{"id":52508,"date":"2022-10-14T10:46:47","date_gmt":"2022-10-14T10:46:47","guid":{"rendered":"https:\/\/new.bwiza.com\/2022\/10\/14\/kigali-abashingamategeko-b-abafaransa-bavugirije-induru-umurusiya-wasobanuraga\/"},"modified":"2022-10-14T10:46:47","modified_gmt":"2022-10-14T10:46:47","slug":"kigali-abashingamategeko-b-abafaransa-bavugirije-induru-umurusiya-wasobanuraga","status":"publish","type":"post","link":"https:\/\/bwiza.com\/?p=52508","title":{"rendered":"Kigali: Abashingamategeko b’Abafaransa bavugirije induru Umurusiya wasobanuraga ikibazo cyo muri Ukraine"},"content":{"rendered":"

Abagize inteko ishinga amategeko y\u2019u Bufaransa bahagarariye igihugu cyabo mu nama y\u2019ihuriro ry\u2019Inteko zo ku Isi izwi nka IPU iri kubera mu Rwanda bavugirije induru senateri w\u2019u Burusiya, Konstantin Iosifovich Kosachev.<\/strong><\/p>\n

Muri iyi nama yari ikomereje muri Kigali Convention Center kuri uyu wa 13 Ukwakira 2022, Senateri Kosachev yumvikanishije bagenzi be impamvu u Burusiya bwatangije ibikorwa byihariye by\u2019igisirikare muri Ukraine.<\/p>\n

Muri izi mpamvu ngo harimo kuba mu myaka 8 ishize ubutegetsi bwo muri Ukraine bwarahohoteye, bukica abatuye mu majyepfo y\u2019uburasirazuba, bikagera aho bamwe bahungira mu Burusiya.<\/p>\n

Senateri Kosachev yasobanuriye bagenzi be ko abo muri iki gice bafashe umwanzuro wo kwitandukanya n\u2019igihugu cyabo bakiyunga ku Burusiya kubera ko ubutegetsi bwanze kubahiriza uburenganzira bwabo.<\/p>\n

Yakomoje no ku masezerano ya MINSK Leta ya Ukraine yagiranye n\u2019uruhande rwo mu majyepfo y\u2019uburasirazuba byari bishyamiranye mu 2015, yasinywe bigizwemo uruhare rukomeye n\u2019u Burusiya muri gahunda yabwo yo guharanira amahoro n\u2019umutekano.<\/p>\n

Uyu senateri yavuze ko Leta ya Ukraine yanze kubahiriza aya masezerano yafatiwemo umwanzuro wo guhagarika intambara mu iki gice cya Donbas kigizwe n\u2019akarere ka Donetsk na Luhansk.<\/p>\n

Kuri we, ntabwo icyemezo cyo komeka ku Burusiya ibice bine bya Ukraine ari icy\u2019igihugu cyabo, ahubwo ni amahitamo y\u2019abo muri Donbas. <\/p>\n

Ati: “Ubu banze kuvugana n\u2019abantu batuye mu majyepfo y\u2019uburasirazuba, ni yo mpamvu miliyoni z\u2019abantu bafashe icyemezo cyo kwitandukanya n\u2019iki gihugu kitubahiriza uburenganzira bwabo, agaciro kabo, idini ryabo, ururimi rwabo n\u2019umuco wabo.”<\/p>\n

Yakomeje ati: “Ni yo mpamvu hashingiwe kuri kamarampaka, ibice bine byahoze kuri Ukraine byahisemo kwiyunga ku Burusiya. Ntabwo ari icyemezo cy\u2019u Burusiya; ni icyemezo cya miliyoni z\u2019abantu batuye hariya.”<\/p>\n

Senateri Kosachev yahamije ko Ukraine n\u2019ibihugu biyitera inkunga byirengagiza nkana ukuri kw\u2019ibibera muri Donbas, kandi ngo ukuri kurazwi, uwashaka kukumenya yaganira n\u2019abatuye muri iki gice.<\/p>\n

Uyu mushingamategeko wari wasabwe kuvuga ku buryo ihame ry\u2019uburinganire ryubahirizwa mu Burusiya mu gihe yari akomeje gusobanura ikibazo cyabo na Ukraine, umuhuza w\u2019ikiganiro yamwibukije ko igihe yahawe cyarangiye.<\/p>\n

Senetari Kosachev yasoje ijambo rye, abashingamategeko batatu b\u2019u Bufaransa bamuvugiriza induru bati “Booo! [Buuu!]”, bamwe mu bari bitabiriye iyi nama barumirwa, abandi baraseka.<\/p>\n

Iyi nama yatangiye tariki ya 11. Izarangira ku ya 15 Ukwakira 2022.
\n

\"Aba
Aba bashingamategeko b’u Bufaransa ni bo bavugirije induru mugenzi wabo wo mu Burusiya<\/figcaption><\/figure><\/p>\n

Reba videwo yose kuri BWIZA TV