{"id":36340,"date":"2021-05-21T18:15:02","date_gmt":"2021-05-21T18:15:02","guid":{"rendered":"https:\/\/new.bwiza.com\/2021\/05\/21\/red-tabara-irashinja-ingabo-z-u-burundi-kwifatanya-na-fdlr-gumino-na-twirwaneho\/"},"modified":"2021-05-21T18:15:02","modified_gmt":"2021-05-21T18:15:02","slug":"red-tabara-irashinja-ingabo-z-u-burundi-kwifatanya-na-fdlr-gumino-na-twirwaneho","status":"publish","type":"post","link":"https:\/\/bwiza.com\/?p=36340","title":{"rendered":"RED Tabara irashinja ingabo z\u2019u Burundi kwifatanya na FDLR, Gumino na Twirwaneho"},"content":{"rendered":"

Umutwe witwaje intwaro wa RED Tabara urashinja ingabo z\u2019u Burundi kwifatanya n\u2019uwa FDLR ukomoka mu Rwanda, Gumino na Twirwaneho yiganjemo Abanyamulenge, mu guteza umutekano muke muri Repubulika ya Demukarasi ya Congo (RDC).<\/strong><\/p>\n

Bigaragara mu itangazo ryashyizweho umukono n\u2019Umuvugizi w\u2019uyu mutwe urwanya ubutegetsi bw\u2019u Burundi, Patrick Nahimana, kuri uyu wa 20 Gicurasi 2021.<\/p>\n

Muri iri tangazo, RED Tabara yibukije Abarundi impamvu yatumye ibaho, by\u2019umwihariko ngo kuba abatavuga rumwe n\u2019ubutegetsi bw\u2019ishyaka CNDD-FDD badahabwa urubuga, bangwa, bigatuma bahohoterwa, bagafungwa, bamwe bakajya mu buhungiro.<\/p>\n

RED Tabara ivuga ko CNDD-FDD ikorana na FDLR \u201cyakoreye Abatutsi jenoside mu Rwanda\u201d, ikomeza iti \u201cYakunze kwinjira muri Kivu y\u2019Amajyepfo, muri RDC\u201d, ikayishinja no kwica impunzi z\u2019Abarundi ziba muri Tanzania.<\/p>\n

Uyu mutwe uvuga ko ubwo iri shyaka ryajyaga ku butegetsi mu 2005, intambara muri Kivu y\u2019Amajyepfo yarahagaze, iti: \u201cKubera ko amahoro ari mu Burundi, aba ari no muri Kivu y\u2019Amajyepfo.\u201d<\/p>\n

Gusa ngo ubwo iri shyaka ryagumaga ku butegetsi ku ngufu, mu Burundi habayeho amatora arimo ubujura, CNDD-FDD yirukana abatavuga rumwe na yo, bituma umutekano wongera kuzamba mu karere.<\/p>\n

RED Tabara ivuga ko ingabo z\u2019u Burundi zatangiye kwinjira ku butaka bwa RDC, zikurikirana abahunze, iti \u201cCNDD-FDD yateje umutekano muke muri Kivu y\u2019Amajyepfo.\u201d<\/p>\n

Uyu mutwe ufite ibirindiro mu ntara ya Kivu y\u2019Amajyepfo, uvuga ko Leta y\u2019u Burundi iha intwaro umutwe witwaje intwaro wa Gumino ndetse na Twirwaneho, ikifatanya n\u2019ingabo zabwo na FDLR mu kuwurwanya.<\/p>\n

Iti: \u201cBahaye intwaro imitwe yitwaje intwaro y\u2019Abanyamulenge ya Gumino na Twirwaneho muri Kivu y\u2019Amajyepfo, bohereza abasirikaee n\u2019abarwanyi b\u2019Interahamwe kugira ngo bifatanye kurwanya RED-Tabara.\u201d<\/p>\n

Uyu mutwe watangaje ko nta kindi usaba Leta y\u2019u Burundi, keretse gusa kugirana ibiganiro n\u2019abatavuga rumwe nayo, kugira ngo amatora anyuze mu mucyo abeho.<\/p>\n

Ingabo z’u Burundi zavuzwe muri RDC kenshi, Leta yo ntibyemera<\/strong><\/p>\n

Kuva mu 2019, hasohotse raporo zitandukanye zirebana n’umutekano, zivuga ko ingabo z’u Burundi ziri muri Kivu y’Amajyepfo, aho zagiye guhiga imitwe yitwaje intwaro irwanya Leta iriho; irimo RED-Tabara na FOREBU.<\/p>\n

Gusa muri Mata 2020, Umuvugizi w’Ibiro by’Umukuru w’Igihugu w’u Burundi, Jean Claude Karerwa Ndenzako yarabihakanye, avuga ko igihugu cye kidashobora kohereza ingabo mu kindi gihugu, kitabisabwe n’imiryango mpuzamahanga.<\/p>\n

Karerwa agize ati: “Keretse bisabwe gusa n’Ubumwe bwa Afurika cyangwa Umuryango w’Abibumbye, u Burundi ntibushobora kohereza ingabo mu kindi gihugu.”<\/p>\n

Mu gihe u Burundi bukivuga ko nta ngabo zabwo ziri muri RDC, impuguke z’Umuryango w’Abibumbye muri Werurwe 2021 zasohoye raporo ivuga zifite ibimenyetso bifatika bigaragaza ko izi ngabo ziriyo. <\/p>\n

Mu bimenyetso izi mpuguke zifite, harimo: amafoto n’amashusho byafatiwe mu kirere ndetse n’ubuhamya bw’abantu banyuranye barimo abasirikare ba RDC, abarwanyi b’imitwe yitwaje intwaro n’abaturage.<\/p>\n

RED-Tabara irashinjwa kwibasira Abanyamulenge<\/strong><\/p>\n

Abanyamulenge batuye muri Teritwari ya Fizi muri Kivu y’Amajyepfo bamaze igihe kirenga imyaka itatu bavuga ko bahohoterwa n’imitwe yijwaje intwaro igambiriye kubatsemba.<\/p>\n

Iyo bavuga irimo Mai Mai zitandukanye n’ikomoka mu Burundi, ari yo: RED Tabara, FOREBU na FNL.<\/p>\n

Ku rundi ruhande, Abanyamulenge bagiye bahakana ko Twirwaneho atari umutwe witwaje intwaro nk’uko RED-Tabara ibivuga, ahubwo ngo ni bo bihuje, bagamije gukumira ibitero bagabwaho n’iyi mitwe yitwaje intwaro.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n