{"id":39329,"date":"2021-08-20T13:34:57","date_gmt":"2021-08-20T13:34:57","guid":{"rendered":"https:\/\/new.bwiza.com\/2021\/08\/20\/abatalibani-batangiye-kwica-abo-mu-bwoko-nyamuke\/"},"modified":"2021-08-20T13:34:57","modified_gmt":"2021-08-20T13:34:57","slug":"abatalibani-batangiye-kwica-abo-mu-bwoko-nyamuke","status":"publish","type":"post","link":"https:\/\/bwiza.com\/?p=39329","title":{"rendered":"Abatalibani batangiye kwica abo mu bwoko nyamuke"},"content":{"rendered":"

Aba Taliban baherutse “kwica” no gukorera iyicarubozo rikomeye abantu benshi bo mu bwoko bwa ba nyamucye bwa Hazara muri Afghanistan, nkuko bivugwa n’umuryango uharanira uburenganzira bwa muntu Amnesty International.
\n<\/h2>\n

Ababibonye bavuze mu buryo buteye ubwoba uko ubwo bwicanyi bwakozwe. Bwabereye mu Ntara ya Ghazni mu ntangiriro y’ukwezi kwa karindwi.<\/p>\n

Kuva aba Taliban bafata umurwa mukuru Kabul ku cyumweru, bagerageje kugaragaza isura yabo irimo kwigengesera.<\/p>\n

Ariko Amnesty yavuze ko ubwo bwicanyi n’iyicarubozo ari “ikirango giteye ubwoba” cy’ubutegetsi bw’aba Taliban.<\/p>\n

Muri raporo yayo yatangaje ku wa kane, Amnesty yavuze ko abagabo icyenda b’aba Hazara bishwe hagati y’itariki ya 4 n’iya 6 y’ukwezi kwa karindwi mu karere ka Malistan mu ntara ya Ghazni iri mu burasirazuba.<\/p>\n

Uyu muryango uharanira uburenganzira bwa muntu wavuganye n’ababibonye ndetse usuzuma gihamya y’amafoto nyuma y’ubwo bwicanyi.<\/p>\n

Abatuye mu byaro bavuze ko batorotse bava mu misozi ubwo imirwano yakazaga umurego hagati y’izari ingabo za leta ya Afghanistan n’abarwanyi b’aba Taliban.<\/p>\n

Ubwo bamwe muri bo basubiraga mu cyaro cya Mundarakht gushaka ibiribwa, bavuze ko aba Taliban bari basahuye ingo zabo ndetse babategereje.<\/p>\n

Ku rundi ruhande, abagabo bamwe banyuze i Mundarakht bavuye mu mudugudu wabo bagana aho bahungiye na bo batezwe igico.<\/p>\n

Bose hamwe, bivugwa ko abagabo batandatu barashwe, bamwe mu mutwe, naho abandi batatu bakorerwa iyicarubozo kugeza bapfuye.<\/p>\n

Nkuko bivugwa n’ababibonye, umugabo umwe yanigishijwe furari ye ndetse imitsi y’akaboko bayimusokoramo. Undi murambo wararashwe kugeza ucitsemo ibice byinshi.<\/p>\n

Uwabibonye yavuze ko yabajije abarwanyi b’aba Taliban impamvu bakoreye ubwo bunyamaswa ku bantu babo.<\/p>\n

Umurwanyi umwe bivugwa ko yasubije ati: “Iyo ari mu gihe cy’imirwano, buri muntu arapfa, icy’ingenzi si uko uba ufite imbunda cyangwa utazifite. Ni igihe cy’intambara”.<\/p>\n

Umunyamabanga mukuru wa Amnesty Agn\u00e8s Callamard yagize ati: “Ubunyamaswa bwa nta mpuhwe bugaraga muri ubu bwicanyi bwibutsa amateka y’aba Taliban, kandi ni ikirango giteye ubwoba cy’ubutegetsi aba Taliban bashobora kuzana”.<\/p>\n

“Ubu bwicanyi bugambiriwe ni gihamya yuko ba nyamucye mu bwoko no mu idini bakiri mu byago by’umwihariko ku butegetsi bw’aba Taliban muri Afghanistan”.<\/p>\n

Amnesty yongeyeho ko serivisi za telefone zigendanwa zahagaritswe mu bice byinshi byafashwe n’aba Taliban, ko rero amakuru y’ubwo bwicanyi atari yarahise amenyekana kugeza ubu.<\/p>\n

Amnesty yasabye umuryango w’abibumbye (ONU\/UN) gukora iperereza no kurinda abari mu byago.<\/p>\n

Aba Taliban bari bazwiho ubutegetsi burangwa n’ubunyamaswa muri Afghanistan, bwimaga uburenganzira abagore na ba nyamucye mu bwoko, mbere yuko bahirikwa mu 2001 n’urugaga rw’ingabo z’amahanga zirangajwe imbere n’Amerika.<\/p>\n

Mu kiganiro cya mbere kuva bafata Afghanistan bagiranye n’abanyamakuru i Kabul muri iki cyumweru, aba Taliban basezeranyije ko nta bitero byo kwihorera bizabaho ku muntu uwo ari we wese wakoranye n’ingabo z’amahanga.<\/p>\n

Muri icyo kiganiro, uyu mutwe w’intagondwa wanasezeranyije ko uzubahiriza uburenganzira bw’abagore hisunzwe itegeko rya kisilamu rya sharia.<\/p>\n

Aba Hazara ni bwo bwoko bwa gatatu mu bunini muri Afghanistan. Ahanini bugizwe n’abayisilamu b’aba Shia, kandi bumaze igihe bukorerwa ivangura n’itotezwa muri Afghanistan na Pakistan higanje abayisilamu b’aba Sunni.<\/p>\n

Inkuru ya BBC<\/strong><\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n