\nIbi bikaba byatangajwe kuri uyu wa Mbere, itariki ya 12 Werurwe 2018, ubwo hashyirwaga umukono ku masezerano y\u2019inguzanyo ya miliyoni 20 z\u2019amadolari y\u2019Amerika, arenga miliyari 17 z\u2019amafaranga y\u2019u Rwanda, yatanzwe n\u2019Ikigega mpuzamahanga kigamije iterambere (OFID).
\nAmb. Gatete yagize ati \u201cNi amafaranga aje kunganira wa mushinga munini w\u2019amazi n\u2019isuku mu Mujyi wa Kigali twari dusanganywe urenga miliyoni 262 z\u2019amadolari y\u2019Amerika. Uyu mushinga urimo abaterankunga banyuranye, Banki Nyafurika Itsura Amajyambere yashizemo miliyoni zirenga 171 z\u2019amadolari y\u2019Amerika, \u2018European Investment fund\u2019 yashyizemo miliyoni 45 z\u2019amayero na Guverinoma y\u2019u Rwanda yashyizemo miliyoni zirenga 20 z\u2019amadolari y\u2019Amerika.
\nUbu noneho amafaranga yose agize uyu mushinga wa miliyoni zirenga 262 akaba yuzuye, ibisigaye bikaba ari ugushyira mu bikorwa ibijyanye n\u2019uyu mushinga wo guteza imbere amazi n\u2019isuku mu Mujyi wa Kigali.\u201d
\n
![\"\"](\"http:\/\/www.bwiza.com\/wp-content\/uploads\/2018\/03\/DYFl2sOWAAEq6aK-1024x683.jpg\")
\nUmunyamabanga wa Leta muri Minisiteri y\u2019Ibikorwa Remezo ushinzwe ingufu, amazi n\u2019isukura, Kamayirese Germaine, yavuze ko Leta y\u2019\u2019u Rwanda yiyemeje gushaka ayo mafaranga kugira ngo ishyire mu bikorwa ibyo yiyemeje bikubiye mu ntego z\u2019iterambere rirambye (SDGs), aho mu 2030 abatuye Isi bose bazaba bafite amazi 100%.
\nAti \u201cHari imishinga yo kuvugurura imiyoboro y\u2019amazi mu Mujyi wa Kigali ndetse no mu migi itandatu yunganira Kigali, aya mafaranga aje gushyira mu bikorwa imishinga ijyanye no kongera amazi mu gihugu mu turere dutandukanye kandi na none aje gukora mu bindi bikorwa bijyanye n\u2019isuku n\u2019isukura.
\nAmafaranga y\u2019umushinga wose azaha amazi meza abaturage bagera kuri miliyoni n\u2019ibihumbi 300, azatanga ibikorwa by\u2019isuku n\u2019isukura ku bantu bagera kuri miliyoni imwe n\u2019ibihumbi 500 mu gihugu hose.\u201d
\nUmuyobozi mukuru w\u2019ikigega OFID, Suleiman J Al-Herbish, yavuze ko \u00a0ibikorwa byo kugeza amazi ku baturage nibyuzura, byitezweho kuzamura igipimo cy\u2019abafite amazi meza n\u2019isuku kandi bigatanga imirimo ku rubyiruko rw\u2019Abanyarwanda.
\nAti \u201cNkuko twese tubizi, ibikorwa by\u2019amazi n\u2019isuku ni ingenzi kandi bidufasha kugera ku majyambere arambye. Ndemeza ko iyi gahunda izagera ku cyo igamije kandi Abanyarwanda benshi bazagezwaho ibikorwa by\u2019amazi n\u2019isuku kandi nishimiye ubufatanye bw\u2019u Rwanda n\u2019ikigega OFID.\u201d
\nAmafaranga ya OFID azafasha kandi mu kwagura uruganda rwa Nzove n\u2019urwa Gihira II no kubaka imiyoboro y\u2019amazi mu turere twa Musanze, Rubavu, Muhanga, Nyagatare, Huye na Rusizi.
\nIkigega OFID gisanzwe gitera inkunga u Rwanda mu nzego zitandukanye, mu guteza imbere ubwikorezi nko kubaka imihanda aho bafatanyije n\u2019abandi baterankunga no mu rwego rw\u2019ingufu; ni bamwe kandi mu bemeye gutera inkunga umushinga wo kubaka ikibuga mpuzamahanga k\u2019indege cya Bugesera.
\n\u00a0<\/p>\n","protected":false},"excerpt":{"rendered":"