{"id":40095,"date":"2021-09-16T08:00:00","date_gmt":"2021-09-16T08:00:00","guid":{"rendered":"https:\/\/new.bwiza.com\/2021\/09\/16\/ubwongereza-amerika-na-australia-mu-mugambi-wo-kuvira-inda-imwe-ku-bushinwa\/"},"modified":"2021-09-16T08:00:00","modified_gmt":"2021-09-16T08:00:00","slug":"ubwongereza-amerika-na-australia-mu-mugambi-wo-kuvira-inda-imwe-ku-bushinwa","status":"publish","type":"post","link":"https:\/\/bwiza.com\/?p=40095","title":{"rendered":"Ubwongereza, Amerika na Australia mu mugambi wo kuvira inda imwe ku Bushinwa"},"content":{"rendered":"

Ubwongereza, Amerika na Australia byatangaje ko byagiranye amasezerano yihariye yo mu rwego rw’umutekano yo gusaraganya ikoranabuhanga rigezweho mu bya gisirikare, mu muhate wo guhangana n’Ubushinwa.
\n<\/h2>\n

Ubu bufatanye buzatuma ku nshuro ya mbere Australia ishobora kubaka amato (ubwato) yo munsi y’inyanja akoreshwa n’ingufu za nikleyeri.<\/p>\n

Ubu bufatanye, buzitwa AUKUS, buzaba buri mu rwego rw’imashini zikoresha ubuhanga bwo kwigana imikorere ya muntu (artificial intelligence\/intelligence artificielle), ubuhanga buzwi nka quantum ndetse n’ibijyanye n’umutekano wo kuri mudasobwa.<\/p>\n

Ibi bihugu bitatu bihangayikishijwe n’ingufu z’Ubushinwa zikomeje kwiyongera, ndetse no kuba buri mu karere k’inyanja y’Ubuhinde n’inyanja ya Pacifique.<\/p>\n

Kubera aya masezerano, Australia yavuye mu masezerano yo kubaka amato yo munsi y’inyanja yakorewe mu Bufaransa.<\/p>\n

Mu 2016, Ubufaransa bwatsindiye kontaro ifite agaciro ka miliyari 50 z’amadolari ya Australia (angana n’ama-Euro miliyari 31) yo kubaka amato 12 yo munsi y’inyanja agenewe ingabo zirwanira mu mazi za Australia.<\/p>\n

Ayo masezerano ni yo yari kontaro ya mbere y’amafaranga menshi Australia yari itanze mu rwego rwa gisirikare.<\/p>\n

Ariko, uwo mushinga waranzwe no gukerererwa, ahanini kubera ko leta ya Australia yasabaga ko byinshi mu bikoze ayo mato biva muri Australia.<\/p>\n

Ku wa gatatu, Perezida w’Amerika Joe Biden, Minisitiri w’intebe w’Ubwongereza Boris Johnson na mugenzi we wa Australia Scott Morrison, basohoye itangazo bahuriyeho ritangiza ubu bufatanye bushya bwo mu rwego rw’umutekano.<\/p>\n

Iryo tangazo rigira riti: “Nk’intambwe ya mbere muri AUKUS… twiyemeje intego ihuriweho yo gushyigikira Australia mu kubona amato yo munsi y’inyanja akoreshwa n’ingufu za nikleyeri agenewe igisirikare kirwanira mu mazi cya Australia”.<\/p>\n

“Ubu bushobozi buzatuma habaho ituze mu karere k’inyanja y’Ubuhinde n’inyanja ya Pacific kandi buzafasha indangagaciro n’inyungu duhuriyeho”.<\/p>\n

Aba bategetsi bavuze ko intego ari ugutuma “ubushobozi bwa Australia butangira akazi ku itariki ya vuba cyane hashoboka”, bongeraho bati:<\/p>\n

“Australia ikomeje kwiyemeza kuzuza inshingano zayo zose nka leta idakoresha intwaro za nikleyeri”.<\/p>\n

Muri iryo tangazo, banavuze ko ayo masezerano mu bya gisirikare azanibanda ku bushobozi bujyanye n’umutekano wo kuri mudasobwa, ubuhanga bw’imashini zigana imikorere ya muntu ndetse n'”ubushobozi bw’inyongera bwo munsi y’inyanja”.<\/p>\n

Ku wa gatatu, umuvugizi w’ambasade y’Ubushinwa i Washington yashinje ibyo bihugu kugira “imyumvire yo mu gihe cy’intambara y’ubutita n’imitekerereze idashingiye ku gushyira mu gaciro”.<\/p>\n

Hagati aho, New Zealand (Nouvelle-Z\u00e9lande) yavuze ko izabuza amato ya Australia yo munsi y’inyanja kugera mu mazi yayo, yisunze gahunda isanzweho ireba amato akoreshwa n’ingufu za nikleyeri.<\/p>\n

Inkuru ya BBC<\/strong><\/p>\n

Kurikira ibiganiro n\u2019amavidewo binyura kuri Bwiza TV<\/strong><\/p>\n