{"id":39128,"date":"2021-08-13T12:40:10","date_gmt":"2021-08-13T12:40:10","guid":{"rendered":"https:\/\/new.bwiza.com\/2021\/08\/13\/mozambique-rdf-na-fadm-baragera-amajanja-umuyobozi-mukuru-wa-is\/"},"modified":"2021-08-13T12:40:10","modified_gmt":"2021-08-13T12:40:10","slug":"mozambique-rdf-na-fadm-baragera-amajanja-umuyobozi-mukuru-wa-is","status":"publish","type":"post","link":"https:\/\/bwiza.com\/?p=39128","title":{"rendered":"Mozambique: RDF na FADM baragera amajanja Umuyobozi Mukuru wa IS"},"content":{"rendered":"

Umugaba Mukuru w’Ingabo za Mozambique, G\u00e9n\u00e9ral-Major, Crist\u00f3v\u00e3o Chume, yatangaje ko ingabo z’igihugu cye zifatanyije n’iza RDF ziteguye gukora ibishoboka byose zigafata Bonomar Machude Omar, umunya-Mozambique ukuriye umutwe wa Islamic State umaze igihe warayogoje intara ya Cabo Delgado.<\/strong> <\/em><\/p>\n

Uyu mugabo usanzwe unazwi ku mazina ya Abu Mohamed na Ibin Omar, ni we ukuriye ishami rya gisirikare n’iry’Ububanyi n’Amahanga ya Islamic State muri Mozambique.<\/p>\n

Gen Crist\u00f3v\u00e3o aganira na Radio Mozambique, yavuze ko Ingabo za kiriya gihugu zifatanyije n’iz’u Rwanda zamaze gufata ibyegera byakoraniraga bya hafi na Bonomar Machude Omar, kuri ubu bikaba biri mu maboko y’inzego za gisirikare n’iz’umutekano.<\/p>\n

Umugaba Mukuru w’Ingabo za Mozambique yavuze ko bafite amakuru yizewe y’uko kiriya cyihebe kiri mu gace ka Moc\u00edmboa da Praia, ibibaha icyizere cy’uko bashobora kugicakira.<\/p>\n

Ati: “Turabizi ko ari muzima. Ari muri aka gace k’imirwano ka Moc\u00edmboa da Praia, ari hafi aha kandi ndatekereza ko tugomba gukomeza ibikorwa byacu by’ubutasi.”<\/p>\n

“Muri iyi minsi yatakaje bamwe mu basore be b’ingirakamaro barimo abamurindaga kandi bamwe mu bo twafashe barimo abari bamwungirije. Abo bantu rero bari kudufasha kandi dufite icyizere cy’uko nadapfira mu mirwano tuzamufata mpiri we n’abandi bayobozi b’uyu mutwe.”<\/p>\n

Gen Crist\u00f3v\u00e3o yabwiye kiriya gitangazamakuru cya Leta ya Mozambique ko abarwanyi ba Islamic State bafashwe n’Ingabo z’u Rwanda batazi niba ari abanyamahanga cyangwa ari abanya-Mozambique, gusa iperereza rikaba ari ryo rizatuma bamenya abo aribo.<\/p>\n

RDF ikomeje kwigarurira ibice bitandukanye muri Mozambique byahoze mu maboko y\u2019uriya mutwe, ku bufatanye n\u2019ingabo za Mozambique.<\/p>\n

Ibikorwa remezo birimo umujyi wo ku cyambu wa Moc\u00edmboa da Praia wari umaze imyaka itanu mu biganza by\u2019uriya mutwe biri mu byo RDF yabohoje mu ntangiriro z’iki cyumweru.<\/p>\n

Gen Cristov\u00e3o aherutse gutangaza ko nyuma yo kwigarurira Mocimboa da Praia, ubu Ingabo z\u2019u Rwanda n\u2019iza Mozambique zigiye gukurikirana ibyihebe mu duce twa Mbau na Siri I tugizwe n\u2019amashyamba y\u2019inzitane.<\/p>\n

Ni uduce twombi dufatwa nk\u2019igicaro gikuru cya ziriya nyeshyamba zivuga ko zigendera ku mahame y\u2019idini ya Islam.<\/p>\n

Yavuze ko kuri ubu RDF n\u2019ingabo z\u2019igihugu cye bari kwifashisha kajugujugu z\u2019intambara mu guhiga ziriya nyeshyamba, ndetse zikaba ziniteguye kugota ibice byose ziherereyemo kugira ngo zitabona aho zisohokera ngo zihunge.<\/p>\n