{"id":36389,"date":"2021-05-24T07:00:27","date_gmt":"2021-05-24T07:00:27","guid":{"rendered":"https:\/\/new.bwiza.com\/2021\/05\/24\/perezida-kagame-mu-bufaransa-macron-mu-rwanda-dr-mukwege-n-ingabo-za-uganda\/"},"modified":"2021-05-24T07:00:27","modified_gmt":"2021-05-24T07:00:27","slug":"perezida-kagame-mu-bufaransa-macron-mu-rwanda-dr-mukwege-n-ingabo-za-uganda","status":"publish","type":"post","link":"https:\/\/bwiza.com\/?p=36389","title":{"rendered":"Perezida Kagame mu Bufaransa, Macron mu Rwanda, Dr Mukwege n\u2019ingabo za Uganda muri RDC \u2018mu ibanga\u2019; mu nkuru z\u2019icyumweru"},"content":{"rendered":"

Icyumweru gishize cyatangiye tariki ya 17 Gicurasi 2021 cyaranzwe n\u2019amakuru atandukanye, yiganjemo arebana na politiki by\u2019umwihariko mu bubanyi n\u2019amahanga, siyansi, umutekano ndetse n\u2019ubuzima bw\u2019umuryango.<\/strong><\/p>\n

Ay\u2019ingenzi yakiranze ni akurikira:<\/p>\n

Perezida Kagame mu Bufaransa, Macron mu Rwanda<\/strong><\/p>\n

Perezida wa Repubulika y\u2019u Rwanda, Paul Kagame yagiriye uruzinduko mu Bufaransa kuva tariki ya 16 Gicurasi 2021, aho yari yitabiriye inama mpuzamahanga zirimo irebana n\u2019ubukungu bwa Afurika.<\/p>\n

Muri uru ruzinduko yamazemo iminsi igera kuri itanu, Perezida Kagame yagiranye ibiganiro n\u2019abahagarariye imiryango mpuzamahanga n\u2019abakuru b\u2019ibihugu barimo Emmanuel Macron w\u2019u Bufaransa.<\/p>\n

Mu gihe Perezida Kagame yari akiri mu Bufaransa, Perezida Macron yavuze ko tariki ya 27 n\u2019iya 28 Gicurasi 2021 azagirira uruzinduko mu Rwanda, asure ahantu hatandukanye, aganire na mugenzi we, akazasiga ashyizeho n’uhagararira igihugu cye mu Rwanda.<\/p>\n

Ijambo rya Perezida Kagame kuri Dr Mukwege<\/strong><\/p>\n

Ubwo Perezida Kagame yari akiri muri ruzinduko, yabajijwe n\u2019abanyamakuru ba France 24 na RFI ibya \u2018Rapport Mapping\u2019 yakozwe n\u2019impuguke z\u2019Umuryango w\u2019Abibumbye, zivuga ko ingabo z\u2019u Rwanda zakoze ibyaha by’ubwicanyi muri RDC mu myaka irenga 20 ishize.<\/p>\n

Icyo gihe Umukuru w\u2019Igihugu yasubije ko nta byaha izi ngabo zakoreye muri RDC, asobanura ko abafite imyumvire y\u2019uko habayeho jenoside ebyiri ari bo bazibishinja.<\/p>\n

Perezida Kagame yabajijwe kuri Dr Denis Mukwege usaba ko abo iyi raporo ivuga ko bakoze ibyaha bakurikiranwa n\u2019ubutabera, asubiza uyu muganga yahindutse igikoresho cy\u2019imbaraga \u201ctutabona\u201d.<\/p>\n

Umukuru w\u2019Igihugu yanavuze ko uyu muganga yahawe igihembo cyitiriwe Nobel kugira ngo ajye abwirwa ibyo avuga.<\/p>\n

Uganda yaba yarohereje ingabo muri RDC mu ibanga<\/strong><\/p>\n

Ibitangazamakuru byo muri Uganda byahishuye ko abasirikare ba Uganda baba baramaze koherezwa mu burasirazuba bwa RDC kugira ngo bafashe iki gihugu kurwanya imitwe yitwaje intwaro imaze igihe ihakorera.<\/p>\n

Ni amakuru Umuvugizi w\u2019ingabo za Uganda, Brig. Gen. Flavia Byekwaso yari yahakaniye ibiro ntaramakuru by\u2019Abongereza, Reuters, tariki ya 17 Gicurasi, wasobanuye ko ibihugu byombi bizafatanya gusa mu guhererekanya amakuru y\u2019ubutasi.<\/p>\n

Imwe mu mpamvu nyamukuru bivugwa ko yajyanye abasirikare ba Uganda muri RDC ni ukugira ngo zirinde umutekano w\u2019ibikorwa by\u2019ubwubatsi bw\u2019imihanda ihuza ibihugu byombi.<\/p>\n

Iruka rya Nyiragongo nyuma y’imyaka 19<\/strong><\/p>\n

Ikirunga cya Nyiragongo giherereye mu Ntara ya Kivu y\u2019Amajyaruguru muri Repubulika ya Demukarasi ya Congo (RDC) hafi y\u2019umujyi wa Goma, tariki ya 22 Gicurasi 2021 cyongeye kuruka nyuma y\u2019imyaka igera kuri 19.<\/p>\n

Iruka rya Nyiragongo ryatumye abatuye i Goma babarirwa mu 200,000 bahunga, abenshi muri bo bahungira mu Rwanda bitewe n\u2019impungenge bari bafite ko amahindure yacyo agera mu ngo zabo.<\/p>\n

Abapfuye bazize iki kiza byatangajwe ko ari 13 barimo 9 bakoze impanuka ubwo bahungiraga mu muvundo, inzu zasenyutse zo zirabarirwa muri 500 nk\u2019uko ibitangazamakuru byo muri RDC bibivuga.<\/p>\n

Umugeni yigishije bagenzi be uburyo bwo kuzigamira urugo rushya<\/strong><\/p>\n

Umugeni w\u2019imyaka 26 y\u2019amavuko witwa Nyirahabimana Edith wo mu Karere ka Nyamasheke, yagaragaye atega imodoka irimo abagenzi, yambaye agatimba, asobanurira Bwiza ko yabikoze mu rwego rwo kuzigamira urugo rushya agiye kubaka, no guha isomo bagenzi be b\u2019ubushobozi buke batekereza gukora ibihenze kandi batabishoboye.<\/p>\n

Nyirahabimana yategeye iyi modoka ya \u2018coaster\u2019 ahitwa Rwesero muri aka karere tariki ya 21 Gicurasi, ubwo yari agiye gusezeranira imbere y\u2019Imana n\u2019umukunzi we Habiyaremye Emmanuel kuri Paruwasi Gatolika ya Tyazo, aherekejwe n\u2019abantu umunani.<\/p>\n

Ni igikorwa cyabanje gutungura abagenzi, ariko baza kumwemerera kwinjira, baramwishimira, baramuririmbira. Bose bahakuye isomo ryo kutigora mu gihe cy\u2019ubukwe no gukoresha ubushobozi buri wese afite, umugeni ati \u201ckubana biva mu rukundo, ntibiva mu gukora ubukwe buhenze.\u201d<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n