{"id":36826,"date":"2021-06-03T09:35:50","date_gmt":"2021-06-03T09:35:50","guid":{"rendered":"https:\/\/new.bwiza.com\/2021\/06\/03\/ntamuhanga-cassien-yaba-afungiwe-muri-ambasade-y-u-rwanda\/"},"modified":"2021-06-03T09:35:50","modified_gmt":"2021-06-03T09:35:50","slug":"ntamuhanga-cassien-yaba-afungiwe-muri-ambasade-y-u-rwanda","status":"publish","type":"post","link":"https:\/\/bwiza.com\/?p=36826","title":{"rendered":"Ntamuhanga Cassien yaba afungiwe muri Ambasade y’u Rwanda"},"content":{"rendered":"

Umuyobozi w’ikigo gishinzwe demukarasi n’iterambere muri Mozambique, Prof. Adrien Nuvunga yatangaje ko Ntamuhanga Cassien watorotse gereza, ubu afungiwe muri Ambasade y’u Rwanda muri iki gihugu.<\/strong><\/p>\n

Prof. Nuvunga yabitangarije mu kiganiro yagiranye na radiyo mpuzamahanga y’Abafaransa, RFI, nk’uko bigaragara mu nkuru yayo yasohotse mu gitondo cy’uyu wa 3 Kamena 2021.<\/p>\n

Prof. Nuvunga avuga ko uburyo Ntamuhanga yatawemo muri yombi budakurikije amategeko, ko no gufungirwa muri Ambasade biremewe. Ati: “Byakozwe nta mucyo, nta cyerekana ko hari urupapuro rwo guta muri yombi uyu Munyarwanda uba muri Mozambique rwasohowe n’umucamanza. Kandi birushijeho kuba bibi kuko yimuriwe kuri Ambasade y’u Rwanda.”<\/p>\n

Yakomeje ati: “Ambasade ntizigomba guhinduka gereza, ariko kuri iki kibazo turabona ko Ambasade zatangiye gukoreshwa mu gufunga abaturage.”<\/p>\n

Uyu munyapolitiki yasabye guverinoma ya Mozambique ko kutohereza Ntamuhanga mu Rwanda, kuko ngo ibaye ibikoze, ntabwo byaba byemewe n’amategeko. Ikindi, ngo ahangayikishijwe n’uburyo yazafatwa mu gihe yaba ageze mu Rwanda.<\/p>\n

Bivugwa ko inzego zishinzwe umutekano muri Mozambique zataye muri yombi Ntamuhanga tariki ya 23 Gicurasi 2021. <\/p>\n

Ni amakuru yaje kwemezwa n’umuryango Ntamuhanga yashinze witwa RANP Abaryankuna, hashize iminsi igera kuri itatu, gusa uvuga ko utazi abamutaye muri yombi n’impamvu babikoze.<\/p>\n

Kugeza ubu ntacyo Leta ya Mozambique cyangwa iy’u Rwanda ziratangaza ku itabwa muri yombi rya Ntamuhanga.<\/p>\n

Ntamuhanga Cassien yatorotse gereza ya Mpanga iri mu Karere ka Nyanza mu Kwakira 2017, aho yari afungiwe ibyaha by’iterabwoba. Yahungiye muri Mozambique, ahabwa icyangombwa cy’ubuhunzi.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n