{"id":38036,"date":"2021-07-09T09:17:00","date_gmt":"2021-07-09T09:17:00","guid":{"rendered":"https:\/\/new.bwiza.com\/2021\/07\/09\/umuhanzi-mazimpaka-cadet-yisunze-gahongayire-mu-ndirimbo-nshya-yise-ndi-amahoro\/"},"modified":"2025-02-25T14:06:12","modified_gmt":"2025-02-25T12:06:12","slug":"umuhanzi-mazimpaka-cadet-yisunze-gahongayire-mu-ndirimbo-nshya-yise-ndi-amahoro","status":"publish","type":"post","link":"https:\/\/bwiza.com\/?p=38036","title":{"rendered":"Umuhanzi Mazimpaka Cadet yisunze Gahongayire mu ndirimbo nshya yise \u201cNdi amahoro\u201d"},"content":{"rendered":"

Umuhanzi uhimbaza Imana Mazimpaka Cadet yahuje imbaraga na Gahongayire Aline basohora indirimbo bise \u201cNdi amahoro\u201d ihumuriza abantu baca mu bikomeye ko Uwiteka ari mu ruhande rwabo.<\/strong><\/p>\n

Mazimpaka Cadet utuye mu Mujyi wa Qu\u00e9bec muri Canada, nyuma y\u2019igihe yari amaze asa n\u2019ucecetse mu muziki, Mazimpaka yafatanyije na Gahongayire mu ndirimbo nshya. <\/p>\n

Amwe mu magambo ayigize, aba bahanzi baba bavuga amagambo yisubiramo agira ati \u201cGendana nanjye, dore ijoro rirakuze, gendana nanjye.\u2019\u2019<\/p>\n

\"aline_3.jpg\"<\/p>\n

Iyi ndirimbo ifite iminota ine n\u2019amasegonda atanu yaririmbwe mu Kinyarwanda ariko isobanuye mu Cyongereza mu kwamamaza ubutumwa mu buryo bwagutse. Mazimpaka yabwiye itangazamakuru ko indirimbo \u201cNdi amahoro\u2019\u2019, yubakiye ku nkuru mpamo y\u2019ubuzima abatuye Isi bari kunyuramo muri ibi bihe.<\/p>\n

Yakomeje ati \u2018\u2018Umuntu ashobora kuyifata nk\u2019ivuga ubuzima bwite bw\u2019umuntu, kimwe n\u2019uko wayibonera mu mboni z\u2019ubuzima rusange tubaho nk\u2019abantu. Ni indirimbo ijyanye neza n\u2019ibihe Isi irimo, ibihe aho usanga hari byinshi biduhagaritse imitima, ibibazo byinshi tudafitiye ibisubizo n\u2019ubwoba mu mitima ya benshi.\u2019\u2019<\/p>\n

Yasobanuye ko iyi ndirimbo yakozwe mu buryo bwo guhumuriza abafite imitima ihagaze.<\/p>\n

Ati \u2018\u2018Dutekereza gukora iyi ndirimbo, twumvaga twifuza ubutumwa butanga ibyiringiro mu mitima, tubwira abantu natwe twibwira ko mu Mana ariho dukura gutuza no gutekana n\u2019iyo twaba dukikijwe n\u2019ingorane zitandukanye. Ni iby\u2019ingenzi kuyiragiza ngo ituyobore.\u2019\u2019<\/p>\n

Mazimpaka yahisemo gukorana na Gahongayire nyuma yo guhuzwa n\u2019inshuti ye. Ati \u201cIgitekerezo cyo gukorana na Aline cyaturutse ku nshuti n\u2019umuvandimwe wanjye, yamenye ko ngiye kuza mu Rwanda, ambwira ko ashaka ko nkora collabo na Aline tukayikorera kwa Producer Cl\u00e9ment. Twagiye muri studio ku wa 25 Mata 2021 tudafite indirimbo ariko dufite gusa igitekerezo cy\u2019indirimbo twifuza gukora. Muri make indirimbo yavutse tugeze muri studio.\u2019\u2019<\/p>\n

\u201cNdi amahoro\u2019\u2019 yatunganyijwe mu buryo bw\u2019amajwi na Producer Ishimwe Cl\u00e9ment wa KINA Music mu gihe video yakozwe na Medy Saleh.<\/p>\n

Mazimpaka avuga ko icyorezo cya Covid-19 nigicogora ateganya gutegura igitaramo mu Rwanda azahuriramo n\u2019abandi bahanzi. Aranateganya gukora amashusho y\u2019indirimbo zikubiye muri album ebyiri yasohoye mu mpera za 2017. <\/p>\n

\"cadet_4.jpg\"<\/p>\n

Uyu muhanzi yongeye kugaruka mu muziki nyuma y\u2019uko mu bihe byatambutse yigeze kumara igihe kirenze imyaka 10 adasohora indirimbo nshya, bitewe ahanini na gahunda zitandukanye z\u2019umuryango, akazi n\u2019imirimo ashinzwe mu itorero. <\/p>\n

Mazimpaka yatangiye gucuranga guitar afite imyaka 15, icyo gihe yabaga mu Bujumbura aho umuryango we wari utuye. Nyuma y\u2019imyaka hafi itatu amaze kwakira Yesu, mu 2000 yinjiye mu itsinda ryo guhimbaza ryo mu Itorero Eglise Vivante i Kigali. Aha ni ho umuhamagaro wo guhimbaza no kuramya watangiriye. <\/p>\n

Mu 2002 yimukiye muri Canada, akomeza umurimo wo guhimbaza Imana. Mu 2005 yasohoye album ya mbere yise \u201cNamenye ukuri\u201d yakoranye na Producer Aron Nitunga. Indirimbo yamenyekanye cyane kuri iyo album ni \u201cNdagushimira nte\u201d n\u2019izindi zahembuye imitima ya benshi.<\/p>\n

Nyuma y\u2019imyaka 12, yasohoye album ebyiri icya rimwe mu 2017, zirimo iy\u2019Ikinyarwanda yise \u2018\u2018Birashoboka\u2019\u2019 n\u2019indi y\u2019Igifaransa n\u2019Icyongereza yise \u201cFaithful God \/ Dieu Fid\u00e8le\u201d. <\/p>\n

Mazimpaka ni umugabo wubatse, afite abana batatu. Ni umukozi wa Leta ubifatanya n\u2019umurimo wo kuyobora \u00c9glise H\u00e9ritage de Hull ryo mu Mujyi wa Gatineau mu Ntara ya Qu\u00e9bec.<\/p>\n