{"id":40316,"date":"2021-09-23T11:00:00","date_gmt":"2021-09-23T11:00:00","guid":{"rendered":"https:\/\/new.bwiza.com\/2021\/09\/23\/icyiciro-cya-mbere-cyo-gusaba-ko-rugamba-n-umugore-we-bagirwa-abatagatifu\/"},"modified":"2021-09-23T11:00:00","modified_gmt":"2021-09-23T11:00:00","slug":"icyiciro-cya-mbere-cyo-gusaba-ko-rugamba-n-umugore-we-bagirwa-abatagatifu","status":"publish","type":"post","link":"https:\/\/bwiza.com\/?p=40316","title":{"rendered":"Icyiciro cya mbere cyo gusaba ko Rugamba n’umugore we bagirwa abatagatifu kigiye gusozwa"},"content":{"rendered":"

Umuhango wo gusoza icyiciro cya mbere cyo gusaba ko Rugamba Cyprien n’umugore we, Rugamba Daphrose Mukansanga, bashyirwa mu rwego rw’abatagatifu, uraba ku gicamunsi cyo kuri uyu wa 23 Nzeri 2021 kuri Regina Pacis i Remera.
\n<\/h2>\n

Iki gikorwa kimaze imyaka 6, aho hakozwe ubushakashatsi ku buzima bw’aba bantu bombi, harebwa ko babikwiriye.<\/p>\n

Ku nshuro ya mbere mu mateka ya Kiliziya Gaturika y\u2019u Rwanda, ku wa Gatanu tariki ya 18 Nzeri 2015 i Kigali, hatangiye gahunda yo gushishoza harebwa niba Rugamba Sipiriyani n\u2019umugore we Mukansanga Daforoza bakwiriye gushyirwa mu rwego rw\u2019abahire n\u2019urw\u2019abatagatifu.<\/p>\n

Kuva icyo gihe, urukiko rwa Diyoseze ruyobowe n\u2019 Intumwa y\u2019Arikiyepiskopi Padiri Jean Bosco Ntagungira, umurengezi w\u2019ubutabera Padiri Uwamungu Martin, umwanditsi Madamu Kayitesi Edith n\u2019 umwanditsi wungirije Donatila Mukeshimana, rwatangiye gusuzuma ubu busabe.<\/p>\n

Rwatangiye gushishoza ku busabe bwo gushyira Rugamba n\u2019umugore we mu rwego rw\u2019abahire rubanziriza gushyirwa mu rwego rw\u2019abatagatifu.<\/p>\n

Uru rukiko rushingiye ku buhamya ruzahabwa, rugomba gusuzuma imirimo ya gitwari n\u2019impumuro y\u2019ubutagatifu byagaragaye mu buzima bwa Rugamba n\u2019umugore we.<\/p>\n

Icyiciro cyatangiye kikaba cyarasize bahawe izina ry\u2019abagaragu b\u2019Imana, abakirisitu Gatulika bakaba bashobora gutangira kubiyambaza no kubasaba ngo babasabire ku Mana.<\/p>\n

\"e_9fur3wyaaa-v4.jpg\"
\n Rugamba Cyprien n’umugore we, Rugamba Daphrose Mukansanga\/ Interintei
\n<\/h2>\n

Hashyizweho komisiyo zitandukanye zo kwiga ku mibereho ya Rugamba n\u2019umugore we, harimo Komisiyo ya tewolojiya hamwe na Komisiyo y\u2019amateka.<\/p>\n

Izi Komisiyo nizisanga koko Rugamba n\u2019umugore we bararanzwe n\u2019imyifatire ya gitwari, bazitwa \u2018Abubahwa\u2019, uko barushaho kwiyambazwa n\u2019abakirisitu kandi habonetse igitangaza kandi kikemerwa n\u2019ababifitiye uburenganzira mu rwego rw\u2019ubumenyi no muri kiliziya bazashyirwa mu rwego rw\u2019abahire, nyuma niharamuka habonetse ikindi gitangaza bakazashyirwa mu rwego rw\u2019Abatagatifu.<\/p>\n

Rugamba Sipiriyani n\u2019umugore we ni bo batangije Communaut\u00e9 de l\u2019Emmanuel mu Rwanda. Baje kwicwa ku itariki ya 7 Mata 1994, ubwo Jenoside yakorewe Abatutsi yari itangiye.<\/p>\n

Kubera ukuntu babayeho kugeza ubwo bitabaga Imana, byatumye Communaut\u00e9 de l\u2019Emmanuel isaba ko harebwa niba badakwiye gushyirwa mu rwego rw\u2019Abatagatifu.<\/p>\n

Communaut\u00e9 de l\u2019Emmanuel yagennye ko Dr Waldery Hilgeman ari we uzayifasha gukurikirana ubwo busabe (uyu ni nawe ukurikirana ubusabe bwo gushyira mu rwego rw\u2019Abatagatifu Karidinali Fran\u00e7ois-Xavier Nguyen Van Thu\u00e2n wo muri Vietnam, Julius Nyerere wo muri Tanzania, Karidinali Maurice Otunga wo muri Kenya), azaba yungirijwe na Ngarambe Francois-Xavier ndetse n\u2019umufurere witwa Reginald Cruz.<\/p>\n

Rugamba Sipiriyani yavutse mu mwaka wa 1935, yitaba Imana mu mwaka wa 1994, Daforoza we yavutse mu mwaka wa 1944, yitaba Imana mu mwaka wa 1994 hamwe n\u2019umugabo we.<\/p>\n

Bashakanye muri Mutarama mu mwaka wa 1965, babyarana abana icumi. Urugo rwabo rwabanje kugira ibibazo kugera mu mwaka wa 1982, ubwo Rugamba Sipiriyani yafataga icyemezo cyo gukunda Imana no kuyikorera. Ibi bikaba byarabaye igisubizo ku isengesho Daforoza yahoraga atura Imana asabira umugabo we.<\/p>\n