Inkomoko y’insigamigani ‘yagiye nk’Abagesera’

0 1,098

Uyu mugani bawuca iyo babonye umuntu yari kumwe n’abandi, akaza kugenda atabasezeyaho nibwo bavuga ko yagiye nk’Abagesera.

Wakomotse ku munya-Bugesera witwaga Muganza,wiyahuye muri cyohoha i Bugesera,ahayinga mu 1400, umwami w’u Rwanda, Cyilima Rugwe amaze gucyura umugore wa Nsoro Bihembe witwaga Nyanguge akaba nyina wa Kigeli Mukobanya, aribwo mu Rwanda bahimbye umugani ngo “umwami uraguza yatsinze ubuguza’’,[ bavuga ko Nsoro yahugiye mu gukina igisoro,naho Rugwe agahora araguriza gutsinda].

Nsoro umwami w’ u Bugesera yari afite umugaragu w’umutoni we akitwa Muganza,bukeye u Rwanda rumaze gutsinda u Bugesera,Muganza aracika,acikira i Burundi ahageze bamufata nabi, ajya i Karagwe agezeyo na bo bamufata nk’i Burundi, naho arahava.

Mu nzira agenda,agenda yibaza ati ‘’mbigenje nte,ko ninjya mu Rwanda bazanyica kuko nari umutoni wa Nsoro’’ ,apfa kwihangana asubira i Bugesera,agezeyo asanga umunyarwanda wahagabanye witwaga Gasigwa akoma yombi ati “Nyagasani mutware w’u Bugesera nje kugucyeza, uzandeme amaboko n’amaguru’’.

Nuko gasigwa aramwemerera Muganza agumya kumuhakwaho kugeza igihe Gasigwa amugabiye inka z’imbyeyi eshatu z’umuriro, amaze kuzibona yongera kwibaza ati “ubu koko ngiye guhakwa ibitutsi kandi nari umugaragu w’i bwami, bizamera bite?

Yegera Gasigwa aramubwira ati “naragushimye kuko wampaye umuriro,none ndagusaba ko uzansohoreza no kuri Cyilima’’,Gasigwa aramubaza ati ‘’ese wabonye njye naraguhatse nabi?’’,Muganza ati  ‘’icyo mbigusabira ni uko wamungezaho kuko mu bugesera ba mpinga bavuga ko nari umutoni wa Nsoro’’,Gasigwa ati ‘’nzamugushyikiriza’’.

Bukeye basanga Cyilima Rugwe,bagezeyo Gasigwa abwira Cyilima ati ‘’nkuzaniye Muganza wahoze ari umutoni wa Nsoro,yansabye kumukuzanira ngo mwibonanire ngo haricyo ashaka kukubwira,bahamagaza Muganza ,Gasigwa aramubwira ati ‘’egera uvugane na Rugwe wansabye guhura nawe.

Cyilima yumvise ko Muganza yahoze ari umutoni wa Nsoro biramushimisha, kuko yumvaga ko namuhaka akamutonesha azamuyoborera u Bugesera kuko yari azi imico yaho, Cyilima abwira Gasigwa ati “taha nawe Muganza turagumana’’.

Haciyeho iminsi yongera gutuma kuri Gasigwa ati ‘’nshakira inka ijana n’imisozi ubimpere Muganza’’.Gasigwa nawe ati ‘’ni ibyo gupfa ubusa ,nzajya kubimuha’’,Cyilima ati ‘’bizapfa ubusa bite?’’,undi ati ‘’ni uko wabinyaze nsoro none ukaba ubisubije mwene wabo’’. Ibyo byose Gasigwa yabivuganaga ishyari.

Ubwo Muganza abona inka n’;imisozi,akomeza n’ubutoni bwe,Gasigwa abonye ko Muganza atonnye cyane,ishyari riramushengura,acyeka ko bazamugabira n’ibyo arimo,nuko kuva ubwo Gasigwa agandisha abakozi na ya misozi muganza yagabanye,abuza abantu kumugemurira,ariko akabigira rwihishwa.

Muganza akajya atumiza ingemu,zikabura,kugeza ubwo inzara imurembeje,bucyeye Gasigwa yoshya abagaragu ba Cyilima ngo bashuke Muganza ko bumvishe Cyilima avugako agiye kumutanga akamukurikiza Nsoro [agiye kumwicisha]. Muganza ngo arite mu gutwi,ubwoba buramutaha nuko acika ijoro ryose ntawe abwiye aho agiye,ajya kwiyahura muri Cyohoha.

Bucyeye kabiri,Cyilima abaza abagaragu ati ‘’ko ntakibona Muganza aba he?’’,abandi bati ‘’yaratashye ‘’, nawe ati ‘’agataha atamennye [atavuze]’’,abandi bati ‘’ni ko abagesera bagenda’’. Aha niho havuye ko iyo umuntu avuye mu bandi atavuze,baravuga bati ‘’yagiye  nk’Abagesera’’.

Mbarushimana Africa/Bwiza.Com

Tanga igitekerezo

Your email address will not be published.