{"id":36288,"date":"2021-05-20T11:58:56","date_gmt":"2021-05-20T11:58:56","guid":{"rendered":"https:\/\/new.bwiza.com\/2021\/05\/20\/urusasu-rw-abanyarwanda-rutandukanye-n-urw-abakongomani_mukandutiye-wa-fln\/"},"modified":"2021-05-20T11:58:56","modified_gmt":"2021-05-20T11:58:56","slug":"urusasu-rw-abanyarwanda-rutandukanye-n-urw-abakongomani_mukandutiye-wa-fln","status":"publish","type":"post","link":"https:\/\/bwiza.com\/?p=36288","title":{"rendered":"Urusasu rw\u2019Abanyarwanda rutandukanye n\u2019urw\u2019Abakongomani_Mukandutiye wa FLN"},"content":{"rendered":"

Kuri uyu wa 20 Gicurasi 2021, Urukiko Rukuru, urugereko rwihariye ruburanisha ibyaha by\u2019iterabwoba n\u2019ibyambukiranya umupaka, rwumvise ubwiregure bw\u2019abahoze ari abarwanyi b\u2019umutwe witwaje intwaro wa FLN urwanya ubutegetsi bw\u2019u Rwanda.<\/strong><\/p>\n

Urubanza rwatangiye humvwa ubwiregure bwa Angelina Mukandutiye, umugore umwe rukumbi uri mu baregwa, uyu akaba yari ashinzwe kwinjiza ab\u2019igitsinagore muri uyu mutwe nk\u2019uko ubwe yabyemereye urukiko.<\/p>\n

Mukandutiye yasobanuye uko yisanze mu Rwanda, avuye mu burasirazuba bwa Repubulika ya Demukarasi ya Congo (RDC), aho uyu mutwe n\u2019indi irwanya ubutegetsi bw\u2019u Rwanda yashinze ibirindiro.<\/p>\n

Uyu mukecuru yavuze ko muri RDC, yabaye muri Teritwari ebyiri zo mu Ntara ya Kivu y\u2019Amajyaruguru (Nord Kivu), ari zo: Rutshuru na Masisi, hakaba ari naho FLN yari ishamikiye ku mutwe wa politiki wa CNRD yari igizwe n\u2019abiyomoye kuri FDLR, yari ifite ibirindiro.<\/p>\n

Mukandutiye yavuze ko hagati mu Kuboza 2019 we na bagenzi be bahuye n\u2019ibihe bitoroshye, kuko bagoswe, batswaho umuriro w\u2019amasasu, bava mu gace kitwa Falinga muri Masisi, bahungira muri Teritwari ya Kalehe mu Ntara ya Kivu y\u2019Amajyepfo (Sud Kivu).<\/p>\n

Yageze aho avuga ati: \u201cAriko iyo mbabwiye icyo kibatsi, ubu mu mutwe wanjye haratukura. Kuko umuriro twakubitanye na wo nta handi nari narawumvise muri Congo. Urusasu rw\u2019Abanyarwanda rutandukanye n\u2019urw\u2019Abakongomani! Ubwo icyo kibatsi cyaduhagurukije, ni mu kwezi kwa 12, 2019 ni bwo twahagurutse.\u201d<\/p>\n

Yakomeje avuga ko hari ubwo ingabo z\u2019Umuryango w\u2019Abibumbye ziri mu butumwa bw\u2019amahoro muri RDC (MONUSCO) zari zarabasuye, ariko zabanje kuhazenguruka. Ngo uko zahazengurutse, ni nako ibitero byabagabweho, hashize ibyumweru bibiri zibasuye.<\/p>\n

Ati: \u201cHa handi baje kudusura aba MONUSCO rero, uko bahazengurutse, ni ko na attaques zakozwe. Ku buryo badusigiye akarembo kamwe ko kwambukira ahantu bita muri Lutale. Iryo rembo twese twarahagurutse, baradushoreraaa, yewe, ubwo njye nagiye kwibona, mbona ndi i Nyarushishi.\u201d<\/p>\n

Asubiye inyuma ku buryo barashweho, Mukandutiye yagize ati: \u201cNi ukuvuga ngo twashorewe n\u2019amasasu, batuyobora muri Sud Kivu, twabaga muri Nord Kivu. Wenda iyo tuza gutaha neza, twari guhinguka i Goma ariko noneho batuyoboye muri Sud Kivu, ku buryo twahingutse i Bukavu.\u201d<\/p>\n

Ubwo bahungaga ibi bitero, we avuga ko yavunikiye mu nzira, agenda wenyine mu mashyamba, abandi bamusize. Ku bw\u2019amahirwe, ngo yaje guhura n\u2019Abanyekongo bamugeza ku kigo cya gisirikare cya Kadasomwa, ahasanga abandi Banyarwanda 28, ati \u201cNa bo batakaye nkanjye.\u201d<\/p>\n

Ku munsi wakurikiyeho, abasirikare ba RDC ngo babajyanye ku kindi kigo atibuka izina ryacyo, bamaramo icyumweru, nyuma bajyanwa ku kindi cyitwa Kinyamunyunyu.<\/p>\n

Abari bahungiye mu mashyamba arimo Kahuzi-Biega nabo ngo bagiye bayasohokamo, bagenda bahurizwa muri iyi nkambi, kugeza ubwo bohorejwe mu nkambi ya Nyarushishi iherereye mu Karere ka Rusizi mu Rwanda.<\/p>\n

Mukandutiye yavuze ko bagenzi be boherejwe mu kigo cya Mutobo giherereye mu Ruhengeri (mu Karere ka Musanze), cyakira abari abasirikare bari muri gahunda yo gusubizwa mu buzima busanzwe. We yatawe muri yombi, afungirwa muri gereza ya Mageragere kugira ngo arangize igihano cy\u2019igifungo cya burundu yari yarakatiwe n\u2019Urukiko Gacaca, adahari.<\/p>\n

Muri uru rubanza, Mukandukiye aregwa kuba yarinjiye mu “mutwe w’iterabwoba”, ijambo avuga ko yumvise bwa mbere rivugwa n’ubushinjacyaha bw’u Rwanda.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n