{"id":9817,"date":"2018-04-07T13:21:39","date_gmt":"2018-04-07T13:21:39","guid":{"rendered":"https:\/\/new.bwiza.com\/2018\/04\/07\/ese-habyarimana-juvenal-yakoze-jenoside-kandi-yarabaye-yaramaze-gupfa\/"},"modified":"2025-02-12T14:30:15","modified_gmt":"2025-02-12T12:30:15","slug":"ese-habyarimana-juvenal-yakoze-jenoside-kandi-yarabaye-yaramaze-gupfa","status":"publish","type":"post","link":"https:\/\/bwiza.com\/?p=9817","title":{"rendered":"Ese Habyarimana Juvenal yakoze Jenoside kandi yarabaye yaramaze gupfa?"},"content":{"rendered":"

Iki ni ikibazo umuyobozi wa Komisiyo Ishinzwe kurwanya Jenoside (CNLG), Dr Bizimana Jean Damascene, yavuze ko bakunze kubazwa n\u2019urubyiruko rw\u2019abanyeshuri bavutse nyuma ya Jenoside yakorewe Abatutsi mu 1994.<\/em> <\/strong> <\/p>\n

Mu ijambo yagejeje ku bari bitabiriye umuhango wo gutangiza ibikorwa byo kwibuka ku nshuro ya 24 jenoside yakorewe Abatutsi, kuri uyu wa Gatandatu tariki ya 7 Mata 2018, yasobanuye ko umugambi wo kwica Abaturage wari muri politiki ya Habyarimana.<\/p>\n

Yagize ati \u201cIgisubizo cya mbere tugisanga mu gisobanuro cya jenoside nk\u2019uko kigaragara mu mategeko, aho bisobanurwa ko jenoside ari umugambi ukurikiwe n\u2019ibikorwa bigamije kurimbura abaturage, bazizwa kimwe muri ibi bikurikira; ubwenegihugu, ubwoko, ibara ry\u2019uruhu cyangwa se idini\u201d.<\/p>\n

Ashingiye kuri iki gisobanuro, avuga ko muri Politiki ya Perezida Habyarimana Juvenal harimo umugambi wo kwica Abatutsi.<\/p>\n

Ati \u201cMu Rwanda, umugambi wo kwica abantu, bazizwa ubwoko wari muri politiki ya Habyarimana, gupfa rero atawusoje ntabwo bivanaho uruhare rwe\u201d.<\/p>\n

Atanga urugero rw\u2019ijambo yavugiye mu Bubiligi ku wa 19 Ugushyingo 1984, ubwo yakiraga abanyeshuli b\u2019Abanyarwanda bahigaga, Ubwo bamubazaga ikibazo cy\u2019impunzi zari zimaze kwirukanwa muri Uganda,<\/p>\n

Ngo yasubije agira ati \u201cku cyerekeye impunzi, icyo Leta y\u2019u Rwanda yifuza, ni uko izo mpunzi ziri mu mahanga zafata ubutaka zigahinga aho ziri, zashaka akazi zigakora, zashaka undi mwuga ushobora kuzitunga kuko mu Rwanda tutabona aho tuzishyira, mu Rwanda nta mirima igihari, ntaho kororera hagihari, Leta ishaka ko n\u2019Abanyarwanda bari mu gihugu bishobotse bajya gutura ahandi\u201d.<\/p>\n

Akomeza avuga ko iyi mvugo ubwayo irimo imvugo ya jenoside, ngo kuko \u2018gushyira abantu mu mibereho mibi ugamije ko babaho nabi, biri mu biranga icyaha cya Jenoside\u201d.<\/p>\n

Akomeza atanga ingero zitandukanye zirimo ibyangombwa byashyirwagaho by\u2019amananiza, nk\u2019icyangombwa cyemereraga umuntu kuba mu mujyi, cyabaga kigaragaza amoko ye, aho avuka,\u2026ko ibi nabyo byagaragaragaho amananiza kuri bamwe bakabura akazi, kimwe n\u2019ibindi byahabwaga umuntu washakaga kuva muri komini ajya mu yindi.<\/p>\n

Agashimangira ko umugambi wa jenoside wagiye ugaragarira no mu mategeko yashyirwagaho na Leta y\u2019icyo gihe, ndetse n\u2019andi masezerano mpuzamahanga u Rwanda rwasinyaga, ko hari ingingo rwasimbukaga ntiruzisinye bitewe ngo n\u2019uko muri politiki yarwo harimo umugambi wo kwimakaza ingengabitekerezo ya jenoside.<\/p>\n

Mu ijoro ryo ku wa 6 Mata 1994, nibwo indege yari itwaye Perezida Habyarimana Juvenal n\u2019abandi bari kumwe barimo na Perezida w\u2019u Burundi Ntaryamira Cyprien, yarashwe, kugeza magingo aya iperereza ryakozwe rikaba ritaragaragaza uwarashe iyo ndege.<\/p>\n

\"\"
Umuyobozi wa Komisiyo Ishinzwe kurwanya Jenoside (CNLG), Dr Bizimana Jean Damascene<\/strong> <\/em><\/figcaption><\/figure>\n

Kanda kuri SUBSCRIBE ujye ubona ibiganiro n\u2019indirimbo bishya<\/strong> <\/a><\/p>\n

\n
\"YouTube