{"id":36986,"date":"2021-06-08T08:38:47","date_gmt":"2021-06-08T08:38:47","guid":{"rendered":"https:\/\/new.bwiza.com\/2021\/06\/08\/umuryango-wo-muri-usa-urasaba-ko-abayobozi-babiri-mu-rwanda-bafatirwa-ibihano\/"},"modified":"2021-06-08T08:38:47","modified_gmt":"2021-06-08T08:38:47","slug":"umuryango-wo-muri-usa-urasaba-ko-abayobozi-babiri-mu-rwanda-bafatirwa-ibihano","status":"publish","type":"post","link":"https:\/\/bwiza.com\/?p=36986","title":{"rendered":"Umuryango wo muri USA urasaba ko abayobozi babiri mu Rwanda bafatirwa ibihano kubera Rusesabagina"},"content":{"rendered":"

Umuryango Lantos Foundation uhirimbanira uburenganzira bw\u2019ikiremwamuntu urasaba Leta Zunze Ubumwe za Amerika (USA) gufatira ibihano Minisitiri w\u2019Ubutabera akaba n\u2019Intumwa Nkuru ya Leta y\u2019u Rwanda, Busingye Johnston n\u2019Umunyamabanga Mukuru w\u2019Urwego rw\u2019Ubugenzacyaha, Col. Jeannot Ruhunga.<\/strong><\/p>\n

Bigaragara mu rwandiko uyu muryango wasohoye ku rubuga rwawo kuri uyu wa 7 Kamena 2021 uvuga ko wagejeje mu biro bya Minisiteri y\u2019Ububanyi n\u2019Amahanga n\u2019iby\u2019ikigega cya USA tariki ya 18 Gicurasi 2021, ushinja aba bayobozi kugira uruhare \u201cmu kutubahiriza uburenganzira bwa Paul Rusesabagina nk’ikiremwamuntu_binyuze mu kumwohereza mu buryo ndengakamere no kumushimuta muri Kanama 2020.\u201d<\/p>\n

Dr Lantos Swett uyoboye uyu muryango yavuze ko bafite ibimenyetso bidashidikanywaho byerekana uruhare rw\u2019aba bayobozi mu kutubahiriza uburenganzira bwa Rusesabagina nk\u2019ikiremwamuntu, ibyo bikaba bikubiye muri uru rwandiko, agasaba ko USA yabishingiraho ibafatira ibihano.<\/p>\n

Yagize ati: \u201cUrwandiko rwa Lantos Foundation rwoherejwe muri Minisiteri y\u2019Ububanyi n\u2019Amahanga no mu kigega rwerekana ikimenyetso gishimangira ko aba bantu bakwiye kuryozwa ishimutwa rya Rusesabagina_ukutubaha kugaragara kw\u2019amasezerano mpuzamahanga ya UN akumira izimiza ry\u2019abantu.\u201d<\/p>\n

“Rusesabagina yashutswe n\u2019inshuti ye” Busingye<\/strong><\/p>\n

Mu mpera za Gashyantare 2020, Minisitiri Busingye yagiranye ibiganiro bibiri n\u2019umunyamakuru Marc Lamont Hill wa Aljazeera mu minsi ibiri yakurikiranye, byerekeye uburyo Rusesabagina yageze mu Rwanda, agatabwa muri yombi.<\/p>\n

Ubwa mbere Minisitiri Busingye yasobanuye ko nta ruhare Leta y\u2019u Rwanda yagize mu kuza kwa Rusesabagina, avuga ko ahubwo uyu musaza w\u2019imyaka 66 y\u2019amavuko yashutswe n\u2019inshuti ye yakorwagaho iperereza na RIB, yisanga muri iki gihugu.<\/p>\n

Ku nshuro ya kabiri, yabajijwe uwishyuye indege yihariye yagejeje Rusesabagina mu Rwanda, asubiza ko ari Leta, gusa ikaba yarabikoze mu buryo bwo gufasha iyi nshuti yashutse Rusesabagina.<\/p>\n

