{"id":36580,"date":"2021-05-28T09:36:36","date_gmt":"2021-05-28T09:36:36","guid":{"rendered":"https:\/\/new.bwiza.com\/2021\/05\/28\/ab-i-rubavu-batewe-ubwoba-n-irindi-ruka-rya-nyiragongo-rishoboka-ngo-barimo\/"},"modified":"2021-05-28T09:36:36","modified_gmt":"2021-05-28T09:36:36","slug":"ab-i-rubavu-batewe-ubwoba-n-irindi-ruka-rya-nyiragongo-rishoboka-ngo-barimo","status":"publish","type":"post","link":"https:\/\/bwiza.com\/?p=36580","title":{"rendered":"Ab\u2019i Rubavu batewe ubwoba n\u2019irindi ruka rya Nyiragongo rishoboka, ngo barimo kumva ibimenyetso"},"content":{"rendered":"

Nyuma y\u2019itangazo rya Guverineri w\u2019Intara ya Kivu y\u2019Amajyaruguru muri Repubulika ya Demukarasi ya Congo (RDC) riburira abatuye mu mujyi wa Goma ko ikirunga cya Nyiragongo gishobora kongera kurukira no munsi y\u2019ikiyaga cya Kivu, ab\u2019i Rubavu mu Rwanda bavuga ko bafite ubwoba ko cyabarukira, kuko ngo hari n\u2019ibimenyetso barimo kumva.<\/strong><\/p>\n

Uyu Guverineri, Lt. Gen. Constant Ndima yatanze uyu muburo tariki ya 26 Gicurasi 2021, anasaba abatuye mu midugudu 10 y\u2019i Goma kwimukira mu mujyi wa Sake uri mu burengerazuba, mu bilometero bibarirwa muri 20, mu rwego rwo kwirinda ingaruka z\u2019iruka rishoboka.
\n\"goma_giseny.jpg\"<\/p>\n

Bamwe mu batuye i Rubavu (Gisenyi), baganiriye n\u2019umunyamakuru wa Radiyo Ijwi rya Amerika, bavuze ko bafite ubwoba ko iki kirunga gishobora kurukira iwabo, cyangwa se mu gihe cyarukira mu kiyaga cya Kivu, amahindure agahura na gazi methane cyangwa carbonique zirimo, nabo bakaba bagirwaho ingaruka zikomeye.<\/p>\n

Umwe yagize ati: \u201cImpungenge zo zirahari kuko isaha ku isaha gishobora kuzamukira ahantu tutazi muri uyu mujyi wa Gisenyi.\u201d <\/p>\n

Undi muturage yatangaje ko hari imyuka mibi iri kuzamuka ahasadutse ubutaka bitewe n\u2019imitingito imaze iminsi miri aka karere, ngo icyo kikaba ari ikimenyetso ko amahindure y\u2019ikirunga yahazamukira. Ati: \u201cBizamuka binuka, mbese ni ibintu bimeze nk\u2019ibividanje. Ni ko turi kubitekereza ko bishobora kuduturikiraho.\u201d<\/p>\n

Hari uvuga ko asobanukiwe neza isano iri hagati y\u2019uyu mwuka n\u2019iruka ry\u2019ikirunga, ati: \u201cHa hantu hasadutse umutingito uri gukunda gukubitira cyane, hari kuvamo umwuka uri kunuka neza neza nka wa mwuka wa cya gikoma cya magma. 2002 nigiriye i Goma, niboneye magma, ukuntu inuka ndakuzi.\u2019<\/p>\n

Bwaba ari ubwoba bw\u2019ubusa?<\/strong><\/p>\n

Alain Joseph Ntege ukora mu kigo cy\u2019u Rwanda gishinzwe ubucukuzi bw\u2019amabuye y\u2019agaciro, ibikomoka kuri peteroli na gazi, yahumurije abatuye i Rubavu, avuga ko nta kimenyetso cyerekana ko iki kirunga cyarukira iwabo nk\u2019uko babigaragaje mu mpungenge.<\/p>\n

Ntege yagize ati: \u201cMuhumurize abaturage ko nta kibazo kiragaragara cy\u2019imyuka isohokamo.\u201d <\/p>\n

Nk\u2019umwe mu bari mu bushakashatsi ku myitwariye ya Nyiragongo, yavuze ko iki kigo kiri gukorana n\u2019icy\u2019i Goma gishinzwe gukora ubushakashatsi ku myitwarire y\u2019ibirunga, OVG, ati: \u201cKandi na bagenzi bacu bo muri Congo bo mu kigo cyitwa OVG ntabyo baratubwira.\u201d<\/p>\n

Ku kijyanye n\u2019iruka rishoboka munsi ya Kivu, Ntege yagize ati: \u201cIki kiyaga cyacu, gazi dufite ntabwo iri hano hejuru, iri kure. Buriya iyi Lac Kivu ntabwo ahantu hose harimo iriya gazi. Ikirunga aho cyamanukira, ntabwo ari ho hari iyo gazi ubu none aha.\u201d<\/p>\n

Nyuma yo kumva ibisobanuro bya Ntege, aba baturage bavuga ko bitumvikana, kuko nta kuntu ab\u2019i Goma baba bakomeje guhunga babisabwe n\u2019abayobozi babo, bikanga ubusa. Umwe ati: \u201cAbantu barimo barahunga, ntabwo bahunga ubusa\u201d.<\/p>\n

Abashakashatsi bari kuri Nyiragongo, nta \u2018bwoba\u2019 bafite<\/strong><\/p>\n

Amakuru Bwiza ikura muri OVG avuga ko abashakashatsi bayo bari kujyanwa na kajugujugu, zabageza hafi y\u2019ikirunga, bakurira ikirunga, bazamukiye mu cyerekezo kitigeze kirukiramo. Icyabajyanyeyo ni ukugira ngo bamenye niba iki kirunga gishobora kongera kuruka nk\u2019uko bari babitangarije Guverineri Gen. Ndima.<\/p>\n

Aba bashakashatsi bari kuri Nyiragongo mu rukerera rw\u2019uyu wa 28 Gicurasi 2021, bavuga ko iki kirunga cyazimye, imitingito imaze hafi icyumweru yumvikana ikaba yaterwaga n\u2019uko ubwo cyarukaga, nta mahindure na make yagisigayemo. Umukozi wo muri OVG yagize ati: \u201cImitingito twumvaga mu gihe cyarukaga ni uko cyasigayemo ubusa. Ni nka kwa kundi umwana warize cyane asigara ari guhogora.\u201d<\/p>\n

Nyiragongo yarutse tariki ya 22 Gicurasi 2021, yica abantu b\u2019i Goma 32, amahindure yayo asenya inzu zibarirwa mu 1200. Yaherukaga kuruka mu 2002 ubwo yicaga ababarirwa muri 250.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n