{"id":38924,"date":"2021-08-07T14:08:52","date_gmt":"2021-08-07T14:08:52","guid":{"rendered":"https:\/\/new.bwiza.com\/2021\/08\/07\/adf-imaze-kwivugana-abasirikare-ba-fardc-bakabakaba-2-000\/"},"modified":"2021-08-07T14:08:52","modified_gmt":"2021-08-07T14:08:52","slug":"adf-imaze-kwivugana-abasirikare-ba-fardc-bakabakaba-2-000","status":"publish","type":"post","link":"https:\/\/bwiza.com\/?p=38924","title":{"rendered":"ADF imaze kwivugana abasirikare ba FARDC bakabakaba 2,000"},"content":{"rendered":"

Igisirikare cya Repububulika Iharanira Demokarasi ya Congo (FARDC), cyatangaje ko kuva mu Ukwakira 2014 abasirikare bacyo bagera kuri 2,000 bamaze gupfira muri B\u00e9ni mu Burasirazuba bwa kiriya gihugu, mu mirwano kimaze igihe gihanganyemo n’inyeshyamba zo mu mutwe wa ADF.<\/strong> <\/em><\/p>\n

Ni amakuru yemejwe n’Umuvugizi wa FARDC mu ntara ya Kivu y’Amajyaruguru, G\u00e9n\u00e9ral de brigade Sylvain Ekenge, mu kiganiro yagiranye n’itangazamakuru ejo ku wa Gatanu.<\/p>\n

Ati: “Abasirikare bagera ku bihumbi bibiri baguye hano mu gace ka B\u00e9ni kuva mu Ukwakira 2014.”<\/p>\n

Gen Ekenge yakomeje agira ati: “Twafashe abafatanyabikorwa 145 ba ADF mu baturage. Abarwanyi ba ADF bagera ku ijana barafashwe barafungwa. 50 ni Abanyekongo, ibirenze ibyo bakomoka muri Butembo na Beni.”<\/p>\n

Uyu musirikare yatanze iyi mibare, mu rwego rwo kugaragaza aho gahunda ya Perezida Tshisekedi yo gushyiraho ibihe bidasanzwe mu ntara za Kivu y’Amajyaruguru na Ituri igeze.<\/p>\n

Umuvugizi wa FARDC asa n’usubiza abanenga ko iriya gahunda ya Perezida Tshisekedi nta musaruro irageraho, yavuze ko kwitega “amahoro y’ako kanya ni ikinyoma. Ariko tugiye gushyiraho amahoro. Ariko Ntimwibagirwe ko intambara yamaze imyaka irenga 20”.<\/p>\n

Ubwicanyi bwa mbere bw\u2019abasivili mu karere ka Beni bwabaye ku ya 15 Ukwakira 2014.<\/p>\n

Uwo munsi abasivili 32 biciwe i Ngadi nk’uko umwe mu baburokotse yabitangarije AFP muri Gicurasi uyu mwaka.<\/p>\n

Kuva icyo gihe ingabo za FARDC zateguye ibikorwa byinshi byo kurwanya ADF gusa ubwicanyi ntibwigeze buhagarara.<\/p>\n

Uyu mutwe ugizwe n’abarwanyi bagendera ku mahame akaze y’idini ya Islam ku ikubitiro watangiye ibikorwa byabo ugamije guhirika ku butegetsi bwa Perezida Yoweri Kaguta Museveni.<\/p>\n

Raporo yakozwe n’abepiskopi bo muri Congo Kinshasa ivuga ko abarwanyi b’uriya mutwe bamaze imyaka irenga 30 barashinze ibirindiro mu Burasirazuba bwa RDC, aho bashinjwa uruhare mu iyicwa ry\u2019abasivili barenga 6, 000 kuva mu 2013.<\/p>\n

Aba barimo 254 bishwe nyuma y’uko Perezida Tshisekedi yari amaze gushyira Intara za Kivu y’Amajyaruguru na Ituri mu bihe bidasanzwe nk’uko imibare y’impuguke zikurikiranira hafi ibibazo byo mu Burasirazuba bwa RDC ibigaragaza.<\/p>\n