{"id":36992,"date":"2021-06-08T10:45:00","date_gmt":"2021-06-08T10:45:00","guid":{"rendered":"https:\/\/new.bwiza.com\/2021\/06\/08\/yaraduhamagaye-aratubwira-ngo-dusakuze-cyane_umukobwa-wa-rusesabagina\/"},"modified":"2021-06-08T10:45:00","modified_gmt":"2021-06-08T10:45:00","slug":"yaraduhamagaye-aratubwira-ngo-dusakuze-cyane_umukobwa-wa-rusesabagina","status":"publish","type":"post","link":"https:\/\/bwiza.com\/?p=36992","title":{"rendered":"Yaraduhamagaye aratubwira ngo dusakuze cyane_Umukobwa wa Rusesabagina"},"content":{"rendered":"

Umukobwa wa Paul Rusesabagina witwa Lys Rusesabagina ku wa 6 Kamena 2021 yatangaje ko se ufungiwe muri Gereza ya Nyarugenge ari mu bihe bitamworoheye, ngo byageze n\u2019aho abahamagara nk\u2019abagize umuryango we, abasaba gusakuza cyane kugira ngo ahabwe uburenganzira atakibona.<\/strong><\/p>\n

Lys yabitangarije mu kiganiro cyatambutse kuri shene ya YouTube yitwa Ikondera Libre ikoreshwa n\u2019abarwanya ubutegetsi bw\u2019uRwanda, ari kumwe na Diane Rusesabagina.<\/p>\n

Yabajijwe amakuru ya se muri iki gihe, agira ati: \u201cTurageramiwe, tumaze hafi amezi 10 ku rugamba rukomeye kuva bashimuta Papa Rusesabagina Paul ariko noneho ibyo yatubwiye ubwo yaduhamagaraga hashize iminsi ibiri byari agahomamunwa.\u201d<\/p>\n

Hari ku wa Gatanu tariki ya 4 Kamena 2021, arabahamagara. Lys ati: \u201cYaraduhamagaye aratubwira nk\u2019uko bisanzwe, aratubwira ati \u2018noneho nimusakuze cyane. Bambwiye ejo hashize ko kuva uyu munsi batazongera kumpa ibyo kurya ndetse ko n\u2019amazi bajyaga bampa ntazongera kuyabona, n\u2019imiti ndetse no kuba mbahamagaye bitazongera, ko ubu ngubu ari ubwa nyuma.\u201d<\/p>\n

\u201cBasakuze ariko ni umufungwa nk\u2019abandi\u201d SSP Uwera<\/strong><\/p>\n

Umuvugizi w\u2019urwego rw\u2019igihugu rushinzwe imfungwa n\u2019abagororwa (RCS), SSP Uwera Pelly Gakwaya mu kiganiro yagiriye kuri televiziyo y\u2019igihugu mu gitondo cy\u2019uyu wa 8 Kamena 2021, yavuze ko abo mu muryango wa Rusesabagina bemerewe gusakuza ariko bakibuka ko ari umufungwa nk\u2019abandi.<\/p>\n

Yagize ati: \u201cMu kanya numvaga umukobwa we avuga ngo yaratubwiye ngo dusakuze, ni ugusakuza nyine! Basakuze ariko ni umufungwa nk\u2019abandi kandi yitaweho kimwe n\u2019abandi.\u201d<\/p>\n

RCS tariki ya 6 Kamena yatangarije ku rubuga rwa Twitter ko Rusesabagina yajyanwe gufungirwa mu cyumba kirimo n\u2019abandi bafungwa, avanwe mu cyumba cye bwite, yitaga \u201cmu kato\u201d. Yanavuze ko kandi ubu afatwa kimwe n\u2019abandi bafungwa, agaburirwa kimwe nabo kandi agahabwa ubuvuzi nk\u2019abandi.<\/p>\n

Uru rwego rwasubizaga impuruza y\u2019umuryango wa Rusesabagina wavugaga ko agiye kwimwa ibiryo, amazi n\u2019ubuvuzi nk\u2019uko Lys Rusesabagina yabigarutseho muri iki kiganiro.<\/p>\n

SSP Uwera yasubiyemo ko Rusesabagina afatwa kimwe n\u2019abandi. Ati: \u201cIyo akeneye umuganga aramubona, ararya nk\u2019abandi, hari ibiryo byateganyirijwe buri mufungwa, na we arabibona nta na kimwe tumuheezaho.\u201d<\/p>\n

Rusesabagina afungiwe muri Gereza ya Nyarugenge kuva muri Nzeri 2020. Aracyaburanishwa ibyaha by\u2019iterabwoba, n\u2019ubwo atacyitabira urubanza rwe.<\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n