 2010 ni bwo Komisiyo ya Loni ishinzwe Uburenganzira bwa Muntu yari ikuriwe n\u2019Umunyafurika y\u2019Epfo, Navi Pillay, yashyize hanze imbanzirizamushinga ya raporo yiswe \u201cMapping Report”.<\/p>\n

Iyi Raporo ivuga ku bwicanyi ndengakamere n\u2019ihohoterwa ry\u2019uburenganzira bwa muntu ryakorewe muri Repubulika Iharanira Demokarasi ya Congo hagati ya 1993 na 2003, igashinja u Rwanda kubigiramo uruhare rukomeye.<\/p>\n

Ingabo z’u Rwanda zishinjwa kugira uruhare muri ibyo byaha kumwe n’ingabo z’ibindi bihugu umunani, gusa u Rwanda rwakunze guhakana ibikubiye muri iyi raporo ruvuga ko ari ibinyoma, bijyanye n’uko igihe ingabo zarwo zishinjwa gukoreramo ibyaha zari zirajwe ishinga no gucyura impunzi zari zarahahungiye muri RDC no mu bindi bihugu.<\/p>\n

Perezida Tshisekedi mu ijoro ryakeye aganira na AFP, yavuze ko inzobere za Loni zakoze Mapping Report zitabogamye, ashimangira ko igihugu cye cyizeye ko umunsi umwe abagizweho ingaruka na biriya byaha bazahabwa ubutabera.<\/p>\n

Ati: “Mapping Report yakozwe n’impuguke z’umuryango w’abibumbye. RDC iracyafite icyizere ko abantu bose bazize iryo hohoterwa mu Burasirazuba bw’igihugu bazahabwa ubutabera.”<\/p>\n

Perezida Tshisekedi abajijwe niba hari icyo yavuga ku biheruka gutangazwa na Perezida Kagame wabeshyuje ibikubiye muri Mapping Reportko, yavuze ko atagambiriye guteza impaka.<\/p>\n

Ati: “Nta mpaka ndi guteza. Ntabwo ngomba gukoresha itangazamakuru kugira ngo nsubize Perezida Kagame. Mfite ubundi buryo, kandi nzabukoresha, kugira ngo tuvugane.”<\/p>\n

Umukuru w’Igihugu cya RDC yakomeje avuga ko bibaye byiza Perezida Kagame yatanga ubufasha kugira ngo abishwe bahabwe ubutabera.<\/p>\n

Ati: “Ku bwanjye rwose byaba ari ibintu byiza Perezida Kagame abashije gufasha ngo ibyo bibe, kuko kugeza ubu nta muntu urahamwa [n’ibyo iyo raporo ivuga], rero birakwiye ko habaho kwemera ubucamanza kuko abo [Kagame] avuga ko ari abere urukiko ni rwo rwabagira abere.”<\/p>\n

Perezida Tshisekedi yunzemo ati: “Ndashaka ko amahoro n’umutekano biganza mu burasirazuba bwa Repubulika Iharanira Demokarasi ya Congo. Bizasaba ubutabera kugira ngo hamenyekane abanyabyaha.”<\/p>\n

Perezida Kagame mu kiganiro aheruka kugirana na France 24 na RFI, yari yavuze ko ibirego bishinja ingabo z’u Rwanda kugira uruhare mu byaha byakorewe mu Burasirazuba bwa RDC nta shingiro bifite, kuko \u2018Mapping Report\u2019 yabikwirakwije idafututse ubwayo, ndetse yagiweho impaka inshuro nyinshi.<\/p>\n

Ati: “Nk\u2019uko ubizi, Mapping Report yagiweho impaka cyane kandi yamaganwa n\u2019abantu bo muri Repubulika Iharanira Demokarasi ya Congo no mu bihugu by\u2019ibituranyi. Yavanzwe n\u2019inyungu za politiki cyane ku mpamvu zitoroshye kuzisobanura.”<\/p>\n

Umukuru w\u2019Igihugu yavuze ko Dr Dennis Mukwege wakunze gushyira mu majwi ingabo za RDF azishinja kugira uruhare mu bwicanyi, ari umwe mu bikoresho byo gukwirakwiza ibyo bitekerezo kuko ari umuntu ufite ijwi ryumvwa na benshi, nyuma yo guhabwa Igihembo cy’Amahoro cyitiriwe Nobel.<\/p>\n

Ati: “Hari ibintu byakabirijwe, birazanwa, ndatekereza ko Mukwege yagizwe igikoresho cy\u2019abo bantu tutabona, yahawe igihembo cya Nobel kugira ngo abwirwe ibyo avuga bizagira ingaruka ku bitekerezo by\u2019abantu. Ariko [iyo raporo] ntiyumvikanyweho, kandi yaramaganywe cyane.”<\/p>\n

Perezida Kagame yakomeje asobanura ko n\u2019ubwo \u2018Mapping Report\u2019 ari yo yamenyekanye cyane, ariko hari n\u2019izindi raporo zamaganye ibiyikubiyemo.<\/p>\n

Bitandukanye n’ibyatangajwe na Perezida Kagame, Perezida Tshisekedi we asanga Dr Denis Mukwege ari ishema kuri Repubulika Iharanira Demokarasi ya Congo.<\/p>\n

Ati: “Dr Denis Mukwege ni ishema ry’igihugu. Afite urukundo rwanjye rwose kandi turashima akazi akorera abarenganyijwe.”<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n