{"id":9995,"date":"2018-04-21T21:39:38","date_gmt":"2018-04-21T21:39:38","guid":{"rendered":"https:\/\/new.bwiza.com\/2018\/04\/21\/rusizi-abarokokeye-muri-cimerwa-bashengurwa-n-uko-uwari-umuyobozi-warwo-mukuru\/"},"modified":"2018-04-21T21:39:38","modified_gmt":"2018-04-21T21:39:38","slug":"rusizi-abarokokeye-muri-cimerwa-bashengurwa-n-uko-uwari-umuyobozi-warwo-mukuru","status":"publish","type":"post","link":"https:\/\/bwiza.com\/?p=9995","title":{"rendered":"Rusizi: Abarokokeye muri CIMERWA bashengurwa n\u2019uko uwari umuyobozi warwo mukuru akidegembya"},"content":{"rendered":"

Abari abakozi b\u2019uruganda rukora sima rwa CIMERWA ruri mu murenge wa Muganza mu karere ka Rusizi barokotse Jenoside yakorewe abatutsi mu 1994, bavuga ko yabaye basa n\u2019abari baragizwe ibisenzegeri n\u2019ubuyobozi bw\u2019uruganda bwariho, aho bwabatotezaga bikabije butabafata nk\u2019abantu kugeza ku ndunduro mu 1994 ubwo bakorerwaga Jenoside bigizwemo uruhare rukomeye na bamwe mu bari abayobozi bakuru barwo.
\nUshyirwa mu majwi cyane ni uwari umuyobozi mukuru warwo Sebatware Marcel bavuga ko magingo aya akomeje kwidegembya mu Bubiligi na Ndorimana Casimir wahakoraga, wakatiwe n\u2019inkiko akaba afungiye muri gereza nkuru ya Rusizi, bari barakoze urutonde rw\u2019abatutsi bagomba kwicwa rukabikwa mu biro by\u2019uyu muyobozi mukuru, rukajya rukoreshwa babashakisha ngo babamarire ku icumu, aho ngo bavugaga ko nta mututsi n\u2019umwe uhakora ugomba kurokoka kuko ngo bakorana n\u2019inkotanyi bya hafi.<\/p>\n

\"\"
Aha ni mu rugendo rwo kwibuka abari abakozi ba CIMERWA bishwe muri Jenoside yakorewe abatutsi.<\/strong><\/figcaption><\/figure>\n

Bavuga ko bakomeje kubabazwa cyane no kubona uyu Sebatware Marcel atarafatwa ngo aryoze amaraso y\u2019ababo yamennye, bakifuza ko aramutse afashwe yazanwa kuri CIMERWA aho yamariye ababo ku icumu akaba ari ho aburanishirizwa arebana mu maso n\u2019abo yifuzaga ko barimbuka bose.<\/p>\n

\"\"
Bapfakurera Jean asanga uwari umuyobozi wa CIMERWA mu gihe cya Jenoside afashwe akaburanishirizwa aho yakoreye ibyaha byaha ingufu abarokotse.<\/strong><\/figcaption><\/figure>\n

Bapfakurera Jean umwe mu baharokokeye bamwe bo mu muryango we bakahatikirira, yabwiye Bwiza.com ko iyo uyu muyobozi mukuru w\u2019uruganda aza kuba adashyigikiye amahano yakorerwaga abatutsi haba hararokotse benshi, kuko hari n\u2019abari barihishe mu ruganda, bahigwa bukware kugeza ubwo bakuwemo na bo baricwa bigizwemo uruhare n\u2019uyu muyobozi.
\nYagize ati\u2019\u2019 dukomeje gukorwa mu nkovu no kumva uwaduhekuye natwe akadusigira ubumuga bukomeye n\u2019ibikomere by\u2019imitima n\u2019imibiri acyidegembya mu Bubiligi, tugasaba Leta y\u2019uRwanda yadukoreye byinshi bitugarurira icyizere cyo kubaho, ko yanakora ibishoboka byose ku bufatanye n\u2019uru ruganda, uriya mugizi wa nabi agafatwa akazanwa hano akaba ari ho aburanishirizwa turebana mu maso\u201d.
\nBakomeza bavuga ko uyu mugabo, igihe yaba aje yavuga byinshi ku bajugunywe mu migezi ya Rusizi, Rubyiro Ruhwa n\u2019ahandi, akaryozwa ibyo yabakoreye, bumva ari ho bakururuka imitima, na ho ubundi bakomeje gushengurwa no kumva acyidegembya nk\u2019aho ari umwere.
\nUbwo hibukwaga ku nshuro ya 24 abari abakozi b\u2019uru ruganda n\u2019imiryango yabo bishwe muri Jenoside yakorewe abatutsi, umuyobozi mukuru ushinzwe imari muri CIMERWA John Bugunya, yavuze ko na bo bababazwa cyane n\u2019uko umuntu nk\u2019uyu akomeza kwidegembya, ariko ko amakuru uruganda rwayatanze kandi ruzakomeza kuyatanga kugeza afashwe akaryozwa ibyo ashinjwa.
\nAti\u2019\u2019 ntibyoroshye ariko uruganda, ku bufatanye na CNLG n\u2019izindi nzego za Leta tugenda tubiganiraho, tugerageza kureba uko twafatanya kugira ngo uwo ari we wese wagize uruhare muri aya mahano ashyikirizwe ubutabera. Twarabitangiye n\u2019amakuru twarayatanze, tuzakomeza gukurikirana kugira ngo tuzarebe ko ari we ari n\u2019abandi babigizemo uruhare bafatwa tubanje gushaka amakuru afatika.\u2019\u2019
\nUmuyobozi w\u2019aka karere Harelimana Fr\u00e9d\u00e9ric,na we yavuze ko biri muri gahunda ya Leta y\u2019uRwanda gukurikirana abantu nka bariya aho bari hose kugira ngo mu bihugu binyuranye bahungiye mo babashe gufatwa baryozwe ibyo bakoze, igishimishije kikaba ari uko hari ibihugu byatangiye ku bafata, akizera ko n\u2019ibindi bizabikora kuko Jenoside ari icyaha gikorerwa isi yose kandi kidasaza.
\nMuri uru ruganda bivugwa ko haguyemo abatutsi basaga 80 nk\u2019uko byemezwa n\u2019abaharokokeye, ubuyobozi bwarwo bukaba bwarijeje ubufasha ku miryango y\u2019abahaguye n\u2019abaharokokeye, burimo amashuri n\u2019akazi ku bana babo no kubakirwa amazu.<\/p>\n

\"\"
Abayobozi banyuranye bafata mu mugongo abarokokeye kuri CIMERWA.<\/strong><\/figcaption><\/figure>\n
\"\"
Abayobozi banyuranye bafata mu mugongo abarokokeye kuri CIMERWA.<\/strong><\/figcaption><\/figure>\n

Kanda Subscribe kuri Bwiza TV ujye ubona videwo zigezweho z\u2019ubuzima,imikino,imyidagaduro\u2026<\/a><\/strong>
\n