Yasubije umunyamakuru ati: \u201cNakubwiye ko hari umuntu wakoranye na Paul Rusesabagina igihe kirekire akaba yarakorwagaho iperereza n\u2019inzego zacu zibishinzwe, yemeye kumuzana bityo kwishyura (indege) byari ugufasha gutwara uriya mugabo. Byari ugufasha mu mugambi w\u2019uriya mugabo wo kuzana Rusesabagina mu Rwanda. Leta nta ruhare yagize mu kumutwara kwari ugufasha uriya mugabo washakaga kumuzana mu Rwanda.\u201d<\/p>\n

“Rusesabagina yizanye mu Rwanda” Col. Ruhunga<\/strong><\/p>\n

Mu ntangiriro za Nzeri 2020 ubwo hari hashize iminsi mike Rusesabagina atawe muri yombi, Col. Ruhunga yagiranye ikiganiro n\u2019itangazamakuru ryo mu Rwanda, asobanura uko uyu musaza yafashwe.<\/p>\n

Col Ruhunga yavuze ko Rusesabagina yafatiwe ku kibuga cy\u2019indege mpuzamahanga cya Kigali, yizanye, nta wamuzanye, ko kandi nta wamushimuse. Ati: \u201cRusesabagina uburyo yafashwe, byose byaciye mu mategeko kandi n\u2019uwashaka wese iryo perereza yarikora kuko yaje mu ndege, yaciye ku bibuga mpuzamahanga, ntabwo umuntu aca ku kibuga gusa ngo yinjire agende, ibintu byose biba byanditse, haba hari za camera zireba umuntu, byose byaciye mu mucyo kugeza ageze aha.\u201d<\/p>\n

Yakomeje ati: \u201c\u2026nta wigeze amushimuta ngo amuzane ku ngufu, yaje ku bushake bwe, kandi nawe igihe nikigera bakabimubaza mu rukiko azabivuga. Gushimutwa ntabwo aribyo, yaraje agera i Kigali, hanyuma arafatwa.\u201d<\/p>\n

Rusesabagina mu mboni za Lantos<\/strong><\/p>\n

Uyu muryango nk\u2019uko ubigaragaza muri uru rwandiko, wubaha Rusesabagina nk\u2019umukinnyi mukuru muri filimi Hotel Rwanda, watoranyijwe mu bahatanira igihembo kigenerwa abakinnyi ba filimi b\u2019indashyikirwa cya Oscar muri USA.<\/p>\n

Iyi filimi yerekana uburyo Rusesabagina \u201cyatabaye\u201d Abatutsi bari bahungiye muri Hotel Mille Collines mu Rwanda, mu gihe cya jenoside yabakorerwaga mu 1994; amateka atavugwaho rumwe.<\/p>\n

Lantos kandi yubahira Rusesabagina umudali \u2018Presidential Medal of Freedom\u2019 yahawe mu 2005 na George W. Bush wabaye Perezida wa USA nk\u2019uwaharaniye amahoro.<\/p>\n

Imufata nk\u2019umwenegihugu w\u2019u Bubiligi wemerewe gutura mu buryo buhoraho muri USA, n\u2019ijwi ryanengaga ubutegetsi bwa Perezida wa Repubulika y\u2019u Rwanda, Paul Kagame.<\/p>\n

Rusesabagina yatawe muri yombi mu mpera za Kanama 2020 akurikiranweho ibyaha by\u2019iterabwoba bifitanye isano n\u2019ibitero umutwe witwaje intwaro wa FLN urwanya Leta y\u2019u Rwanda wagabye mu bice by\u2019igihugu byegereye ishyamba rya Nyungwe mu myaka ibiri ishize. Ubu afungiwe muri Gereza ya Nyarugenge, ntacyitabira urubanza rwe kuko ngo nta butabera yiteze.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n